Levitika 5:1-19
5 KAEKE ke hala e taha tagata, he logona ai e ia e kupu he omonuo, ti maeke kia ia ke fakamoli aki po ke kitia e ia, po ke iloa ni e ia, kaeke ke nakai talahau e ia, ti nofo mo e hala a ia.
2 Kaeke ke pipiki e taha tagata ke he mena kelea, po ke tino mate he manu he vao kua kelea, po ke tino mate he manu he kaina kua kelea, po ke tino mate he mena totolo kua kelea, ka e galo ni kia ia, ti kelea ai a ia, ti nofo ni a ia mo e hala.
3 Kaeke foki ke pipiki e taha ke he mena he tagata ke kelea ai, ko e mena kelea ke kelea ai a ia, ti galo ni kia ia, kaeke ke iloa e ia, ti kelea ai a ia, ti nofo ni a ia mo e hala.
4 Kaeke foki ke omonuo e taha tagata,mo e vagahau fakatepetepe ai a ia ke he hana tau laugutu, ke eke e mena kelea, po ke eke e mena mitaki, ko e tau mena oti kua vagahau fakatepetepe ai e tagata ke he hana omonuo; kua galo foki kia ia; ka iloa e ia, ti nofo ni a ia mo e kelea ke he taha mena he tau mena ia.
5 Kaeke ke nofo mo e kelea a ia ke he taha mena ia, kia talahau ai e ia, kua hala tuai a ia ke he mena ia.
6 Ti ta mai ai e ia hana poa ha ko e hehe, kia Iehova ha ko e hana hala kua hala ai, ko e manu fifine mai he fuifui mamoe, ko e punua mamoe, po ke punua koti, ke eke mo poa ha ko e hala; ti eke ai he ekepoa e lukutoto ha ko e hana hala.
7 Kaeke ke nakai moua e ia e punua mamoe ti ta mai ai e ia ha ko e hana hehe kua hala ai a ia, ua e kulukulu, po ke ua e punua lupe, ko e taha ke eke mo poa ha ko e hala, mo e taha ke eke mo poa huhunu.
8 Ti ta mai ai e ia ke he ekepoa, ti uta fakamua e ia e manu ke eke mo poa ha ko e hala, ti mumutu ai hana ulu mai hana ua, ka e nakai motu.
9 Ti pīpī aki e ia e fahi he fatapoa ke he taha maga he toto he poa ha ko e hala, ka e tatau hifo e magatoto ne toe ke he kelekele he fatapoa; ko e poa ha ko e hala haia.
10 To eke foki e ia e manu ne ua aki mo poa huhunu ke lata mo e kotofaaga; ti eke ai he ekepoa e lukutoto mana ha ko e hana hala ne hala ai, ti fakamagalo ai a ia.
11 Kaeke ke nakai moua e ia ua e kulukulu, po ke ua e punua lupe, ti ta mai ai e ia mo e hana poa ha ko e hala, ko e veveheaga ne hogofulu aki he efa he falaoa mitaki ke eke mo poa ha ko e hala, aua neke tuku ki ai e puke lolo, ti aua neke tuku ki ai e lipano, ha ko e poa ha ko e hala haia.
12 Ti ta mai ai e ia ke he ekepoa, ti aku mai ai he ekepoa hana puke aloalolima he falaoa, ko e hana fakamanatuaga haia, ti huhunu ai ke he fatapoa, mo poa kua eke ke he afi kia Iehova; ko e poa ha ko e hala haia.
13 Ti eke ai he ekepoa e lukutoto mana ha ko e hana hala ne hala ai ke he taha mena he tau mena, ia, ti fakamagalo ai a ia, ti eke ni ma e ekepoa e falaoakua toe, ke tuga ne poa mena kai.
14 Kua vagahau mai foki e Iehova kia Mose, kua pehe mai,
15 Kaeke ke holifono e taha tagata, kua hala foki mo e hehe ke he tau mena tapu a Iehova; ti ta mai ai e ia he fuifui mamoe kia Iehova ha ko e hana hehe e mamoe tane kua katoatoa e mitaki, ke tatai mo e hau a fakalata ke he tau sikeli ario, ko e sikeli ni he faituga, ke eke mo poa ha ko e hehe.
16 Ti totogi atu foki e ia e mena ne hala ai a ia ke he tau mena tapu, mo e lafilafi foki ki ai hana veveheaga ne lima aki, ti uta ai ke he ekepoa; ti eke ai he ekepoa e lukutoto mana ke he mamaoe tane he poa ha ko e hehe, ti fakamagalo ai a ia.
17 Kaeke foki ke hala e taha tagata mo e eke ai e ia ha mena he tau mena oti kua nakai lata mo e tau poaki a Iehova ke eke, pete he nakai iloa e ia, to nofo ni a ia mo e hala, ti ha ia ia foki hana kelea.
18 Ti ta mai ai e ia ke he ekepoa e mamoe tane kua katoatoa e mitaki, mai he fuifui mamoe ke tatai mo e hana fakalata, ke eke mo poa ha ko e hehe, ti eke ai he ekepoa e lukutoto mana, ha ko e hana hehe ne hehe ai a ia mo e nakai iloa, ti fakamagalo ai a ia.
19 Ko e poa ha ko e hehe haia; kua hehe lahi ni a ia ki mua a Iehova.