Levitika 24:1-23
24 KUA vagahau mai foki a Iehova kia Mose, kua pehe mai,
2 Kia poaki atu e koe ke he fanau a Israela kia ta mai e lautolu kia koe e puke lolo tavana kua tukituki mo afi, kia puho mai ai e lamepa.
3 Kia taute a Arona ia, ke kamata mai he magaaho afiafi ti hoko atu ke he magaaho pogipogi, ke he fahi mai nai he ie puipui he puha he fakatufono ke ne fale uta fano he tutuutaga ki mua a Iehova, ke he tau aho oti; ko e fakatufono tukulagi haia ke he tau hau ha mutolu a mui.
4 Ti taute ai e tau lamepa ki luga he fakatuaga lamepa auro mitaki ke he tau aho oti ki mua a Iehova.
5 Ti uta foki e koe e falaoa mitaki, ti tunu mai ai e koe hogofulu ma ua e areto pukupuku; ke takiua e omera ke he areto taha.
6 Kia tuku ai foki ke he na atu ua, ke takiono ke he atu, ki luga he laulau auro mitaki ki mua a Iehova.
7 Kia tuku ai foki ki luga he na atu ia e pili lipano mitaki, kia ha i ai ia ki luga he areto ke eke mo fakamanatuaga, ko e poa kua eke ke he afi kia Iehova.
8 Ti tauteute mau e ia ia ki mua a Iehova ke he taha aho sapati mo e taha aho sapati, ka ta mai ai he fanau Isaraela, ko e maveheaga tukulagi haia.
9 To eke ia ma Arona mo e hana tau tama tane ti kai ai e lautolu ke he mena tapu; ha ko e mena tapu ue atu haia he tau poa kua eke ke he afi kia Iehova, ko e fakatufono tukulagi haia.
10 Ko e tama tane he fifine Isaraela ka ko e hana matua tane ko e tagata Aikupito, ti o mai a lautolu mo e tau tagata Isaraela; ti latau ni a laua ke he heaga api ko e tama he fifine Isaraela mo e tagata Isaraela.
11 Ti ekefakakelea he tama he fififne Isaraela ke he higoa a Iehova, mo e kupu kelea ki ai, ti uta e lautolu a ia kia Mose; ko e higoa foki he hana matua fifine ko Salome haia, ko e tama fifine a Tiperi he magafaoa a Tano;
12 Ti tuku atu e lautolu a ia kia leoleo ai a ia, ato fakakite mai ai kia lautolu e finagalo a Iehova.
13 Ti vagahau mai ai a Iehova kia Mose, kua pehe mai,
14 Kia uta e mutolu e tagata ne kupu kelea ki tua he heaga api, ti fakalago ai e lautolu ne logona hana tau kupu ha lautolu a tau lima ki luga hana ulu, ti pinimaka ai he fakapotopotoaga oti a ia.
15 Kia vagahau atu a koe ke he fanau a Isaraela, kia pehe atu, Kaeke ke kupu kelea e taha tagata ke he hana Atua to nofo a ia mo e kelea.
16 Ko e tagata ke ekefakakelea ke he higoa a Iehova, to kelipopo ni a ia; kia pinimaka he fakapotopotoaga oti a ia; ka ekefakakelea e taha e higoa a Iehova to kelipopo ni a ia, ko e tagata kehe katoa mo e tagata ne fanau ai ke he motu.
17 Kaeke foki ke keli tagata e taha, to kelipopo ni a ia.
18 Ko ia ne keli e manu to totogi atu ni e ia; ko e manu ke totogi aki e manu.
19 Kaeke foki ke eke e taha ha mena ke kelea ai e tino he taha, to eke ni kia ia tuga ne eke ai e ia;
20 Ko e kafokia ke totogi aki e kafokia, ko e mata ke totogi aki e mata, ko e nifo ke totogi aki e nifo; tuga ne kelea kua eke e ia ke he taha tagata, to eke ai pihia kia ia.
21 Ko ia foki ke keli e manu to totogi atu ni e ia; ko ia foki ke keli e tagata to kelipopo ni a ia.
22 Ko e fakatufono taha ia kia mutolu, ke fakataufataua e tagata kehe mo e tagata kua fanau ai ke he motu; ha ko au ko Iehova ko e ha mutolu a Atua.
23 Ti vagahau atu a Mose ke he fanau Isaraela, kia uta e lautolu e tagata ne kupu kelea ki tua he heaga api, mo e pinimaka ai a ia ke he tau maka; ti eke ai he fanau a Isaraela, tuga ne poaki mai ai e Iehova kia Mose.