Levitika 14:1-57
14 KUA vagahau mai e Iehova kia Mose, kua pehe mai,
2 Ko e fakatufono hanai ke he lepela ke he aho he hana fakameaaga, Kia uta ai a ia ke he ekepoa.
3 Ti fano ai e ekepoa ki tua he heaga api, ti kitekite atu e ekepoa, kitiala foki, kua maulu tuai e ila lepela he tagata lepela.
4 Ti fekau atu he ekepoa ke ta mai ai mo e tagata ke fakamea, ko e tau manu lele momoui kua mea ne ua, katoa mo e akau ko e arasi, mo e ie kula, mo e hisopo.
5 Ti poaki atu he ekepoa ke tamate ai taha manu ke he kapiniu kelekele ki luga he vaipuna;
6 Ti uta ai e ia e manu moui, mo e akau ko e arasi, mo e ie kula, mo e isopo, ti fuifui ai e ia a lautolu katoa mo e manu moui ke he toto he manu ne tamate, ki luga he vai moui.
7 Ti pīpī ai e ia lagafitu ke he hana matalima kia ia ke fakamea ai e lepela, ti talahau ai a ia kua mea tuai, ti fakahola atu e manu moui, ke fano ke he vao.
8 Ti unu ai e ia kua fakamea hana tau tapulu, mo e hifi ai hana tau fulu oti, mo e koukou ke he vai ti mea ai a ia; ka mole ia ti fano ai a ia ke he heagaapi, ka e nofo po fitu a ia ki tua he fale ie hana.
9 Ka hoko ke he aho fitu ti hifipuga ai a ia hana lauulu oti, mo e hana hafe, mo e hana tau tua mata, mo e hana tau fulu oti kia hifi ai e ia, ti unu ai e ia hana tau tapulu, mo e koukou ai hana kakano ke he vai, ti mea ni a ia.
10 Ka hoko foki ke he aho valu, ti uta ai e ia ua e punua mamoe tane kua katoatoa e mitaki, mo e taha punua mamoe fifine tau taha kua katoatoa e mitaki, mo e tolu e omera falaoa mitaki kua laku ai mo e lolo, ko eke mo poa mena kai, mo e taha loka he puke lolo.
11 Ko e ekepoa foki ne fakamea a ia, to tuku atu ai e ia e tagata ke fakamea katoa mo e tau mena ia ki mua a Iehova, ke he gutuhala he fale utafano he tutuutaga;
12 Ti uta ai he ekepoa taha punua mamoe tane, mo e ta atu ai ke eke mo poa ha ko e hehe, katoa mo e loka he lolo, ti lialiaki ai e ia ke eke mo poa lialiaki ki mua a Iehova;
13 Ti tamate ai e punua mamoe ke he mena ne tamate ai e poa ha ko e hala mo e poa huhunu ke he mena tapu; ha ko e mena tuga ne poa ha ko e hala kua toka ma e ekepoa ke pihia foki e poa ha ko e hehe; ko e mena tapu ue atu ni a ia.
14 Ti uta ai he ekepoa e maga toto he poa ha ko e hehe ti tuku ai he ekepoa ke he tapunu teliga he teliga matau he tagata ke fakamea ai, mo e matalima motua he hana lima matau, mo e matahui motua he hana hui matau;
15 Ti uta he ekepoa e maga lolo he loka puke lolo, mo e liligi ai ke he aloalolima he lima hema he ekepoa;
16 Ti fufui ai he ekepoa e matalima he hana lima matau ke he maga lolo ha he aloalolima hema hana, mo e pīpī lagafitu ai he lolo ke he hana matalima ki mua a Iehova.
17 Ka ko e maga ne toe he puke lolo ke he hana aloalolima kia tuku ai he ekepoa ke he tapunu teliga matau he tagata ke fakamea, mo e mata lima motua he hana lima matau, mo e matahui motua he hana hui matau, ki luga he toto he poa ha ko e hehe.
18 Ko e maga foki he puke lolo ne toe ke he aloalolima he ekepoa, kia tuku ai ke he ulu he tagata ke fakamea ai, ti eke ai he ekepoa e lukutoto māna ki mua a Iehova.
19 Ti eke foki he ekepoa e poa ha ko e hala, ke eke mo lukutoto ha ko e tagata ke fakamea ai hana kelea; ka mole ia ti tamate foki e poa huhunu.
20 Ti eke ai he ekepoa e poa huhunu, mo e poa mena kai ke he fatapoa, ti eke ai he ekepoa e lukutoto māna, ti mea ai a ia.
21 Kaeke kua nofogati a ia, nakai moua e ia ha mena, ti uta ai e ia taha punua mamoe tane ke eke mo poa ha ko e hehe ke lialiaki ai, ke eke mo lukutoto mana, mo e taha omera he falaoa mitaki kua laku mo e puke lolo ke eke mo poa mena kai, katoa mo e loka he puke lolo.
22 Ko e ua e kulukulu foki, po ke ua e punua lupe, po ke mena fe he na manu ia ke moua ai e ia, ko e taha ke eke mo poa ha ko e hala, ka ko e taha ke eke mo poa huhunu.
23 Ti ta mai foki e ia e tau mena ia ke he ekepoa ke he aho valu mo e hana fakameaaga, ke he gutuhala he fale uta fano he tutuutaga ki mua a Iehova.
24 Ti uta ai he ekepoa e punua mamoe tane he poa ha ko e hehe, katoa mo e loka he puke lolo, ti lialiaki foki he ekepoa e tau mena ia, ko e poa lialiaki ki mua a Iehova;
25 Ti keli ai e punua mamoe tane he poa ha ko e hehe, ti uta ai he ekepoa taha maga toto he poa ha ko e hehe, mo e tuku ai ke he tapunu teliga matau he tagata kua fakamea ai, mo e matalima motua he hana lima matau, katoa mo e matahui motua he hana hui matau;
26 Ti liligi ai he ekepoa taha maga he puke lolo ke he aloalolima he hana lima hema;
27 Ti pīpī aki he ekepoa ke he matalima he hana lima matau mai he magalolo ke he hana aloalolima hema lagafitu ni ki mua a Iehova.
28 Ti tuku ai he ekepoa mai he maga lolo ke he hana aloalolima ke he tapunu teliga matau he tagata ke fakamea ai, mo e matalima motua he hana lima matau, katoa mo e matahui motua he hana hui matau ke he mena ne tokai e toto he poa ha ko e hehe;
29 Ka ko e maga lolo kua toe ke he aloalolima he ekepoa, kia tuku atu ai ke he ulu he tagata ke fakamea ai, ke eke mo lukutoto māna ki mua a Iehova.
30 Ti uta ai e ia taha kulukulu, po ke taha punua lupe, po ke mena fe he na manu ia ke moua ai e ia;
31 Po ke mena fe he na manu ia kua moua ai e ia, ko e taha ke eke mo poa ha ko e hala, mo e taha ke eke mo poa huhunu, katoa mo e poa mena kai; ti eke ai he ekepoa e lukutoto ki mua a Iehova ha ko ia kua fakamea ai.
32 Ko e fakatufono hana kia ia ne ha i ai e ila lepela, ti nakai maeke a ia ke moua e tau mena kua lata mo e hana fakameaaga.
33 Kua vagahau mai foki a Iehova kiaMose mo Arona, kua pehe mai,
34 Ka hohoko atu a mutolu ke he motu ko Kanana kua ta atu ai e au kia mutolu ke eke ma mutolu, ti tuku atu e au e ila lepela ke ha taha fale ke he motu kua eke ma mutolu;
35 Ti fano ai a ia hana e fale mo e tala age ke he ekepoa, kua pehe age, Kua kitia e au e mena tuga ne ila ke he haku fale.
36 Ti fekau he ekepoa a lautolu ke āu kehe ai e tau mena he fale, to hu atu e ekepoa ke he fale ke kitekite ke he ila, neke kelea ai e tau mena oti ha he fale: ka mole ia ti hu atu ai e ekepoa ke kitekite ke he fale;
37 Ti kitekite ai a ia ke he ila, kitiala foki, kaeke kua ha ha he tau kau fale e ila, ko e mena pokopoko ago, po ke kula, kua tuga ne mena kua tomo hifo ke he kaufale;
38 Ti hu mai e ekepoa he gutuhala he fale, mo e papa ai e fale ke he tau po ne fitu.
39 Ti liu foki e ekepoa ke he aho fitu ke kitekite ai; kitiala foki, kaeke kua totolo e ila ke he tau kaupa he fale,
40 Ti pehe atu e ekepoa, ke uta kehe ai e lautolu e tau maka ne ha i ai e ila, mo e tolo ki tua he maga ke he mena kelea;
41 Ti pehe atu foki a ia, ke vouvou takai e fale i loto, kia uta kehe foki e lautolu e kelekele kua mokulu hifo he vouvou ke he mena kelea ki tua he maga.
42 Ti uta ai e lautolu falu a maka ke totogi aki e tau maka ia, ti uta foki e lautolu e puga kehe ke vali aki e fale.
43 Kaeke foki ke liuaki e ila mo e papa ai ke he fale, ka kua oti he uta kehe ai e tau maka, kua oti foki he vouvou e fale, kua oti foki he vali;
44 Ti fano e ekepoa mo e kitekite ki ai, kitiala foki, kaeke kua totolo e ila ke he fale ko e lepela totolo haia; kua kelea ni a ia.
45 Ti ulu ai e ia e fale, ko e hana tau maka, mo e hana tau akau, katoa mo e puga oti he fale, ti uta kehe ai ki tua he maga ke he mena kelea.
46 Ko ia foki kua hu atu ke he fale ke he tau aho oti kua papa ai, to kelea ai a ia ato hoko ke he afiafi.
47 Ko ia foki kua takoto ke he fale ia, to unu ai e ia hana tau tapulu; ko ia foki kua kai mena ai ke he fale ia, to unu ai e ia hana tau tapulu.
48 Kaeke ke hu atu ai e ekepoa ke he fale, mo e kitekite ki ai, kitiala foki, kua nakai totolo ai e ila he he fale tali he vali e fale; ti talahau ai he ekepoa kua mea tuai e fale, ha kua maeke tuai e ila.
49 Ti uta ai e ia ua e manu, mo e akau ko e arasi, mo e ie kula, katoa mo e hisopo ke fakamea ai e fale.
50 Ti keli ai e ia taha manu ke he kapiniu kelekele ki luga he vaipuna;
51 Ti uta ai e ia e akau ko e arasi, mo e hisopo, mo e ie kula, katoa mo e manu moui, mo e fuifui ai a lautolu ke he toto he manu kua tamate, mo e vaipuna, ti pīpīaki lagafitu ke he fale.
52 Ti fakamea ai e ia e fale ke he toto he manu mo e vaipuna, mo e manu moui, mo e akau ko e arasi, mo e hisopo, katoa mo e ie kula;
53 Ti fakahola atu e ia e manu moui ki tua he maga ke he vao, ti eke ai e ia e lukutoto ma e fale, ti mea ai a ia.
54 Ko e fakatufono hanā ke he tau ila lepela oti kana, katoa mo e gagao matafune,
55 Mo e ila lepela ke he tapulu, mo e fale,
56 Mo e gagao fufula, mo e matafune, mo e ila kikila ke he kakano;
57 Ke fakaako mai ai hana kelea, mo e hana mea; ko e fakatufono hana ke he lepela.