Levitika 13:1-59
13 KUA vagahau mai e Iehova kia Mose, mo Arona kua pehe mai,
2 Kaeke ke moua e tagata ke he kili he hana kakano e mena fufula, po ke matafune, po ke ila kikila, ha ha he kili he hana kakano tuga ne ila lepela; kia uta ai e mutolu a ia kia Arona ko e ekepoa, po ke taha he hana tau tama tane ko e tau ekepoa.
3 Ti kitekite ai e ekepoa ke he ila he kili he hana kakano; ka faliu hina foki e tau fulu ke he ila, kua tuga ne mena hokulo foki e ila ki loto he kili he hana kakano, ko e ila lepela ni haia; to kitekite foki e ekepoa kia ia, mo e pehe atu kua kelea tuai a ia.
4 Kaeke foki kua hina e ila kikila ke he kili he hana kakano, ka e tuga ne mena nakai hokulo ki loto he kili, kua nakai faliu hina foki e tau fulu, ti puipui ai he ekepoa a ia ne ha i ai e ila ato hoko ke he po fitu.
5 Ti kitekite atu e ekepoa kia ia ke he aho fitu, kitiala foki, ka kitia e ia kua toka gaia e ila, kua nakai tolomaki foki e ila ke he kili, ti liu foki e ekepoa puipui ai a ia ke he falu a po ne fitu.
6 Ti liu foki kitekite e ekepoa kia ia ke he aho fitu, kitiala foki, kua hina fakatekiteki e ila, ti nakai tolomaki foki e ila ke he kili, ti pehe e ekepoa kua mea ai a ia, ko e matafune ni, ti unu e ia hana tau tapulu ti mea ai a ia.
7 Kaeke foki ke totolo ai e matafune ke he kili, ka mole atu he kitekite e ekepoa kia ia, ti fakamea ai a ia, ti liu foki kitekite e ekepoa kia ia.
8 Ka kitia he ekepoa, kitiala foki, kua tolomaki tuai e matafune ke he kili, ti pehe atu ai e ekepoa kua kelea a ia; kua lepela ni a ia.
9 Kaeke ke ha ha he tagata e ila lepela ti uta ai a ia ke he ekepoa.
10 Ti kitia he ekepoa; kitiala foki, kua hina e mena fufula he kili, ti faliu hina foki e tau fulu, kua kakano kula nokonoko foki e mena fufula.
11 Ko e lepela haia kua leva tuai ke he kili he hana kakano, ti pehe atu e ekepoa kua kelea a ia, nakai puipui ai a ia, nukua kelea tuai a ia.
12 Kaeke foki kua tupu lahi e lepela ke he kili, ti ufia oti ai e kili hana ne ha i ai e ila lepela, ke kamata he hana ulu ti hoko hifo ai ke he hana na hui ke he tau mena oti ka kitekite ki ai e ekepoa
13 Ti kitekite atu e ekepoa kia ia, kitiala foki, kua ufia hana kakano oti ke he lepela, ti talahau ai e ia kua mea a ia ne ha i ai e gagao lepela; kua liu hina oti tuai, kua mea ni a ia.
14 Ka ko e aho ke kitia ai e kakano kula nokonoko kua kelea tuai a ia.
15 Ti kitekite atu foki e ekepoa ke he kakano kula nokonoko, mo e pehe atu kua kelea tuai a ia; ko e mena kelea e kakano kula nokonoko; ko e lepela haia.
16 Kaeke ke liliu foki e kakano kula nokonoko, mo e liliu hina, ti fina age ai a ia ke he ekepoa.
17 Ti kitekite atu e ekepoa kia ia, kitiala foki, kaeke kua liliu hina e ila ti talahau ai e ekepoa kua mea a ia ne ha i ai e ila; kua mea tuai a ia.
18 Ko e kili he kakano, ne ha i ai e fakafoha, ka kua mafu tuai,
19 Ti ha ha he mena ne tu ai e fakafoha e mena fufula tea, po ke ila kikila kua tea mo e kula, kua fakakite ai foki a ia ke he ekepoa.
20 Ti kitia he ekepoa, kitiala foki, kua tuga ne mena hokulo ki loto he kili, kua liliu hina foki e tau fulu ha i ai, ti pehe atu ai e ekepoa kua kelea tuai a ia; ko e ila lepela haia, kua tupu mai ai he fakafoha.
21 Kaeke ke kitia he ekepoa, kitiala foki, nakai ha i ai ha fulu hina, ti nakai hokulo foki ki loto he kili, ka kua hina fakatekiteki; ti puipui ai he ekepoa a ia ke he fale po fitu.
22 Kaeke foki kua totolo lahi ai ke he kili, ti pehe atu e ekepoa kua kelea tuai a ia; ko e ila lepela haia.
23 Kaeke foki kua toka gaia e ila kikila ke he mena agaia, nakai tolomaki atu ko e fakafoha vevela ia; ti pehe atu e ekepoa kua mea a ia.
24 Kaeke ke ha i ai ke he kili he kakano e mena kua vela he afi, ti ha i ai ke he kakano kua vela e ila kikila tea, kua kula, po ke hina.
25 Ti kitekite atu e ekepoa kia ia, kitiala, foki, kua liliu hina e tau fulu ke he ila kikila, ti tuga ne mena hokulo ki loto he kili; ko e lepela haia kua tupu mai ai he mena ne vela; ti pehe atu ai e ekepoa kua kelea tuai a ia; ko e ila lepela ni haia.
26 Ka ko e mena ka kitia he ekepoa, kitiala foki, nakai ha ha he ila kikila ha fulu hina, kua nakai hokulo foki ki loto he kili, ka kua hina fakatekiteki; ti puipui ai he ekepoa a ia ke he fale po fitu.
27 Ka hoko ke he aho fitu ti kitekite ai foki e ekepoa kia ia; kaeke kua totolo lahi ke he kili, ti pehe atu e ekepoa kua kelea tuai a ia; ko e ila lepela haia.
28 Kaeke foki kua toka gaia e ila kikila ke he mena agaia, nakai tolomaki ke he kili, ka kua hina fakatekiteki ko e gagao fufula ia ke he mena ne vela, ti pehe atu e ekepoa kua mea tuai a ia; ha ko e gagao fufula ia ke he mena ne vela.
29 Kaeke ke ha i ai ke he tane po ke fifine e ila ke he ulu po ke hafe;
30 Ti kitekite atu e ekepoa ke he ila; kitiala foki, kua tuga ne mena hokulo ki loto he kili; kua ha i ai foki e tau fulu ulu emu kula; ti pehe atu e ekepoa kua kelea tuai a ia; ko e gagao matafune, ko e lepela haia ke he ulu po ke hafe.
31 Kaeke foki kua kitekite e ekepoa ke he ila he gagao matafune, kitiala foki, kua tuga ne mena nakai hokulo ki loto he kili, kua nakai ha i ai e tau lauulu uli; ti puipui he ekepoa a ia po fitu ke he fale ne ha i ai e ila he gagao matafune.
32 Ti kitekite atu e ekepoa ke he ila ke he aho fitu; kitiala foki, kua nakai tolomaki e gagao matafune, kua nakai ha i ai foki e tau lauulu kula, kua tuga ne mena nakai hokulo foki e gagao matafune ki loto he kili;
33 Ti hifipuga ai e ia hana lauulu ka e aua neke hifipuga e mena ne ha i ai e gagao matafune; ti liu foki puipui ai he ekepoa a ia ke he fale, ke he falu a po ne fitu.
34 Ka hoko ke he aho fitu ti kitekite atu ai e ekepoa ke he gagao matafune kitiala foki, kua nakai totolo ai e matafune ke he kili, ti tuga ne mena nakai hokulo foki ki loto he kili; ti talahau he ekepoa kua mea a ia; ti unu ai e ia hana tau tapulu, ti mea ai a ia.
35 Kaeke foki kua totolo lahi e gagao matafune ke he kili, ka kua mole atu e tau aho he hana fakameaaga;
36 Ti kitekite atu e ekepoa kia ia, kitiala foki, kua tolomaki ai e gagao matafune ke he kili, ti nakai kumi he ekepoa ke he tau lauulu kula; kua kelea tuai a ia.
37 Kaeke foki kua toka gaia e gagao matafune ke he hana kitekite, kua tupu ai foki e tau lauulu uli, kua maulu tuai e gagao matafune, kua mea a ia; ti talahau ai he ekepoa kua mea ni a ia.
38 Kaeke kua ha i ai ke he tane po ke fifine e ila kikila ke he kili he hana kakano, ko e ila kikila tea;
39 Ti kitekite atu e ekepoa, kitiala foki, kua ha he kili he hana kakano e ila kikila tea, kua hina ka e mea; ko e ila hina haia kua tupu ke he kili; kua meā a ia.
40 Ko e tagata foki kua mokulu hana lauulu, kua ulu kila a ia, kua mea a ia.
41 Kaeke foki kua mokulu ai e lauulu he hana mua le, kua kila hana mua le; kua mea a ia.
42 Kaeke foki kua ha he mena ne kila ai e tumuaki ulu, po ke mua le, e taha ila hina mo e kula; ko e lepela haia kua tupu ai ke he mena ne kila ai hana a tumuaki ulu, po ke hana mua le.
43 Ti kitekite atu e ekepoa kia ia; kitiala foki, kua hina mo e kula e gagao fufula ha he ila ke he mena ne kila ai hana tumuaki ulu, po ke kila ai hana mua le, tuga ne lepela ke he kili he hana kakano,
44 Ko e tagata lepela a ia, kua kelea tuai a ia; ti talahau ai he ekepoa kua kelea ni a ia; ko e hana ila lepela ha he hana ulu.
45 Ko e tagata lepela foki ne ha i ai e ila kia hēhē ai hana tau tapulu, ti nakai potiki ai hana ulu, kia ufia ai hana hafe, ti hea ai pehe, Kua kelea, Kua kelea.
46 Ko e tau aho oti ne ha ia ia e ila lepela ke kelea ai a ia; kua kelea ni a ia; kia nofo toko taha a ia, kia nofo ai a ia ki tua he heaga api.
47 Ko e tapulu foki kua ha i ai e ila lepela; po ke tapulu ie fulu mamoe, po ke tapulu ie lino;
48 Kua ha he hala loa he ie, po ke ha he hala ku he ie; ko e ie lino, po ke ie fulu mamoe, po ke kili manu, po ke mena kua eke ai ke he kili manu;
49 Kaeke foki kua ago, po ke kula e ila ke he tapulu, po ke kili manu, (ko e hala loa he ie po ke hala ku he ie,) po ke mena kua eke ai ke he kili manu; ko e ila lepela ni a ia, kia fakakite atu a ia ke he ekepoa.
50 Ti kitekite ai e ekepoa ke he ila, ti puipui ai e ia ke he fale po fitu e mena ne ha i ai e ila.
51 Ti kitekite atu foki a ia ke he mena ne tokai e ila ke he aho fitu; kaeke kua totolo ai e ila ke he tapulu (ke he hala loa he ie, po ke ha he hala ku he ie,) po ke kili manu, ko e ila lepela totolo haia; kua kelea ni e mena ia.
52 Ti huhunu ai e tapulu, po ke ha he hala loa he ie, po ke ha he hala ku he ie, ko e ie fulu mamoe, po ke ie lino, po ke mena kua eke ai ke he kili manu ne ha i ai e ila; ha ko e lepela totolo haia; kia huhunu ai a ia ke he afi.
53 Kaeke ke kitekite atu ai e ekepoa; kitiala foki, kua nakai totolo ai e ila ke he tapulu, (ke he hala loa he ie, po ke hala ku he ie,) po ke tau mena kua eke aki e kili manu;
54 Ti poaki he ekepoa, kia lautolu ke unu e mena ne ha i ai e ila, mo e toka ai foki ke he fale ke he falu a po ne fitu.
55 Kua maeke e tapulu he unu ti kitekite atu e ekepoa ke he mena ne ha i ai e ila; kitiala foki, ka toka gaia e ila nakai kehe, kua nakai totolo foki e ila; kua kelea tuai e mena ia; kia huhunu ai a ia ke he afi, ko e mena totolo haia po ke nakai fulufulu ai ke he ao po ke tua.
56 Kaeke foki ke kitekite ki ai e ekepoa kitiala foki, kua hina uli e ila, ka kua mole tuai he unu, ti hēhē kehe e ia e mena ia mai he tapulu, po ke kili manu, po ke ha he hala loa he ie, po ke ha hala ku he ie.
57 Kaeke foki ke kitia ai agaia ke he tapulu, po ke ha he hala loa he ie, po ke ha he hala ku he ie, po ke ha he tau mena kua eke ai he kili manu; ko e mena totolo ni a ia; kia huhunu ai ke he afi e mena ne ha i ai e ila.
58 Ko e tapulu foki, po ke hala loa he ie, po ke hala ku he ie, po ke tau mena kua eke ai he kili manu, kua unu ti maeke ai e ila, kia liu foki unu e mena ia, ti mea ai a ia.
59 Ko e fakatufono hanā ke he ila lepela ke he tapulu ie fulu mamoe, po ke ie lino, (ko e hala loa he ie, po ke hala ku he ie,) po ke tau mena oti kua eke ai he kili manu, ke talahaua kua mea, po ke talahaua kua kelea.