Levitika 7:1-38
7 KO e fakatufono hanai ke he poa ha ko e hehe; kua tapu ue atu haia.
2 Ko e mena kua keli ai e lautolu e poa huhunu, kia keli ai foki e poa ha ko e hehe, ti pīpī takai ai e ia hana toto ki luga he fatapoa.
3 Ti uta ai e ia hana gako oti, ko e hiku, mo e gako he kupega,
4 Ko e na fua ua mo e gako ha i ai, ha ha i luga he tokupu, ko e galu manava ki luga he ate, katoa mo e na fua ua, kia uta kehe ai e ia.
5 Ti huhunu ai he ekepoa e tau mena ia ke he fatapoa, mo poa kua eke ke he afi kia Iehova; ko e poa ha ko e hehe haia.
6 To kai ai he tau tane oti he tau ekepoa; kia kai ai ni ke he mena tapu; ko e mena tapu ue atu haia.
7 Ke tuga ne poa ha ko e hala, ke pihia foki e poa ha ko e hehe; ko e taha ni e fakatufono ke he na mena ua ia; to eke ni ma e ekepoa ne eke ai e lukutoto.
8 Ko e ekepoa foki kua uta e poa huhunu he taha tagata, to eke ni he ekepoa ia māna e kili he poa huhunu ne uta ai e ia.
9 Ko e tau poa mena kai oti foki kua tao ke he umu, mo e tau mena oti foki kua eke ke he ulo mo e lapatoa lapalapa, ko e ekepoa, kua uta ai e tau mena ia, to eke ni māna.
10 Ko e tau poa mena kai kua laku ai mo e puke lolo, katoa mo e tau mena mata, to eke ia mo e tau tama tane oti a Arona, ke fakataufata e taha mo e taha.
11 Ko e fakatufono foki hanai he poa fakaaue ke ta mai ai kia Iehova
12 Kaeke ke ta mai ai e ia mo poa fakaheke, ti ta mai ai e ia fakalataha mo e poa fakaheke, e tau areto pukupuku nakai fakaea, kua laku mo e puke lolo, mo e tau areto aleale nakai fakaea kua tākai aki he maga lolo, mo e tau areto pukupuku he falaoa mitāki kua laku mo e puke lolo.
13 Ti ta mai ai e ia fakalataha mo e tau areto pukupuku e areto kua fakaea mo poa hana; katao mo e poa fakaheke he hana poa fakaaue.
14 Ti ta mai ai e ia e taha mai he tau poa oti ke eke mo poa nikiti kia Iehova, ko e ekepoa foki ne pīpī aki e toto he poa fakaaue, to eke ia māna.
15 Ko e kakano foki he poa fakaheke he hana poa fakaaue, kia kai ai ke oti ke he aho ne ta mai ai hana poa; aua neke tokai ha mena ato a pogipogi.
16 Kaeke foki ke ta mai ai hana poa he omonuo, po ke ta mai ai mo e fakamakai, ti kai ai ke he aho ne ta mai ai; ko e mena foki ka toe kia kai ai a pogipogi.
17 Ka ko e maga kakano he hana poa kua toe, kia huhunu ai ke he afi ke he aho tolu.
18 Kaeke foki ke kai ai ke he aho tolu e taha maga he kakano he poa he hana poa fakaaue, ti nakai talia a ia ne ta mai ai e poa, to nakai talahaua kia ia; to eke ia mo mena fakalialia, ko e tagata foki ne kai ai to nofo a ia mo e kelea.
19 Aua neke kai ai foki e maga kakano kua piki ke he mena kelea; kia huhunu ia ke he afi; ka ko e kakano he poa, kia kai ia e lautolu oti kua mea.
20 Ka ko e tagata kua kai ai e maga kakano he poa fakaaue, ko e mena a Iehova, ka e ha ia ia e mena ke kelea ai a ia, to vevehe kehe e tagata ia mo e hana motu.
21 Ko e tagata foki kua pipiki ke he mena kelea, ko e mena he tagata ke kelea ai, po ke manu kelea, po ke taha mena kelea ke kelea ai, ti kai ai e ia e maga kakano he poa fakaaue, ko e mena a Iehova, to vevehe kehe e tagata ia mo e hana motu.
22 Kua vagahau mai foki e Iehova kia Mose, kua pehe mai,
23 Kia vagahau atu a koe ke he fanau a Isaraela, mo e pehe atu, Aua neke kai ai e mutolu e gako he povi, mo e mamoe, mo e koti.
24 Ko e gako foki he manu ne mate noa, mo e gako he manu ne hēhē, kua lata ia ke eke aki falu a mena; ka e aua neke kai ai e mutolu.
25 Ha ko ia kua kai e tau manu ne fa uta ai mo poa kua eke ke he afi kia Iehova, ko ia kua kai ai to vevehe kehe e tagata ia mo e hana motu.
26 Ua kai e mutolu e toto, po ke toto he tau manu lele, po ke toto he tau manu totolo, ke he tau mena oti kua nonofo ai a mutolu.
27 Ko e tagata kua kai e maga toto, to vevehe kehe e tagata ia mo e hana motu.
28 Kua vagahau mai e Iehova kia Mose, kua pehe, mai,
29 Kia vagahau atu a koe ke he fanau a Isaraela, mo e pehe atu, Ko ia kua ta mai hana poa fakaaue kia Iehova, kia ta mai ai e ia hana poa, he hana poa fakaaue kia Iehova.
30 Kia ta mai ai e ia ke he hana tau lima e poa kua eke ke he afi kia Iehova; ko e gako katoa mo e fatafata, kia ta mai ai e ia e fatafata ke lialiāki, ko e poa lialiaki ki mua a Iehova haia.
31 Ti huhunu ai he ekepoa e gako ke he fatapoa; ka ko e fatafata to eke ia ma Arona mo e hana tau tama tane haia.
32 Ko e lima matau foki kia uta e mutolu ke he ekepoa ke eke mo poa fakaaue.
33 Ko ia he tau tama tane a Arona kua ta mai e toto he poa fakaaue katoa mo e gako, to eke ni e ia e lima matau mo tufaaga māna.
34 Ka ko e fatafata he poa lialiaki, mo e lima he poa nikiti, kua uta tuai e au mai he fanau a Isaraela mai he tau poa fakaaue ha lautolu, mo e tuku atu ai ma Arona ko e ekepoa mo e hana tau tama tane, ko e fakatufono tukulagi ia mai he fanau a Isaraela.
35 Ko e tufaaga hanā a Arona, mo e tufaaga he hana tau tama tane, mai he tau poa kua eke ke he afi kia Iehova, ke he aho ne fakatata mai ai a lautolu ke eke mo tau ekepoa kia Iehova.
36 Ne poaki mai ai e Iehova ke ta atu kia lautolu mai he fanau a Isaraela, ke he aho ne fakauku ai a lautolu, ko e fakatufono tukulagi haia ke he tau hau ha mutolu a mui.
37 Ko e fakatufono hanā ke he poa huhunu, ko e poa mena kai, mo e poa ha ko e hala, mo e poa ha ko e hehe, mo e poa he fakatuaga, mo e poa fakaaue;
38 Ne poaki mai ai e Iehova kia Mose ke he mouga ko Sinai, ke he aho ne poaki mai e ia ke he fanau a Isaraela ke ta mai ai ha lautolu a tau poa kia Iehova ke he tutakale ko Sinai.