Levitika 9:1-24
9 KUA hoko ke he aho valu, ti ui atu ai e Mose kia Arona mo e hana tau tama tane, katoa mo e tau patu a Isaraela;
2 Ti pehe atu a ia kia Arona, Kia uta e koe māu e punua povi ke eke mo poa ha ko e hala, mo e mamoe tane ke eke mo poa huhunu, kia katoatoa e mitaki a laua, ti ta mai ai ki mua a Iehova.
3 Ti vagahau atu a koe ke he fanau a Isaraela mo e pehe atu, kia uta e mutolu e koti tane ke eke mo poa ha ko e hala, ko e tama povi foki mo e punua mamoe kua tau taha mo e katoatoa e mitaki a laua, ke eke mo poa huhunu.
4 Ko e povi tane foki, mo e mamoe tane ke eke mo poa fakaaue, ke eke ai mo poa ki mua a Iehova, mo e poa mena kai kua laku ai mo e puke lolo, ha ko e aho nai ke fakakite mai ai a Iehova kia mutolu.
5 Ti uta e lautolu ki mua he fale uta fano he tutuutaga e mena ne poaki atu ai e Mose, ti fakatata mai ai e fakapotopotoaga katoa, mo e tutu ki mua a Iehova.
6 Ti pehe atu foki a Mose, Ko e mena hanai ne poaki mai e Iehova ke eke e mutolu kia fakakite mai ai kia mutolu e lilifu a Iehova.
7 Kua pehe atu foki a Mose kia Arona, kia fakatata a koe ke he fatapoa, mo e eke ai e poa ha ko e hala, mo e poa huhunu, ke eke mo lukutoto māu katoa ni mo e motu, ti eke e koe e poa ma e motu, ke eke ai mo lukutoto ha ko lautolu, ke lata mo e mena ne poaki mai ai e Iehova.
8 Ti ta mai e Arona e punua povi ke he fatapoa, mo e keli ai ke eke mo poa ha ko e hala, ko e poa ia māna.
9 Ti ta mai he tau tama tane a Arona e toto kia ia; ti fuifui ai e ia hana matalima ke he toto, mo e tuku ai ke he tau tapunu he na hoe he fatapoa, ti liligi ai e toto ke he kelekele he fatapoa;
10 Ka ko e gako, mo e na fua, mo e galu manava ki luga he ate, he poa ha ko e hala, ne huhunu ai e ia ki luga he fatapoa, tuga ne poaki mai ai e Iehova kia Mose.
11 Ka ko e kakano mo e kili ne huhunu ai e ia ke he afi ki tua he heaga api.
12 Ti keli ai e ia e poa huhunu, ti uta he tau tama tane a Arona e toto kia ia; ti pīpī takai ai e ia ki luga fatapoa.
13 Ti uta e lautolu kia ia e poa huhunu, ko e hana tau maga kakano, katoa mo e ulu, ti huhunu e ia a ia ki luga he fatapoa.
14 Ti fuifui ai e ia e gakau mo e tau hui ke he vai, mo e huhunu ai ki luga he poa huhunu ke he fatapoa.
15 Ti ta mai ai e ia e poa he motu, ti uta e ia e koti tane, ko e poa ha ko e hala ma e motu, ti keli foki a ia, mo e eke ai mo poa ha ko e hala, tuga ne mena fakamua.
16 Ti ta mai foki e poa huhunu, mo e eke ai tuga ne poakiaga.
17 Ti ta mai foki e ia e poa mena kai, ti aku mai ai e ia hana puke aloalolima mo e huhunu ai ki luga he fatapoa, katoa foki mo e poa huhunu ke he magaaho pogipogi.
18 Ti keli foki e ia e povi tane mo e mamoe tane ke eke mo poa fakaaue, ma e motu; ti uta he tau tama tane a Arona e toto kia ia; ti pīpī takai ai e ia ki luga he fatapoa.
19 Ka ko e gako he povi tane mo e mamoe tane, ko e hiku, mo e kupega, mo e na fua, mo e galu manava ki luga he ate;
20 Ti tuku e lautolu e gako ki luga he fatafata, ti huhunu ai e ia e gako ke he fatapoa.
21 Ti lialiaki ai e Arona e fatafata mo e lima matau, ko e poa lialiaki ki mua a Iehova, tuga ne poaki atu ai kia Mose.
22 Ti nikiti ki luga e Arona hana tau lima ke he motu, mo e fakamonuina atu e ia kia lautolu; ti hifo mai a ia he eke e poa ha ko e hala mo e poa huhunu, mo e poa fakaaue.
23 Ti huhu atu ai a Mose mo Arona ke he fale uta fano he tutuutaga, ti huhu mai ke he motu, ti fakamonuina atu e laua ke he motu, ti fakakite mai ai e lilifu a Iehova ke he motu oti.
24 Ti fina atu ai e afi mai mua a Iehova, mo e huhunu ai e poa huhunu ki luga he fatapoa, katoa foki mo e gako, ne kitia he motu oti, ti kalaga a lautolu, mo e veveli fakafohifo ai.