Levitika 4:1-35
4 KUA vagahau mai a Iehova kia Mose, kua pehe mai,
2 Kia vagahau atu a koe ke he fanau a Isaraela, mo e pehe atu, Kaeke ke hala e taha tagata, mo e hehe ke he taha poaki a Iehova, ke he tau mena nakai lata ke eke, mo e eke ai taha mena he tau mena ia.
3 Kaeke foki ke hala he ekepoa kua fakauku, ke he mena ne hehe ai he motu; ti ta mai ai e ia kia Iehova e punua povi tane kua katoatoa e mitaki, ke eke mo poa ha ko e hala, ha ko e hana hala ne hala ai a ia.
4 Ti ta mai ai e ia e punua povi tane ke he gutuhala he fale uta fano he tutuutaga ki mua a Iehova; ti fakalago ai e ia hana lima ki luga he ulu he punua povi tane, ti keli ai e ia e punua povi tane ki mua a Iehova.
5 Ti uta ai he ekepoa kua fakauku e taha maga he toto he punua povi tane, mo e ta mai ai ke he fale uta fano he tutuutaga.
6 Ti fufui ai he ekepoa hana matalima ke he toto, mo e pīpī aki lagafitu ke he toto ki mua a Iehova, ki mua he ie puipui he mena tapu.
7 Ti tuku ai foki he ekepoa e taha maga he toto ke he tau tapunu he tau hoe he fatapoa ke huhunu ai e mena manogi mitaki ki mua a Iehova, ha ha he fale uta fano he tutuutaga, ka ko e toto oti he punua povi tane, kia liligi ia ke he kelekele he fata poa, ke eke ai e tau poa huhunu, ha ha he gutuhala he fale uta fano he tutuutaga.
8 Ti uta kehe ai foki e ia e gako oti he punua povi tane, kua eke mo poa ha ko e hala, mo e gako oti ha ha he gakau.
9 Ko e na fua ua foki, mo e gako ha i ai, ha i luga he tokupu, mo e galu manava ki luga he ate, mo e na fua, to uta kehe ai e ia.
10 Ke tuga ne uta kehe e ia mai he povi he poa fakaaue; ti huhunu ai he ekepoa ia ki luga he fatapoa, ke eke ai e poa huhunu.
11 Ka ko e kili he punua povi tane, mo e hana kakano oti, mo e hana ulu, mo e hana tau hui, mo e hana gakau, katoa mo e hana faliu,
12 Kia uta ai e ia, ko e punua povi tane ka toa ki tua he heaga api ke he mena toka noa, ko e mena ne liligi ai e tau efuefu afi, ti huhunu ai ni ki luga he tau gaafi ke he afi, kia huhunu ai ke he mena ne liligi ai e tau efuefu afi.
13 Kaeke ke hehe he fakapotopotoaga katoa a Isaraela, ti galo foki e mena ia ke he fakapotopotoaga, ti eke ai e lautolu taha mena kua nakai lata mo e tau poaki a Iehova, ti nonofo ai mo e kelea a lautolu ha ko e tau mena oti kua nakai lata kua eke e lautolu.
14 Ka kua iloa e hala ne hala ai a lautolu, ti ta mai ai he motu e punua povi tane ke eke mo poa ha ko e hala, ti ta mai ai e lautolu a ia ki mua he fale uta fano he tutuutaga.
15 Ti fakalago ai he tau patu he fakapotopotoaga e tau lima ha lautolu ki luga he ulu he punua povi tane ki mua a Iehova; ti keli ai e punua povi tane ki mua a Iehova.
16 Ti ta mai ai he ekepoa kua fakauku e taha maga he toto he punua povi tane ke he fale uta fano he tutuutaga;
17 Ti fufui ai he ekepoa hana matalima ke he toto, mo e pīpī aki laga fitu ki mua a Iehova, ki mua he ie puipui.
18 Ti tuku ai e ia e taha maga toto he punua povi tane ke he tau tapunu he tau hoe he fatapoa ha i mua a Iehova ha ha he fale uta fano he tutuutaga; ka ko e toto oti kia liligi ia ke he kelelele he fatapoa ke eke ai e poa huhunu, ha ha he gutuhala he fale uta fano he tutuutaga.
19 Ti uta kehe ai e ia hana gako oti, mo e huhunu ai ki luga he fatapoa.
20 Ti eke ai ke he punua povi tane, tuga ne eke ke he punua povi tane ne eke mo poa ha ko e hala, kia eke ni pihia; ti eke ai he ekepoa e lukutoto ma lautolu, ti fakamagalo ai ni a lautolu.
21 Ti uta ai e ia e punua povi tane ki tua he heaga api, ti huhunu ai a ia tuga ne huhunu ai e punua povi tane fakamua; ko e poa ha ko e hala haia ma e fakapotopotoaga.
22 Kaeke ke hala e iki mo e hehe a ia, mo e eke ai e taha mena he tau mena oti kua nakai lata mo e tau poaki a Iehova hana a Atua, ti nofo ai a ia mo e kelea.
23 Kaeke ke fakailoa atu kia ia hana hala ne hala ai a ia, ti ta mai ai e ia hana poa, ko e koti tane kua katoatoa e mitaki.
24 Ti fakalago ai e ia hana lima ki luga he ulu he koti tane, ti keli ai ke he mena ke keli ai e poa huhunu, ki mua a Iehova; ko e poa ha ko e hala haia.
25 Ti uta ai he ekepoa taha maga toto he poa ha ko e hala ke he hana matalima, mo e tuku ke he tau tapunu he tau hoe he fatapoa ke eke ai e poa huhunu, ti liligi ai hana toto ke he kelekele he fatapoa ke eke ai e poa huhunu.
26 Ti huhunu ai hana gako oti ke he fatapoa, ke tuga ne gako he poa fakaaue, ti eke ai he ekepoa e lukutoto ha ko e hala hana, kia fakamagalo ai a ia.
27 Kaeke ke hala e taha tagata he motu, mo e hehe a ia, mo e eke ai e ia taha mena he tau mena oti kua nakai lata mo e tau poaki a Iehova ke eke, ti nofo ai a ia mo e kelea.
28 Kaeke ke fakailoa atu kia ia hana hala, ne hala ai a ia, ti ta mai ai e ia hana poa, ha ko e hana hala, he hala ai a ia, ko e koti fifine kua katoatoa e mitaki.
29 Ti fakalago ai e ia hana lima ki luga he ulu he poa ha ko e hala, ti keli ai e poa ha ko e hala, ke he mena ke eke ai e poa huhunu.
30 Ti uta ai he ekepoa taha maga he hana toto ke he hana matalima, mo e tuku ke he tau tapunu he tau hoe he fatapoa ke eke ai e poa huhunu; ka ko e hana toto oti kia liligi ia ke he kelekele he fatapoa.
31 Ti uta kehe ai hana gako oti, tuga ne uta kehe ai e gako oti he poa fakaaue, ti huhunu ai he ekepoa ia ke he fatapoa, ko e mena manogi mitaki kia Iehova; ti eke ai he ekepoa e lukutoto mana, kia fakamagalo ai a ia.
32 Kaeke ke ta mai e ia e punua mamoe, ke eke mo poa ha ko e hala mana, ti ta mai ai e ia e punua mamoe fifine kua katoatoa e mitaki.
33 Ti fakalago ai e ia hana lima ki luga he ulu he poa ha ko e hala, ti keli ai ke eke mo poa ha ko e hala, ke he mena ke keli ai e poa huhunu.
34 Ti uta ai he ekepoa e taha maga toto he poa ha ko e hala ke he hana matalima, mo e tuku ke he tau tapunu, he tau hoe he fatapoa ke eke ai e poa huhunu; ka ko e toto oti kia liligi ia ke he kelekele he fatapoa.
35 Ti uta kehe ai hana gako oti, tuga ne uta kehe e gako he punua mamoe he poa fakaaue, ti huhunu ai he ekepoa ia ke he afi, ka tuga ne tau poa kua eke ke he afi kia Iehova; ti eke ai he ekepoa e lukutoto mana, ha ko e hana hala ne hala ai, kia fakamagalo ai a ia.