Levitika 26:1-46
26 AUA neke eke e mutolu ha tupua ma mutolu, ti ua fakatu e mutolu e tupua kua ta, po ke tupua maka; aua neke tuku ai foki e mutolu e fakatino maka ke he motu ha mutolu, ke hufeilo atu ki ai; ha ko au ni ko Iehova ko e ha mutolu a Atua.
2 Kia taofi e mutolu haku a tau sapati, mo e matakutaku ai a mutolu ke he haku a faituga; ko au ko Iehova.
3 Kaeke ke o a mutolu mo e haku tau fakatufono, ti taofi e mutolu haku a tau poaki, mo e eke ai ni;
4 Ti ta atu ai e au e uha kia mutolu ke he vaha ke lata ai, to fua mai ai foki e kelekele hana tau fua, ko e tau akau foki he fonua to fua mai ai ha lautolu a tau fua.
5 To hoko ni e taholiaga saito ha mutolu ke he tatanakiaga he tau fua vine; to hoko foki e tatanakiaga he tau fua vine ke he tau ke gana ai e tau saito, to kai ai foki e mutolu ha mutolu a tau mena kai mo e makona, ti nonofo foki a mutolu ke he ha mutolu a motu mo e nakai haofia.
6 To foaki atu foki e au e mafola ke he motu, ke tatakoto foki a mutolu ti nakai fakamatakutaku atu e taha kia mutolu, to fakaotioti foki e au e tau manu favale ke he motu, to nakai hoko atu foki e pelu ke he motu ha mutolu.
7 To tutuli atu foki a mutolu kia lautolu kua fai fi kia mutolu, ti veveli ai ni a lautolu ki mua ha mutolu a pelu.
8 To tutuli atu e tokolima ha mutolu ke he taha teau, ti tutuli atu e taha teau ha mutolu ke he hogofulu e afe ha lautolu ti fehola ai ni a lautolu; to veveli ai foki a lautolu kua fai fi kia mutolu ki mua ha mutolu a pelu.
9 Ti hagao atu au kia mutolu, to fakatokologa e au a mutolu, to fakalahi foki e au a mutolu, to fakamoli foki haku a maveheaga mo mutolu.
10 To kai foki e mutolu e tau mena kai tuai, mo e uta ki fafo e mutolu e tau mena tuai, ha ko e tau mena fou kua moua.
11 To fakatu foki e au haku a faituga ke he vaha loto ha mutolu, to nakai fakavihia foki e au a mutolu.
12 To o fano foki au mo mutolu, ti eke au mo Atua ha mutolu, to eke foki a mutolu mo motu haku.
13 Ko au ko Iehova ko e ha mutolu a Atua, ne ta mai a mutolu he motu ko Aikupito, neke eke a mutolu mo tau tupa kia lautolu; ne papaki foki e au e lakau hahamo ha mutolu; ne eke foki e au a mutolu ke o fakahako.
14 Kaeke foki ke nakai fanogonogo mai a mutolu kia au, mo e nakai eke e mutolu haku a tau poaki oti na;
15 Kaeke foki ke tiaki e mutolu haku tau fakatufonu, mo e vihiatia e mutolu haku a tau fakafiliaga, ke nakai eke foki e mutolu haku a tau poaki oti, ka e holi e mutolu haku a maveheaga;
16 Ti eke ai e au e tau mena nai kia mutolu, to tuku atu e au kia mutolu e tatalu, ko e gagao pipili, mo e gagao vevela, ke popoko ai e tau mata, mo e fakamamahi ai e tau loto; to gana teao foki ha mutolu a tau saito, ha koe mena kai ai ni e lautolu kua fai fi kia mutolu.
17 To eke foki e au a mutolu mo tau fi haku, ti mamate ai a mutolu ki mua ha lautolu kua fai fi kia mutolu; to pule foki a lautolu kua fakavihia a mutolu kia mutolu, to fehola foki a mutolu ka e nakai tutuli atu e taha kia mutolu.
18 Kaeke foki ke nakai fanogonogo mai a mutolu kia au ha ko e tau mena ia, ti tolomaki atu e au lagafitu e tau mena ke akonaki atu kia mutolu ha ko e tau hala ha mutolu.
19 To papaki foki e au e fakatokoluga he malolo ha mutolu; to eke foki e au ha mutolu a lagi ke tuga ne lapatoa, mo e ha mutolu a kelekele ke tuga ne apa kula.
20 Ti moumou noa foki e mutolu ha mutolu a malolo; ha ko e mena nakai fua mai ai e kelekele hana tau fua; to nakai fua mai foki ha mutolu a tau akau he fonua, ha lautolu a tau fua.
21 Kaeke foki ke totoko mai a mutolu kia au, mo e nakai fia fanogonogo mai a mutolu kia au, ti tolomaki atu lagafitu e au e tau mauku kia mutolu ke tuga ne tau hala ha mutolu.
22 To fakafano atu e au e tau manu he vao kia mutolu, ti uta kehe ni e lautolu ha mutolu a fanau, mo e fakaotioti ha mutolu a tau manu totolo, mo e fakatokogahoa ai a mutolu; ke toka noa ai foki ha mutolu a tau puhala.
23 Kaeke foki ke nakai mafai a mutolu ke ako mai ia au ke he tau mena ia, ka e totoko mai a mutolu kia au;
24 Ti totoko atu ai e au kia mutolu, mo e akonaki atu lagafitu kia mutolu ha ko e tau hala ha mutolu;
25 To fakahoko atu foki e au e pelu kia mutolu, ke taui aki ha mutolu a holi e maveheaga; ka fakapotopoto ai foki a mutolu ke he tau maga ha mutolu to fakafano atu ai e au e tatalu kia mutolu, to tuku atu foki e au a mutolu ke he tau lima ha lautolu kua fai fi kia mutolu.
26 Ka oti foki he papaki e au e tokotoko he ha mutolu a tau mena kai, ti tao ai he tau fifine tokohogofulu ha mutolu a tau mena kai ke he umu taha, to liuaki atu foki e lautolu ha mutolu a tau mena kai oti, mo e fafati ti kai ai e mutolu, ka e nakai ni makona.
27 Kaeke foki ke nakai fanogonogo mai a mutolu kia au ha ko e tau mena ia, ka e totoko mai agaia kia au;
28 Ti totoko atu e au kia mutolu mo e ita, to akonaki atu lagafitu e au, ko au ni kia mutolu ha ko e tau hala ha mutolu.
29 To kai foki e mutolu e kakano he tau tama tane ha mutolu, ko e kakano foki he tau tama fifine ha mutolu to kai ai ni e mutolu.
30 To moumou foki e au ha mutolu a tau mena tokoluga, mo e hio ki lalo ha mutolu a tau tupua, to tolo foki e au ha mutolu a tau tino kua mamate ki luga he tau tino he tau tupua ha mutolu, ti vihiatia e au a mutolu.
31 To eke foki e au ha mutolu a tau maga mo tau mena kua moumou, mo e toka ke vao ai ha mutolu a tau faituga, ti nakai logona foki e au ha namu manogi, ke he ha mutolu a tau mena manogi mitaki.
32 To eke foki e au mo mena kua moumou ha mutolu a motu; ti ofomate ai a lautolu kua fai fi kia mutolu kua nonofo ai.
33 To fakatafola foki e au a mutolu ke he tau motu kehe, to aki foki e au e pelu ke tutuli atu kia mutolu; ti eke foki ha mutolu a motu mo vao, ti eke foki mo tau mena kua moumou ha mutolu a tau maga.
34 Ti fakakatoatoa ai he kelekele hana tau sapati, ke he tau aho oti ke vao ai a ia, ka kua nonofo a mutolu ke he motu ha lautolu kua fai fi kia mutolu; ti toka noa ai e kelekele, mo e fakakatoatoa ai hana tau sapati.
35 Ko e tau aho oti ke vao ai, to toka noa ai a ia; he nakai toka noa ai ke he tau sapati ha mutolu he nonofo ai a mutolu.
36 To fakahoko atu foki e au e lolelole ke he tau loto ha lautolu kua toe ia mutolu ke he motu ha lautolu kua fai fi kia mutolu; ke tutuli ai a lautolu ke he kali he lau kou kua havilia; ti fehola a lautolu tuga ne tau tagata kua fehola mai he pelu; to veveli ai foki a lautolu ka e nakai tutuli ai e taha.
37 To veveli foki a mutolu ko e taha ki luga he taha, tuga ne veveli ki mua he pelu ka e nakai tutuli atu ai e taha; to nakai fai malolo foki a mutolu ke totoko atu kia lautolu kua fai fi kia mutolu.
38 To mahaikava foki a mutolu ke he tau motu kehe, to kai ai ni a mutolu ke he motu ha lautolu kua fai fi kia mutolu.
39 To fakaotioti foki a lautolu kua toe ia mutolu ha ko e tau mahani kelea ha lautolu ke he motu ha lautolu kua fai fi kia mutolu; ha ko e tau mahani kelea foki he tau matua ha lautolu to fakaotioti ai a lautolu.
40 Kaeke foki ke talahau e lautolu ha lautolu a tau mahani kelea, mo e mahani kelea he ha lautolu a tau matua katoa mo e ha lautolu a tau holifono, kua holia ai e lautolu haku tau fakatufono, mo e ha lautolu a totoko mai kia au;
41 Ko au foki ne totoko atu kia lautolu mo e uta a lautolu ke he motu he tau tagata kua fai fi kia lautolu, kaeke foki ke he vaha ia kua fakatokolalo ai e tau loto ha lautolu kua nakai peritome, mo e fakakatoatoa ai e lautolu e taui he ha lautolu a tau mahani kelea;
42 Ti manamanatu ai au ke he haku a maveheaga mo Iakopo, mo e haku a maveheaga mo Isaako, katoa foki mo e haku a maveheaga mo Aperahamo to manamanatu ai au, to manamanatu foki ai au ke he motu.
43 Ti tokai e lautolu e motu, ke fakakatoatoa ai hana tau sapati, ka kua vao ai a ia ti nakai nonofo ai a lautolu; ke fakakatoatoa ai e lautolu e taui he ha lautolu a tau mahani kelea; ha kua tiaki e lautolu haku a tau fakafiliaga; ha ko e mena vihiatia foki e lautolu haku a tau fakatufono.
44 Ka e pete ni he tau mena ia, ka kua nonofo a lautolu ke he motu ha lautolu kua fai fi kia lautolu, nakai ni tiaki e au a lautolu, to nakai fakavihia foki e au a lautolu, ke fakaotioti ai a lautolu, ke fakahui ai haku a maveheaga mo lautolu; ha ko au ni ko Iehova ko e ha lautolu a Atua.
45 Ka e mena ha ko lautolu ni to manatu ai au ke he maveheaga mo e tau matua ha lautolu, he ta mai ai e au a lautolu he motu ko Aikupito ki mua he tau motu kehe kia eke au mo Atua ha lautolu; ko au ko Iehova.
46 Ko e tau poaki hanā mo e tau fakafiliaga mo e tau fakatufono, ne tuku mai ai e Iehova kia lautolu mo e fanau a Isaraela ke he mouga ko Sinai ke he lima a Mose.