Levitika 15:1-33
15 KUA vagahau mai foki e Iehova kia Mose mo Arona, kua pehe mai,
2 Kia vagahau atu a mua ke he fanau a Isaraela mo e pehe atu kia lautolu, Kaeke ke ha he tagata e gagao pela ke he hana tino, kua kelea ai a ia ha ko e hana gagao.
3 Ko e hana kelea foki ke he hana gagao hanai, po ke hihina ai e pela ke he hana kakano, po ke ponotia e pela ti nakai hihina ai ke he hana kakano, ko e hana kelea ni a ia.
4 Ko e tau mohega oti ka takoto ai a ia ne ha i ai e gagao pela kua kelea ia, ko e tau mena oti foki ka nofo ai a ia kua kelea ni a ia.
5 Ko e tagata foki kua pipiki ke he mohega, kia unu e ia hana tau tapulu, mo e koukou ke he vai, ti kelea ni a ia ato hoko ke he afiafi.
6 Ko e tagata foki kua nofo ki luga he mena ne nofo ai a ia ne ha i ai e gagao pela, kia unu e ia hana tau tapulu, mo e koukou ai a ia ke he vai, ti kelea ni a ia ato hoko ke he afiafi.
7 Ko ia foki kua pipiki atu ke he kakano hana ne ha i ai e gagao pela, kia unu e ia hana tau tapulu, mo e koukou ke he vai, ti kelea ni a ia ato hoko ke he afiafi.
8 Kaeke foki ke anu atu e ia ha i ai e gagao pela ke he tagata kua mea, kia unu ai e ia hana tau tapulu, mo e koukou ke he vai, ti kelea ni a ia ato hoko ke he afiafi.
9 Ko e nofoa solofanua foki kua heke ai e ia ha i ai e gagao pela, kua kelea ni a ia.
10 Ko ia foki kua pipiki atu ke he tau mena ha i lalo ia ia, kua kelea ai a ia ato hoko ke he afiafi; ko ia foki kua uta taha mena he tau mena ia, kia unu ai e ia hana tau tapulu, mo e koukou ke he vai, ti kelea ni a ia ato hoko ke he afiafi.
11 Ko e tagata foki ke pipiki atu ki ai e ia ha ha i ai e gagao pela ka e nakai holoholo ai hana tau lima ke he maga vai, kia unu ai e ia hana tau tapulu, mo e koukou ai ke he vai, ti kelea ni a ia ato hoko ke he afiafi.
12 Ko e kapiniu kelekele foki kua pipiki atu ki ai e ia ha i ai e gagao pela kia lipilipi ai a ia; ko e tau kapiniu lakau oti foki kia fuifui ai ke he vai.
13 Kaeke foki kua fakamea a ia ha ha i ai e gagao pela he hana gagao; ti totou ai e ia po fitu ke lata mo e hana fakameaaga, ti unu ai e ia hana tau tapulu, mo e koukou ai hana kakano he he vai puna, ti mea ai a ia.
14 Ko e aho valu foki kia uta ai e ia ua e kulukulu, po ke ua e punua lupe, ti fina atu ai a ia ki mua a Iehova ke he gutuhala he fale uta fano he tutuutaga, mo e ta atu ai a ia ke he ekepoa.
15 Ti taute ai he ekepoa ia, ko e taha ke eke mo poa ha ko e hala, ka ko e taha ke eke mo poa huhunu; ti eke ai he ekepoa e lukutoto māna ki mua a Iehova, ha ko e hana gagao pela.
16 Ko e tane foki kaeke ke pa ai e puke vai he hana tino, kia koukou a ia hana tino katoa ke he vai, ti kelea ai a ia ato hoko ke he afiafi.
17 Ko e tau tapulu oti foki, mo e tau kili manu oti, ha ha i ai e puke vai he tino kia unu ia, ti kelea foki a ia ato hoko ke he afiafi.
18 Ko e fifine foki ka mohe mo e tane, kua ha i ai e puke vai he tino kia koukou ai a laua ke he vai, ti kelea ni a laua ato hoko ke he afiafi.
19 Ko e fifine foki, ha ha i ai e gagao ke he hana kakano, ko e gagao fifine foki haia, kia nofo kehe a ia ke he tau po ne fitu; ko ia foki kua pipiki atu kia ia, to kelea ni a ia ato hoko ke he afiafi.
20 Ko e tau mena oti ka takoto ai a ia kua nofo kehe, kua kelea ia, ko e tau mena oti foki ka nofo ai a ia, kua kelea tuai a ia.
21 Ko ia foki kua pipiki atu ke he hana mohega, kia unu ai e ia hana tau tapulu, mo e koukou ai a ia ke he vai ti kelea ai a ia ato hoko ke he afiafi.
22 Ko e tagata foki kua pipiki atu ke he tau mena ne nofo ai a ia, kia unu e ia hana tau tapulu, mo e koukou ai a ia ke he vai, ti kelea ai a ia ato hoko ke he afiafi.
23 Ko e mena ha i luga he mohega po ke tau mena ne nofo ai a ia, kaeke ke pipiki ki ai e taha, ti kelea ai a ia ato hoko ke he afiafi.
24 Kaeke foki ke momohe ai a laua mo e tane, ke hoko atu hana kelea kia ia, ti kelea ai a ia ke he tau po ne fitu; kua kelea foki e tau mohega oti ka takoto ai a ia.
25 Kaeke foki ke gagao e fifine he fakatafea ke he tau aho loga, ka e nakai ko e tau aho he hana nofo kehe ai, po ke gagao agaia ka e mole atu e tau aho he hana nofo kehe; kua kelea ni a ia ke he tau aho oti he hana gagao fakatafea, tuga ne kelea ai a ia he tau aho oti ne nofo kehe ai a ia he gagao fifine.
26 Ko e tau mohega oti ka takoto ai a ia ke he tau aho oti he hana gagao fakatafea, to eke ia ke tuga ne mohega he hana nofo kehe; ko e tau mena oti ka nofo ai a ia, kua kelea ia, tuga ne kelea he hana nofo kehe.
27 Ko ia foki ka pipiki atu ke he tau mena ia, to kelea ni a ia, kia unu foki e ia hana tau tapulu, mo e koukou ai ke he vai, ti kelea ai a ia ato hoko ke he afiafi.
28 Kaeke foki kua fakamea a ia he hana gagao fakatafea, ti totou ai e ia kia ia po fitu, ka mole atu ia, ti mea ai a ia.
29 Ko e aho valu foki kia uta e ia ua e kulukulu, po ke ua e punua lupe, mo e ta mai ai ke he ekepoa ke he gutuhala he fale uta fano he tutuutaga.
30 Ti taute ai he ekepoa taha ke eke mo poa ha ko e hala, mo e taha ke eke mo poa huhunu; ti eke ai he ekepoa e lukutoto mana ki mua a Iehova, ha ko e hana gagao fakatafea ne kelea ai a ia.
31 Kia eke pihia e mutolu ke vevehe kehe ai e fanau a Isaraela, mai he tau mena ke kelea ai a lautolu; neke mamate ai a lautolu ke he ha lautolu a kelea, ka fakakelea ai e lautolu haku a faituga ha ha ia lautolu.
32 Ko e fakatufono hanā kia ia ha i ai e gagao pela, katoa mo ia kua pa ai e puke vai he hana tino, ti kelea ai a īa,
33 Katoa mo ia ha i ai e gagao fifine, katoa mo ia ha i ai e gagao pa, ko e tane, po ke fifine, ko e tane foki kua mohe mo e fifine ka kua ha ia ia hana kelea.