Levitika 27:1-34
27 KUA vagahau mai foki a Iehova kia Mose, kua pehe mai,
2 Kia vagahau atu a koe ke he fanau a Isaraela, ti pehe atu kia lautolu Kaeke ke fakatapu ai he taha ha tagata ke he omonuo; ti eke ai e tagata ia ma Iehova ke tatai mo e hau a fakalata.
3 Ti eke ai e koe hau a fakalata ke he tane ke kamata ke he tagata ne uafulu hana tau tau, he hoko atu ke he tagata ne onogofulu hana tau tau, ti fakalata ai e koe ke he limagofulu e sikeli ario ke lata mo e sikeli he faituga.
4 Kaeke foki ko e fifine ti fakalata ai e koe ke he tau sikeli ne tolugofulu.
5 Kaeke ko e tagata ke kamata ke he lima hana tau tau ke hoko atu ke he uafulu hana tau tau, ti fakalata ai e koe uafulu e sikeli ma e tama tane, ka ko e fifine ko e tau sikeli ne hogofulu.
6 Kaeke ko e tama ke kamata ke he mahina taha hana tau aho ke hoko atu ke he tau tau ne lima, ti fakalata ai e koe ma e tama tane ko e tau sikeli ario ne lima, ka e fakalata ma e tama fifine tolu e sikeli ario.
7 Kaeke foki ko e tagata ne onogofulu hana tau tau, katoa mo ia ne fakamua atu; kaeke ko e tane ti fakalata ai e koe ke he tau sikeli ne hogofulu ma lima, ka ko e fifine ke taha e hogofulu e sikeli.
8 Kaeke ke nakai toka ia ia e tau mena kua fakalata ki ai, ti fano ai a ia mo e tu ki mua he ekepoa, ti fakalata foki he ekepoa kia ia ne omonuo ke he mena kua maeke ke moua ai e ia, ke pihia e fakalata he ekepoa kia ia.
9 Kaeke ko e manu ia lautolu kua eke aki e poa kia Iehova, ko e tau mena oti pihia kua ta atu ai kia Iehova, kua tapu ni haia.
10 Aua neke fehikitaki ia to nakai hukuiaki e taha ke he taha, ko e mitaki ke hukuiaki e kelea, mo e kelea ke hukuiaki e mitaki; kaeke foki ke hukuiaki taha manu ke he taha manu, to tapu ai a ia katoa mo e hana hukui.
11 Kaeke foki ko e taha he tau manu nakai mea kua nakai eke aki e poa kia Iehova; ti tuku atu ai e ia e manu ki mua he ekepoa.
12 Ti fakalata ai he ekepoa po ke mitaki po ke kelea; ke tuga ni hau a fakalata ko koe na ko e ekepoa na e, kia pihia ni e mena ia.
13 Kaeke foki ke fia liu fakafua mai ai e ia, ti lafilafi ai e ia hana mena ne lima aki ke he hau a fakalata.
14 Kaeke foki ke fakatapu ai he tagata hana fale kia tapu ai kia Iehova, ti fakalata ai he ekepoa po ke mitaki, po ke kelea; ti tuga ni e fakalata he ekepoa, kia mau ni e mena ia.
15 Kaeke ke fia liu fakafua mai ai e fale he tagata ne fakatapu ai hana fale, ti lafilafi ai e ia e mena ne lima aki he tau tupe ke he hau a fakalata, ti eke ai e ia e fale māna.
16 Kaeke foki ke fakatapu he tagata taha fahi he hana fonua kia Iehova, ti fakalata ai e koe ke he tau fua ne gana ai; ko e fakalata ke he fonua ne gana ai taha homera he karite, ko e limagofulu e sikeli ario haia.
17 Kaeke foki ke fakatapu ai e ia hana fonua ke kamata ai ke he tau he iupeli, ke tuga ne fakalata hau, kia pihia ni e mena ia.
18 Kaeke foki kua mole atu e tau he iupeli ka fakatapu ai e ia hana fonua, ti totou ai he ekepoa e tau tupe ke lata mo e tau tau ne toe ato hoko ke he tau he iupeli, ti uta kehe ia he hau a fakalata.
19 Kaeke ke manako he tagata ne fakatapu e fonua ke liu fakafua mai ai, ti lafilafi atu e ia e mena ne lima aki he tau tupe ke he hau a fakalata, ti fakamau ai kia ia e fonua.
20 Kaeke foki kua nakai fia liu fakafua mai ai e fonua, po kua fakafua atu e fonua ke he taha tagata, ti nakai ni liu fakafua mai a ia.
21 Ka e tuku atu ai e fonua ka hoko atu ke he iupeli, ti tapu ni a ia kia Iehova, tuga ne fonua kua tuku atu ai kia Iehova, ti eke ni a ia ma e ekepoa.
22 Kaeke foki ke fakatapu ai he taha kia Iehova e fonua kua fakafua mai e ia, ka e nakai ni ko e hana fonua;
23 Ti totou atu ai he ekepoa kia ia e katoatoa he hau a fakalata; ke hoko atu ke he tau he iupeli; ti uta ai foki hau a fakalata ke he aho ia, ko e mena tapu ia kia Iehova.
24 Ka hoko ke he tau he iupeli ti liuaki atu e fonua kia ia ne fakafua mai ai, ko ia haia hana tuai e kelekele.
25 Kia eke foki hau a tau fakalata oti ke tatai mo e sikeli he faituga; ne uafulu e kera ko e sikeli haia.
26 Ka ko e tau punua uluaki he tau manu, ma Iehova e tau punua uluaki ia, aua neke fakatapu ai he tagata ia; po ke povi, po ke mamoe, ko e tau mena ni a ia a Iehova.
27 Kaeke foki ko e manu nakai mea ti liu fakafua mai a ia tuga ne fakalata hau, mo e lafilafi foki ki ai hana mena ne lima aki; kaeke foki ke nakai liu fakafua mai a ia, ti fakafua atu ai a ia tuga ni hau a fakalata.
28 Ka ko e tau mena oti kua tuku atu, kua tuku atu ai he tagata kia Iehova, ko e mena mai he hana tau mena oti, ko e tagata, po ke manu, po ke fonua hana, nakai ni fakafua atu ia, to nakai liu fakafua mai ai; ko e tau mena oti ni kua tuku atu kua tapu ue atu a ia kia Iehova.
29 Nakai fakai ha mena kua tuku atu kia Iehova, ne tuku atu he tagata ke liu fakafua mai ai; ka e kelipopo ni a ia.
30 Ko e tau mena oti foki ne hogofulu aki he tau mena he fonua, ko e saito kua gana ke he fonua, po ke tau fua he akau, ko e tau mena ia a Iehova; kua tapu ni a ia kia Iehova.
31 Ka fia liu fakafua mai ai foki he tagata e tau mena ne hogofulu aki hana tau mena, ti lafilafi ki ai e ia hana mena ne lima aki;
32 Ko e mena foki ne hogofulu aki he tau manu oti, ko e tau povi, katoa mo e tau mamoe, ko e tau mena oti ni ne o age ki lalo he tokotoko, kua tapu ni kia Iehova hana mena ne hogofulu aki ia.
33 Aua neke kumi e ia po ke mitaki, po ke kelea, ti ua fehikitaki ia; kaeke foki ke hukuiaki e ia a ia ke he taha manu, ti tapu ni a ia katoa mo e hana hukui; nakai liu fakafua mai ai.
34 Ko e tau poaki hanā ne poaki mai ai e Iehova kia Mose ma e fanau a Isaraela ke he mouga ko Sinai.