Levitika 17:1-16
17 KUA vagahau mai foki e Iehova kia Mose, kua pehe mai,
2 Kia vagahau atu a koe kia Arona, mo e hana tau tama tane, katoa foki mo e fanau oti a Isaraela, ti pehe atu a koe kia lautolu, Ko e mena hanai kua poaki mai e Iehova, kua pehe mai.
3 Kaeke ke keli he tagata he magafaoa a Isaraela e povi tane, po ke punua mamoe, po ke koti, ke he heaga api, po ke keli ai ki tua he heagaapi;
4 Ka e nakai ta mai ke he gutuhala he fale uta fano he tutuutaga ke ta mai ai e poa kia Iehova, ki mua he faituga a Iehova, to talahau ai ke he tagata ia e toto kua maligi kua fakamaligi toto e ia; to vevehe kehe e tagata ia mo e hana motu,
5 Kia ta mai ai he fanau a Isaraela ha lautolu a tau poa ko e tau poa kua eke ai e lautolu ke he vao, kia ta mai e lautolu ia kia Iehova ke he gutuhala he fale uta fano he tutuutaga ke he ekepoa, ti eke poa ai e lautolu, ko e tau poa fakaaue ia kia Iehova.
6 Ti pīpī ai he ekepoa e toto ki luga he fatapoa a Iehova ke he gutuhala he fale uta fano he tutuutaga, ti huhunu ai foki e gako ke eke mo mena manogi kia Iehova.
7 Ti aua neke liliu ekepoa ai e lautolu ke he tau atua pikopiko ne mumui atu ki ai a lautolu ke faivao ai; ko e fakatufono tukulagi hanā kia lautolu, ke he ha lautolu a tau hau a mui.
8 Ti pehe atu a koa kia lautolu, Kaeke ko e tagata Isaraela, po ke tagata kehe kua nofo ia mutolu, kua eke ai e poa huhunu, po ke taha poa,
9 Ka e nakai ta mai ke he gutuhala he fale uta fano he tutuutaga ke eke ai kia Iehova, to vevehe kehe e tagata ia mo e hana motu.
10 Kaeke ko e tagata Isaraela, po ke tagata kehe kua nofo ia mutolu, kua kai e maga toto, to eke e au e tagata ia ne kai e toto mo fi haku, to vevehe kehe e au e tagata ia mo e hana motu.
11 Ka ko e toto ko e moui he tino haia, kua tuku atu foki e au ia ke eke mo lukutoto ma mutolu ki luga he fatapoa; ha ko e toto ni ke eke mo lukutoto ma e tagata.
12 Ko e mena ia ne pehe atu au ke he fanau a Isaraela, Aua neke kai he taha ia mutolu e toto, ti aua neke kai toto foki e taha tagata kehe kua nofo ia mutolu.
13 Ko e tagata foki he fanau a Isaraela po ke tagata kehe kua nofo ia mutolu, ka moua e ia e manu he vao he tutuli, po ke manu lele kua kai; kia liligi ai e ia hana toto, mo e ufiufi ai ke he kelekele.
14 Ka ko e moui ni a ia he tau mena momoui oti; ko e toto ha lautolu, ko e ha lautolu a moui haia; ko e mena ia ne pehe atu ai au ke he fanau a Isaraela, Aua neke kai e mutolu e toto he tau mena momoui; ha ko e moui he tau mena oti, ko e ha lautolu a toto haia; kaeke ke kai ai he taha ia to vevehe kehe ni a ia.
15 Ko e tagata foki kua kai e mena ne mate noa, po ke mena ne hēhē, po ke tagata he motu a ia, po ke tagata kehe, kia unu ai e ia hana tau tapulu, mo e koukou ke he vai, to kelea foki a ia ato hoko ke he afiafi; ti mea ai a ia.
16 Kaeke foki ke nakai unu e ia hana tau tapulu, mo e koukou ai hana tino, ti nofo ni a ia mo e kelea.