Lologo a Solomona 1:1-17
1 KO e lologo ne mua ue atu, a Solomona haia.
2 Kia figita e ia au mo e tau figita he hana fofoga; ha ko e mena mua e mitaki hāu a fakaalofa mai ke he uaina.
3 Kua manogi mitaki hāu a tau puke lolo kua eke e higoa hau ke tuga ne puke lolo kua liligi; ko e mena ia kua manako kia koe e tau tamafine ikiiki oti.
4 Kia toho atu e koe au; to tafepoi a mautolu mo e mumui atu kia koe, Kua takitaki he patuiki au ke he hana tau poko; to fiafia a mautolu mo e olioli kia koe, kua lahi e manatu ha mautolu ke he hāu a fakaalofa mai ka e tote e manatu ke he uaina; kua manako e tau tagata tututonu kia koe.
5 Ko e tau tama fifine a Ierusalema na e, kua uli au, ka e mitaki, tuga ne tau fale ie a Kitara, tuga ne tau ie puipui a Solomona.
6 Ua kitekite mai a mutolu kia au, he uli au; ha kua lagina au. Ne ita mai kia au e fanau he haku a matua fifine; ne kotofa e lautolu au mo leveki he tau ulu vine; ka ko e uluvine haku nakai ni leveki e au.
7 Ko koe na kua manako ki ai haku loto, kia talahau mai ā kia au e mena kua fagai ai e koe hāu a fuifui mamoe, ko e mena kua uta e koe ki ai hau a fuifui mamoe ke tatakoto ai ke he tupoula; ha kua eke he ha au po ke tagata nakai fahia he faifano ke he tau fuifui mamoe ha lautolu ne fakalataha mo koe?
8 Kaeke kua nakai iloa e koe, ko koe na ne mitaki ue atu he tau fifine, kia fina atu a koe ke he tau tuagahui he fuifui manu, mo e fagai e koe hāu a tau punua koti tata age ke he mena kua nonofo ai e tau leveki mamoe.
9 Haku a kapitiga na e, kua fakatai e au a koe ke he tau solofanua ke he tau kariota a Farao.
10 Kua fulufuluola hāu a tau kauvehe ke he tau lauulu kua fili; ko e ua hāu foki ke he tau kahoa.
11 To eke e mautolu māu e tau filifili auro mo e tau mahina ario.
12 Kua manogi haku a lolo nato he haele ai e patuiki mo e taumafa ai a ia.
13 Ko e kofukofu pili muro haku a fakahele kia au; ko e kahoa ia he haku a ua ke he po katoa.
14 Ko e fuhi koferu haku a fakahele kia au ke he uluvine i Enekati.
15 Kitiala, haku a kapitiga na e, kua mitaki a koe, kua tuga ne tau mata lupe hāu a tau fofoga.
16 Kitiala, haku a fakahele na e, kua mitaki a koe, kua fulufuluola ni; ko e tau lau uhiuhi ha taua a moheaga.
17 Ko e tau akau fakalava he fale ha taua ko e tau arasi haia, kua eke ai e fale ha taua i luga ke he tau perosi.