Levitika 20:1-27
20 KUA vagahau mai foki a Iehova kia Mose, kua pehe mai,
2 Kia pehe atu a koe ke he fanau a Isaraela, Kaeke ke ta atu ai he tagata hana fanau kia Moloka, po ke tagata he fanau a Isaraela, po ke tagata kehe kua nofo i Isaraela; to kelipopo ni a ia; to pinimaka he tau tagata he motu a ia ke he tau maka.
3 To eke foki e au e tagata ia mo fi haku, mo e vevehe kehe e au a ia mo e hana motu; ha kua ta atu e ia hana fanau kia Moloka, ke fakakelea ai haku a faituga, mo e holitu ai e ia haku a higoa tapu.
4 Kaeke foki ke ufiufi he tau tagata he motu ha lautolu a tau mata neke kitia e lautolu e tagata ka ta atu ai e ia hana fanau kia Moloka, ti nakai tamate e lautolu a ia;
5 Ti eke ai e au e tagata ia, katoa foki mo e hana magafaoa mo tau fi haku, ti vevehe kehe e au a lautolu mo e motu ha lautolu, ko ia mo lautolu oti ni kua mumui atu kia ia ke faivao ai mo Moloka.
6 Ko e tagata foki ke hagao atu kia lautolu ne ha i ai e tau agaga talahau tuai, mo e tau taulatua, ke mui atu ki ai mo e faivao ai, to eke e au e tagata ia mo fi haku, to vevehe kehe foki e au a ia mo e haku motu.
7 Kia fakatapu e mutolu a mutolu, ti tapu ai a mutolu; ha ko au ko Iehova ko e ha mutolu a Atua.
8 Ti taofi e mutolu haku tau fakatufono, mo e eke ai; ko au ko Iehova kua fakatapu a mutolu.
9 Kaeke ke kaialu e taha ke he hana matua tane po ke hana matua fifine to kelipopo ni a ia; kua kaialu tuai e ia hana matua tane po ke hana matua fifine; to ha i luga hana hana toto.
10 Ko e tagata foki kua faivao mo e hoana he taha tagata, ko ia kua faivao mo e hoana he tagata kua katofia mo ia, to kelipopo ni a laua tokoua, ko e tane kua faivao mo e fifine kua faivao.
11 Ko e tagata foki ka momohe a laua mo e hoana he hana matua, kua hu atu a ia ke he kafu he hana matua; to kelipopo ni a laua; to ha i luga kia laua ha laua a toto.
12 Kaeke foki ke mohe e tagata mo e hoana he hana tama, to kelipopo ni a laua; ko e mena kelea ue atu kua eke e laua; to ha i luga kia laua ha laua a toto.
13 Kaeke foki ke momohe e tane mo e taha tane, tuga ne momohe e tane mo e fifine, kua eke e laua a mena fakalialia; to kelipopo ni a laua; to ha i luga kia laua ha laua a toto.
14 Kaeke foki ke faihoana e tagata ke he fifine, katoa mo e matua he fifine, ko e mahani kelea lahi haia; kia huhunu ai a lautolu ke he afi, ko ia katoa foki mo laua; ke aua neke ha ia mutolu e mahani kelea ia.
15 Kaeke foki he momohe e tagata mo e manu, to kelipopo ni a ia; ti tamate foki e mutolu e manu.
16 Kaeke foki ke fakatata atu e fifine ke he manu ke momohe a laua mo ia, ti tamate e mutolu e fifine katoa mo e manu; to kelipopo ni a laua; to ha i luga kia laua ha laua a toto.
17 Kaeke foki ke tapaki he tagata hana mahakitaga, ko e tama he hana matua tane, po ke tama he hana matua fifine, mo e kitia e ia a ia kua nakai felevehi, ti kitia foki he fifine a ia kua nakai felevehi; ko e mena kelea ni a ia; to vevehe kehe ni a laua ki mua he tau tagata he motu ha laua; kua fakanofonoa e ia hana mahakitaga; to nofo a ia mo e kelea.
18 Kaeke ke momohe e tane mo e fiifne ha ha i ai e gagao, ke fakanofonoa e ia a ia; kua fakatokanoa ai e ia e puna he hana toto, ko e fifine foki kua fakakite atu e ia e puna he hana toto; to vevehe kehe ni a laua mo e ha laua a motu.
19 Aua neke fakanofonoa e koe e matakainaga he hau a matua fifine, po ke mahakitaga he hau a matua tane; ha ko e fakanofonoa e tagata he hana magafaoa haia; to nonofo ni a laua mo e kelea.
20 Kaeke ke mohe e tagata mo e hoana he matakainaga he hana matua tane, kua fakanofonoa e ia e matakainaga he hana matua tane; to nonofo mo e hala a laua; to mamate ni a laua mo e nakai fai tama.
21 Kaeke foki ke fai hoana e tagata ke he hoana he hana matakainaga, ko e mena kelea haia; kua fakanofonoa ai e ia hana matakainaga; nakai ni fai tama a laua.
22 Ko e hanai, kia taofi e mutolu haku tau fakatufono, mo e haku tau fakafiliaga, mo e eke ai e mutolu; neke fakalua atu a mutolu he motu kua takitaki atu e au a mutolu ki ai ke nonofo ai a mutolu.
23 Aua neke eke e mutolu e tau mahani he tau motu ne vega e au mai mua ia mutolu; ha ko e tau mena ia ne eke e lautolu, ti vihiatia ai e au a lautolu.
24 Ka kua pehe atu au kia mutolu, Ke eke e mutolu ha lautolu a kelekele, to foaki atu foki e au kia mutolu, ke eke mo tufaaga ha mutolu, ko e motu kua tafe ai e puke huhu mo e meli; ko au ko Iehova ko e ha mutolu a Atua, kua vevehe kehe tuai e au a mutolu mo e tau motu oti.
25 Kia mailoga ai foki e mutolu e tau manu huifa kua mea, mo e tau manu kua kelea, ko e tau manu lele foki kua kelea mo e tau manu lele kua mea; ua fakakelea e mutolu a mutolu ke he tau manu huifa, mo e tau manu lele, mo e tau mena oti kua totolo ke he kelekele, kua fakamailoga tuai e au ke eke mo mena kelea kia mutolu.
26 Ka kia tapu a mutolu māku; ha ko au ko Iehova kua tapu ni au, kua vevehe kehe tuai foki e au a mutolu mo e tau motu oti, kia eke a mutolu māku.
27 Ko e tagata po ke tane po ke fifine ne ha i ai e agaga talahau tuai, po ke tagata kua eke mo taulātua, kia kelipopo ni a ia; to pinimaka e lautolu a lautolu ke he tau maka; to ha i luga kia lautolu ha lautolu a toto.