Levitika 6:1-30
6 KUA vagahau mai foki e Iehova kia Mose, kua pehe mai,
2 Kaeke ke hala e taha tagata mo e holifono a ia ki mua a Iehova, mo e pikopiko ai e ia ke he tagata kua katofia mo ia ke he mena ne tuku atu e ia kia ia ke leoleo, po ke mena ne pulega ai, po ke mena ne fofo, po ke fakavai ai e ia ke he tagata kua katofia mo ia,
3 Po ke moua ai e ia e mena ne galo, mo e fakatikai ai, mo e omonuo pikopiko ai; ka eke he tagata taha mena ha tau mena oti ia, kua hala ai a ia.
4 Kaeke ke hala pihia a ia, ti nofo ai mo e kelea, ti liuaki ai e ia e mena ne fofo e ia, po ke mena ne moua he fakavai, po ke mena ne tuku atu ai kia ia ke leoleo, po ke mena ne galo ti moua ai e ia,
5 Po ke tau mena oti ne omonuo pikopiko ai e ia, kia liuaki ai e ia e mena katoatoa, mo e lafilafi ki ai hana veveheaga ne lima aki, ti uta ni ke he tagata hana e mena, ke he aho ne eke ai hana poa ha ko e hehe.
6 Ti ta mai ai e ia kia Iehova hana poa ha ko e hehe, ko e mamoe tane kua katoatoa e mitaki mai he fuifui mamoe ke tatai mo e hau a fakalata ke eke mo poa ha ko e hehe kia ta mai ai e ia ke he ekepoa.
7 Ti eke ai he ekepoa e lukutoto mana ki mua a Iehova, ti fakamagalo ai a ia ke he mena he tau mena oti ia kua eke e ia, kua nofo mo e kelea ai a ia.
8 Kua vagahau mai foki e Iehova kia Mose, kua pehe mai,
9 Kia poaki atu e koe kia Arona mo e hana tau tama tane, kua pehe atu, Ko e fakatufono he poa huhunu hanai; ko e poa huhunu haia, ke tokai ke he tokaaga afi ki luga he fatapoa kia ahogia kia kaka ai foki e afi ke he fatapoa.
10 Ti tapulu ai e ekepoa ke he hana tapulu ie lino, ti tuku foki hana fihui ie lino ke he hana kakano, ti uta e ia e tau efuefu afi, ko e tau efuefu afi he poa huhunu, kua fakaotioti ke he afi ki luga he fatapoa, ti tuku ai foki ke he fahi he fatapoa.
11 Ti aki ai e ia hana tau tapulu ia, mo e tapulu ai ke he tau tapulu kehe, ti uta ki fafo e ia e tau efuefu afi ki tua he heaga api ke he mena toka noa.
12 Kia kaka mau foki e afi ki luga he fatapoa; aua neke mate; ti fai aki ai he ekepoa e tau gaafi ke he taha pogipogi mo e taha pogipogi, ti tuku ai e poa huhunu, mo e huhunu ai foki e gako he poa fakaaue.
13 Kia kaka mau ai e afi ki luga he fatapoa; aua neke mate.
14 Ko e fakatufono foki ke he poa mena kai hanai; kia ta mai ai he tau tama tane a Arona ki mua a Iehova, ki mua he fatapoa.
15 Ti uta kehe ai he taha ia lautolu hana puke aloalolima he falaoa mitaki, he poa mena kai, mo e taha maga he hana puke lolo, mo e lipano katoa ha ha i luga he poa mena kai, ti huhunu ai ke he fatapoa, ko e mena manogi mitaki haia, ko e hana fakamanatuaga haia kia Iehova.
16 Ko e mena foki kua toe to kai ai e Arona mo e hana tau tama tane; kia kai ai e lautolu ia mo e areto nakai fakaea ke he mena tapu; kia kai ai e lautolu ke he lotopa he fale uta fano he tutuutaga.
17 Aua neke tunu ai mo e mena ke fakaea aki. Kua ta atu tuai e au ia mo tufaaga ma lautolu he tau poa kua eke ke he afi; ko e mena tapu ue atu haia tuga ne poa ha ko e hala, tuga foki e poa ha ko e hehe.
18 To kai ai he tau tane oti he fanau a Arona. Ko e fakatufono tukulagi haia ke he tau hau ha mutolu a mui he tau poa kua eke ke he afi kia Iehova; kua tapu foki a lautolu oti kua pipiki ki ai.
19 Kua vagahau mai foki a Iehova kia Mose, kua pehe mai,
20 Ko e poa hanai a Arona, mo e hana tau tama tane, kia ta mai e lautolu kia Iehova ke he aho ke fakauku ai a ia; ko e veveheaga ne hogofulu aki he efa he falaoa mitaki ke eke mau mo poa mena kai, ko e hana maga ne veveheuaaki ke he afiafi.
21 Ti eke ia kua laku mo e puke lolo, ki luga he lapatoa lapalapa; ti ta mai ai a ia; kia ta mai ai a ia ko e poa mena kai kua tofitofi fakavalavala mo e tunu, ko e mena manogi mitaki kia Iehova haia.
22 Ko ia foki he hana tau tama tane kua fakauku mo ekepoa ke hukui aki a ia kia eke ai e ia; ko e fakatufono kia Iehova tukulagi haia; kia huhunu ai katoatoa.
23 Kia huhunu ai he ekepoa e tau poa mena kai oti kana, aua neke kai.
24 Kua vagahau mai a Iehova kia Mose, kua pehe mai,
25 Kia vagahau atu a koe kia Arona mo e hana tau tama tane, kua pehe atu, Ko e fakatufono he poa ha ko e hala hanai; ko e mena ne keli ai e poa huhunu, ke keli ai foki e poa ha ko e hala ki mua a Iehova; ko e mena tapu ue atu haia.
26 Ko e ekepoa kua eke e poa ha ko e hala, to kai ai e ia; kia kai ai ni ke he mena tapu he lotopa he fale uta fano he tutuutaga.
27 Ko e tau mena oti ke piki atu ke he hana kakano to tapu ia, ka pikitia foki e tapulu ke he taha maga he hana toto, kia unu ai e koe e mena ne pipiki ke he mena tapu.
28 Ka ko e kapiniu kelekele ne tunu ai kia lipilipi ai a ia, kaeke foki ke tunu ai ke he kapiniu apa kula, kia kana ai a ia mo e holoholo ni ke he maga vai.
29 Kia kai ai he tau tane oti he tau ekepoa; ko e mena tapu ue atu haia.
30 Ka ko e tau poa oti ha ko e hala kua ta mai ai e taha maga toto ke he fale uta fano he tutuutaga ke eke mo lukutoto ke he mena tapu, aua neke kai ia; ka e huhunu ai ke he afi.