Levitika 23:1-44
23 KUA vagahau mai foki a Iehova kia Mose, kua pehe mai,
2 Kia vagahau a koe ke he fanau a Isaraela, ti pehe atu a koe kia lautolu, Ko e tau galue ke fakamatala ai e mutolu, ko e tau fakapotopotoaga tapu, ko e tau galue ke eke kia au haia.
3 Ono ni e aho ke eke gahua ai, ka ko e aho fitu, ko e sapati haia ke okioki ai, ke eke ai e fakapotopotoaga tapu, ua eke ai e mutolu ha gahua taha; ko e sapati kia Iehova haia ke he tau mena oti kua nonofo ai a mutolu.
4 Ko e tau galue nai kia Iehova, ko e tau fakapotopotoaga tapu, kia fakamatala ai e mutolu ke he tau aho kua kotofa ai a lautolu.
5 Ko e mahina fakamua, ko e aho hogofulu ma fa he mahina, ko e afiafi, ko e paseka kia Iehova haia.
6 Ko e aho hogofulu ma lima he mahina ko e galue kia Iehova haia he areto nakai fakaea; ko e tau aho ne fitu ke kai ai e areto nakai fakaea.
7 Ko e aho fakamua kia eke ai e mutolu e fakapotopotoaga tapu, ua eke ai e mutolu ha gahua mamafa.
8 Ka kia uta ai e mutolu e tau poa kua eke ke he afi kia Iehova ke he tau aho ne fitu; ko e aho fitu ko e fakapotopotoaga tapu haia; ua eke ai e mutolu ha gahua mamafa.
9 Kua vagahau mai foki a Iehova kia Mose, kua pehe mai,
10 Kia vagahau a koe ke he fanau a Isaraela mo e pehe atu a koe kia lautolu, ka hohoko atu a mutolu ke he motu kua foaki atu e au ma mutolu, mo e helehele ai e tau saito, kia uta e mutolu taha fuhi saito he tau fua uluaki he heleheleaga ke he ekepoa.
11 Ti lialiaki e ia e fuhi saito ki mua a Iehova, kia talia ia ma mutolu; ko e aho fakamua ka hili he sapati ke lialiaki ai he ekepoa.
12 Ko e aho foki kua lialiaki ai e fuhi saito, kia uta ai e mutolu e mamoe tane tau taha kua katoatoa e mitaki, ke eke mo poa huhunu kia Iehova.
13 Ko e poa mena kai foki ke lata ai, ko e ua e omeri he falaoa mitaki kua laku mo e lolo, ko e poa kua eke ke he afi kia Iehova, ko e mena manogi mitaki; ko e poa inu foki ke lata ai, ko e maga ne fa aki e hinu he uaina.
14 Aua neke kai foki e mutolu e maga areto, po ke tau fua saito tunu, po ke tau fua saito mata ato hoko ke he aho ke ta mai ai e mutolu e poa ke he ha mutolu a Atua; ko e fakatufono tukulagi haia ke he tau hau ha mutolu a mui, ke he ha mutolu a tau mena oti kua nonofo ai a mutolu.
15 Kia totou e mutolu ke kamata mai he aho fakamua ka hili e sapati, ko e aho ne ta mai ai e mutolu e fuhi saito he poa lialiāki; kia katoatoa ai e tau sapati ne fitu;
16 Kia totou e mutolu ke kamata mai he aho fakamua ka hili e sapati ne fitu aki, e po limagofulu; ti ekepoa ai e mutolu ke he poa mena kai fou kia Iehova.
17 Ti ta mai e mutolu he tau fale ha mutolu e tau areto lialiāki, ua e fua, kua takiua e omera, kua eke ke he falaoa mitaki, kua tunu mo e mena ke fakaeaaki, ko e tau mena he tau fua uluaki kia Iehova haia.
18 Kia ta mai foki e mutolu fakalataha mo e tau areto fitu e punua mamoe, ko e tau punua tau taha to katoatoa e mitaki a lautolu, katoa foki mo e taha punua povi tane, mo e ua e mamoe tane, ke eke mo poa huhunu kia Iehova, katoa foki mo e poa mena kai ke lata ai, mo e poa inu ke lata ai, ko e poa haia kua eke ke he afi, ko e mena manogi mitaki kia Iehova.
19 Ti ekepoa ai e mutolu ke he koti tane taha, ke eke mo poa ha ko e hala, katoa mo e ua e punua mamoe tau taha ke eke mo poa fakaaue.
20 Ti lialiaki ai he ekepoa e tau mena ia katoa mo e areto he tau fua uluaki, ke eke mo poa lialiaki ki mua a Iehova, katoa foki mo e ua e punua mamoe; to tapu e tau mena ia kia Iehova, ma e ekepoa.
21 Kia fakamatala ai e mutolu ke he aho ia ke eke ai e mutolu e fakapotopotoaga tapu; aua neke eke ai e mutolu ha gahua mamafa; ko e fakatufono tukulagi haia ke he ha mutolu a tau mena oti kua nonofo ai, ke he tau hau ha mutolu a mui.
22 Ka helehele foki e mutolu e tau saito he tau fonua ha mutolu, aua neke helehele oti pito he tau kalakala he hau a fonua ka helehele ai; ti ua okooko e mutolu e tau fua saito kua mokulu ke he kelekele, ka e tokai ia mo e tau tagata nonofogati mo e tau tagata kehe; ko au ko Iehova ko e ha mutolu a Atua.
23 Kua vagahau mai foki a Iehova kia Mose, kua pehe mai,
24 Kia vagahau a koe ke he fanau a Isaraela, ti pehe atu a koe kia lautolu, Ko e mahina fitu, ko e aho fakamua he mahina, kia eke ai e mutolu e sapati, ko e fakamanatuaga ke he tau pu kua ulo, ko e fakapotopotoaga tapu.
25 Aua neke eke ai e taha ha gahua mamafa, ka kia uta ai e mutolu e poa kua eke ke he afi kia Iehova.
26 Kua vagahau mai foki a Iehova kia Mose, kua pehe mai,
27 Ko e aho hogofulu he mahina fitu, ko e aho ke eke ai e lukutoto haia; ko e fakapotopotoaga tapu kia mutolu haia; kia fakamamahi ai e mutolu a mutolu, mo e uta ai e poa kua eke ke he afi kia Iehova.
28 Aua neke eke ai he taha ha gahua ke he aho ia; ha ko e aho he lukutoto haia, ke eke ai e lukutoto ma mutolu ki mua a Iehova ha mutolu a Atua.
29 Kaeke foki ke nakai fakamamahi he tagata a ia ke he aho ia, to vevehe kehe ni a ia mo e hana motu.
30 Kaeke foki ke eke ai he tagata ha gahua taha ke he aho ia, to fakaoti e au e tagata ia mai hana motu.
31 Ua eke ai e mutolu ha gahua taha, ko e fakatufono tukulagi haia ke he tau hau ha mutolu a mui ke he tau mena oti ha mutolu kua nonofo ai a mutolu.
32 To eke ia mo sapati ke okioki ai a mutolu, ti fakamamahi ai e mutolu a mutolu; ko e aho hiva he mahina, ke kamata mai he afiafi ke hoko atu ke he taha afiafi, ke eke ai e mutolu e sapati ke okioki ai a mutolu.
33 Kua vagahau mai foki a Iehova kia Mose, kua pehe mai,
34 Kia vagahau atu a koe ke he fanau a Isaraela, kia pehe atu, ko e aho hogofulu ma lima he mahina fitu, ko e galue he tau fale api haia, po fitu ke eke ai kia Iehova.
35 Ko e aho fakamua, ko e fakapotopotoaga tapu haia; aua neke eke ai e mutolu ha gahua mamafa.
36 Ko e tau aho ne fitu kia uta ai e mutolu e tau poa kua eke ke he afi kia Iehova; ko e aho valu ke eke ai e mutolu e fakapotopotoaga tapu; ti uta ai e mutolu e tau poa kua eke ke he afi kia Iehova; ko e fakapotopotoaga haia; ua eke ai e mutolu ha gahua mamafa taha.
37 Ko e tau galue ia kia Iehova ke fakamatala ai e mutolu, ko e tau fakapotopotoaga tapu, ke uta ai e poa kua eke ke he afi kia Iehova, ko e poa huhunu, mo e poa mena kai, mo e poa tamate, mo e poa inu, ko e aho ni mo e hana mena;
38 Katoa foki mo e tau sapati a Iehova, mo e tau mena ta atu noa, mo e tau mena oti ne omonuo ai ke ta atu, mo e tau poa oti kua makai ki ai ha lalu tau loto ke eke kua ta mai ai e mutolu kia Iehova.
39 Ko e aho hogofulu ma lima he mahina fitu, ka tatanaki ai e mutolu e tau fua he kelekele, kia eke ai e mutolu e galue kia Iehova ke he tau po ne fitu ko e aho fakamua kia eke ia mo sapati, kia eke foki e aho valu mo sapati.
40 Ko e aho fakamua foki kia uta ai e mutolu e tau fua he tau akau fulufuluola, ko e tau lau pama, mo e tau la he tau akau vihi, mo e tau garava mai he vailele; ti fiafia ai a mutolu po fitu ki mua a Iehova ha mutolu a Atua;
41 Kia eke ai e mutolu e galue ke po fitu ke he tau kia Iehova; ko e fakatufono tukulagi haia ke he tau hau ha mutolu a mui; kia eke ai e mutolu e galue ke he mahina fitu.
42 Kia po fitu he nonofo a mutolu ke he tau fale api, ko e tau tagata Isaraela oti kua fanau ai ke he motu, kia po fitu ni he nonofo a lautolu ke he tau fale api;
43 Kia iloa ai he tau hau ha mutolu a mui ne fakanonofo ai e au e fanau a Isaraela ke he tau fale api, he ta mai e au a lautolu mai he motu ko Aikupito; ko au ko Iehova ko e ha mutolu a Atua.
44 Ti talahau atu e Mose ke he fanau a Isaraela e tau galue na kia Iehova.