Levitika 16:1-34
16 KUA vagahau mai foki e Iehova kia Mose, ka kua mole atu e mamate he na tama tane tokoua a Arona, he ekepoa atu e laua ki mua a Iehova, mo e mamate ai a laua.
2 Kua pehe mai a Iehova kia Mose, Kia vagahau atu a koe kia Arona hau a matakainaga, neke hu atu a ia ke he tau aho oti ke he mena tapu ke he fahi atu he ie puipui, ki mua he haeleaga he fakaalofa noa, ha ha i luga he puha; neke mate ai a ia, ha ko e mena fakakite atu ai au ke he aolagi ki luga he haeleaga he fakaalofa noa.
3 Kia hu atu pehe a Arona ke he mena tapu, kia uta ai e ia e punua povi tane ke eke mo poa ha ko e hala, mo e mamoe tane ke eke mo poa huhunu.
4 Ti fakatapulu ai a ia ke he tapulu loto he ie lino tapu, ti ha he kakano hana e fihui ie lino, ti pipi ai a ia ke he pipi ie lino, mo e fakapotiki ai a ia ke he potiki ie lino; ko e tau tapulu tapu haia, ko e mena ia kia koukou ai hana tino ke he vai, to fakatapulu ai a ia.
5 Ti uta e ia mai he fakapotopotoaga he fanau a Isaraela, ua e koti tane ke eke mo poa ha ko e hala, mo e taha mamoe tane ke eke mo poa huhunu.
6 Ti uta foki e Arona māna e punua povi tane ke eke mo poa ha ko e hala ti eke ai e ia e lukutoto ha ko ia, katoa mo e hana magafaoa.
7 Ti uta foki e ia e na koti tane ua, mo e tuku atu ai ki mua a Iehova ke he gutuhala he fale uta fano he tutuutaga.
8 Ti eke ai e Arona e vili ke he na koti ua ia; ko e taha vili ma Iehova, ti taha foki e vili ma e koti ko e tuku atu ne fai ke fano.
9 Ti uta e Arona e koti ne to ki ai e vili a Iehova, mo e eke ai a ia mo poa ha ko e hala.
10 Ka ko e koti ne to ki ai e vili he koti ke tuku atu ke fano, kia tuku atu moui a ia ki mua a Iehova, ke eke ai a ia mo lukutoto, ti tuku atu a ia ke eke mo koti ke hola atu ke he vao.
11 Ti uta ai e Arona e punua povi tane ke eke mo poa ha ko e hala māna, ti eke ai e ia e lukutoto ha ko ia, katoa foki mo e hana magafaoa; ti keli ai e ia e punua povi tane he poa ha ko e hala mana.
12 Ti uta foki e ia e mena uta afi kua puke ke he tau malala kaka he afi mai he fatapoa ki mua a Iehova, mo e hana na lima kua puke ke he mena manogi ne tukituki fakavalavala, ti uta foki ia ke he fahi atu he ia puipui.
13 Ti tuku ai e ia e mena manogi ki luga he afi ki mua a Iehova, kia ufia e haeleaga he fakaalofa noa ha i luga he puha he fakatufono ke he ahua mai he mena manogi, neke mate ai a ia.
14 Ti uta foki e ia taha maga toto he punua povi tane, mo e pīpī ai ke he hana matalima e haeleaga he fakaalofa noa ke he hana fahi uta; ti pīpī ai lagafitu foki he maga toto ke he hana matalima ki mua he haeleaga he fakaalofa noa.
15 Ti keli e ia e koti he poa ha ko e hala ma e motu, ti uta ai e ia hana toto ke he fahi atu he ie puipui, ti eke foki ke he toto hana tuga ne eke ke he toto he punua povi tane, kia pīpī ai ki luga he haeleaga he fakaalofa noa, ti pīpī foki ki mua he haeleaga he fakaalofa noa.
16 Ti eke ai pihia e ia e lukutoto ma e mena tapu, ha ko e kelea he fanau a Isaraela, ha ko e tau holifono ha lautolu, he ha lautolu a tau hala oti; kia eke pihia foki e ia ha ko e fale uta fano he tutuutaga, kua toka mau ia lautolu, ke he ha lautolu a kelea.
17 Aua neke ha i ai ha tagata ke he fale uta fano he tutuutaga ka hu atu a ia ke he mena tapu ke eke ai e lukutoto, ato hu ki fafo a ia, ato oti foki he eke e ia e lukutoto ha ko ia, mo e hana magafaoa, katoa foki mo e fakapotopotoaga oti a Isaraela.
18 Ti fano ai a ia ki fafo ke he fatapoa ha i mua a Iehova, ti eke ai e lukutoto ha ko e fatapoa, ti uta e ia e maga toto he punua povi tane, mo e maga toto he koti, mo e tuku takai ai ke he tau hoe he fatapoa.
19 Ti pīpī lagafitu ai e ia (e maga toto ke he hana matalima) ke he hana fugaluga ti fakamea ai, mo e fakatapu ai e fanau a Isaraela mai he kelea ha lautolu.
20 Kua oti foki e lukutoto he eke e ia ha ko e mena tapu, mo e fale uta fano he tutuutaga, mo e fatapoa, ti ta mai ai e ia e koti moui;
21 Ti fakalago ai e Arona hana na lima ua ke he ulu he koti moui, mo e talahau ai ki luga hana e tau mahani kelea oti he fanau a Isaraela, mo e tau holifono oti ha lautolu he tau hala oti ha lautolu, ke fakatoka ai ke he ulu he koti, ti tuku atu e koti ke he lima he tagata kua taute ai ke uta a ia ke he vao.
22 Ti uta ai he koti ki luga hana e tau mahani kelea oti ha lautolu ke he motu nakai nofo ai taha, ti fakafano atu e ia e koti ke he vao.
23 Ti hu atu ai a Arona ke he fale uta fano he tutuutaga, ti aki ai e ia e tau tapulu ie lino ne tapulu ai a ia he hu atu a ia ke he mena tapu, ti toka ia ke he mena ia.
24 Ti koukou ai hana tino ke he vai, ke he mena tapu, mo e fakatapulu e ia a ia ke he hana tau tapulu, ti hu atu a ia, mo e eke ai e poa huhunu māna mo e poa huhunu foki ma e motu, ti eke ai foki e lukutoto ha ko ia katoa foki mo e motu.
25 Ko e gako foki he poa ha ko e hala kia huhunu ai e ia ke he fatapoa.
26 Ko ia foki ne fakafano atu e koti ke eke mo koti kua tuku atu ke fano, kia unu e ia hana tau tapulu, mo e koukou ai hana tino ke he vai, ka mole ia ti fina atu ai a ia ke he heaga api.
27 Ko e punua povi tane foki he poa ha ko e hala, mo e koti he poa ha ko e hala, ko e ha laua a toto ne uta ai ke he mena tapu ke eke mo lukutoto, kia uta ia ki tua he heaga api; ti huhunu ai e lautolu ke he afi ha laua a tau kili, mo e ha laua a tau tino, mo e ha laua a faliu.
28 Ko ia foki ne huhunu e tau mena ia, kia unu e ia hana tau tapulu, mo e koukou ai hana tino ke he vai, ka mole ia ti fina atu ai a ia ke he heaga api.
29 Ko e fakatufono tukulagi kia mutolu hanai, ka hoko ke he mahina fitu, ko e aho hogofulu he mahina ia, ti fakamamahi ai e mutolu a mutolu, aua neke eke ai e mutolu ha gahua, po ke tagata ne fanau ai ke he motu, po ke tagata kehe kua nofo ia mutolu;
30 Ha ko e aho ni a ia ke eke ai e lukutoto ma mutolu ke fakamea a mutolu, kia mea ai a mutolu ki mua a Iehova he tau hala oti kana.
31 Ko e sapati haia ke okioki ai a mutolu, kia fakamamahi ai e mutolu a mutolu, ko e fakatufono tukulagi haia.
32 Ko e ekepoa foki ke fakauku ai e ia, mo e fakatu e ia ke eke ai e gahua he ekepoa ke hukuiaki hana matua, kia eke ai e ia e lukutoto, ti fakatapulu foki a ia ke he tau tapulu ie lino, ko e tau tapulu tapu haia.
33 Ti eke foki e ia e lukutoto ha ko e faituga, ti eke foki e ia e lukutoto ha ko e fale uta fano he tutuutaga, mo e fatapoa, ti eke foki e ia e lukutoto ha ko e tau ekepoa katoa foki mo e tau tagata oti he fakapotopotoaga.
34 Ko e fakatufono tukulagi kia mutolu hanai, ke eke ai takilaga taha ke he tau tau oti e lukutoto ma e fanau a Isaraela ha ko e tau hala oti ha lautolu. Ti eke ni e ia tuga ne poaki mai ai e Iehova kia Mose.