Levitika 3:1-17
3 KAEKE ko e poa fakaaue hana poa, kaeke kua eke mai he fuifui povi, po ke manu tane, po ke manu fifine, kia eke ai e ia e manu kua katoatoa e mitaki mo poa ki mua a Iehova.
2 Ti fakalago ai e ia hana lima ki luga he ulu he hana poa, ti keli ai ke he gutuhala he fale uta fano he tutuutaga; ti pīpī takai he tau ekepoa ko e tau tama tane a Arona, e toto ki luga he fatapoa.
3 Ti ta mai ai e ia e poa fakaaue, ko e poa kua eke ke he afi kia Iehova; ko e gako he kupega, katoa mo e gako oti ha he gakau,
4 Ko e na fua ua foki mo e gako ha i ai ha i luga he tokupu; mo e galu manava ki luga he ate, mo e na fua to uta kehe ai e ia.
5 Ti huhunu he tau tama tane a Arona ia ke he fatapoa, ki luga he poa huhunu ha i luga he tau gaafi, ha i luga he afi; ko e poa kua eke ke he afi haia, ko e mena manogi mitaki kia Iehova.
6 Kaeke foki ke ta mai e ia hana poa he fuifui mamoe mo poa fakaaue kia Iehova; po ke manu tane, po ke manu fifine, kia ta mai ai e ia e manu kua katoatoa e mitaki.
7 Kaeke foki ke ta mai e ia e punua mamoe mo poa mana, kia ta mai ai ni ki mua a Iehova.
8 Ti fakalago ai e ia hana lima ki luga he ulu he hana poa, ti keli ai ki mua he fale uta fano he tutuutaga; ti pīpī takai he tau tama tane a Arona hana toto ki luga he fatapoa.
9 Ti ta mai ai e ia e poa fakaaue, ko e poa kua eke ke he afi kia Iehova; ko e hana gako, mo e hiku katoatoa kua uta kehe ai ke he mena ne tata ke he tigogo; ko e gako foki he kupega, katoa mo e gako oti ha he gakau.
10 Ko e na fua ua foki mo e gako ha i ai ha i luga he tokupu, mo e galu manava ha i luga he ate, mo e na fua, ti uta kehe ai e ia.
11 Ti huhunu he ekepoa ia ke he fatapoa, ko e mena kai haia he poa kua eke ke he afi kia Iehova.
12 Kaeke foki ko e koti hana poa, kia ta mai e ia a ia ki mua a Iehova.
13 Ti fakalago ai e ia hana lima ki luga he ulu hana, ti keli ai ki mua he fale uta fano he tutuutaga; ti pīpī takai he tau tama tane a Arona, hana toto ki luga he fatapoa.
14 Ti ta mai ai e ia hana poa, ko e poa kua eke ke he afi kia Iehova; ko e gako he kupega, mo e gako oti ha he gakau,
15 Ko e na fua foki ne ua, mo e gako ha i ai ha i luga he tokupu, mo e galu manava ki luga he ate, mo e na fua, to uta kehe ai e ia.
16 Ti huhunu he ekepoa ia ke he fatapoa, ko e mena kai haia he poa kua eke ke he afi kia Iehova, ko e mena manogi mitaki haia; ko e gako oti kana ma Iehova ni a ia.
17 Aua neke kai e mutolu e gako, po ke toto; ko e fakatufono tukulagi haia, ke he tau hau ha mutolu a mui, ke he tau mena oti kua nonofo ai a mutolu.