Lologo a Solomona 2:1-17
2 KO au ko e fiti lakau i Sarona; ko e susana he pahua.
2 Tuga ne susana ke he vaha he tau akau talatala kua pihia haku a kapitiga ke he vaha loto he tau tama fifine.
3 Tuga ne moli ke he vaha loto he tau akau he vao, kua pihia haku a fakahele fakalataha mo e tau fuata. Ne fiafia au ke he hana fakamalu, mo e nofo ai au; ne humelie foki hana tau fua ke he gutu haku.
4 Ne ta mai e ia au ke he fale ke inu ai e uaina; ko e matini foki hana ki luga haku ko e fakaalofa haia.
5 Kia fakamalolo aki e mutolu au ke he tau lafiaga fua vine tavaki; kia fakamafana ai e mutolu au ke he tau fua moli; ha kua lolelole au he haku a fakaalofa atu.
6 Ha ha i lalo he ulu haku hana lima hema, kua peka mai foki kia au hana lima matau.
7 Ko e tau tama fifine a Ierusalema na e, kua pehe atu au kia omonuo mai a mutolu ke he tau sevi mo e tau aila he vao, ke aua neke fakalagalaga e mutolu po ke fafagu e mutolu haku a fakahele ato loto ki ai a ia.
8 Ko e leo he haku a fakahele! kitiala, kua hau a ia kua hopohopo ki luga he tau mouga, kua hopohopo fakalahi foki a ia ki luga he tau matiketike.
9 Kua tuga ne sevi po ke punua aila haku a fakahele. Kitiala, kua tu mai a ia ki tua he kaupa ha tautolu; kua kitekite mai a ia he fakamaama, kua kitia a ia mai he fakamaama kua fakapupu po ke kupega.
10 Ne vagahau mai haku a fakahele, kua pehe mai kia au, Haku a kapitiga na e, haku moka mitaki na e, kia matike mai a ti hau a koe,
11 Ha ko e mena, kitiala, kua mole atu e vaha makalili, kua mole atu e tau uha, kua fakahiku ia.
12 Kua kitia tuai e tau fiti lakau ke he fonua; kua hoko mai e vaha ke taute ai e tau vine; kua logona foki e leo he kulukulu ke he motu ha tautolu;
13 Kua momoho e tau fua mati ne momoho fakamui; kua manogi mai e tau vine kua fiti. Haku kapitiga na e, haku moka mitaki na e, kia matike a, ti hau a koe.
14 Haku a lupe na e, ne ha i ai ke he tau poko maka he maka tumau mo e mena galo he tau mena papati, kia fakakite mai a hāu a mata kia au; kia fanogonogo au ke he leo hāu; ha kua mitaki e leo hāu, kua mitaki hāu a mata.
15 Kia tapaki a ma tautolu e tau alope, ko e tau alope ikiiki kua moumou e tau vine; ha kua fiti e tau vine ha tautolu.
16 Ko e haku fakahele ko e haku ni a ia, kua eke foki au māna; kua fagai e ia hana fuifui manu ke he vaha loto he tau susana.
17 Haku fakahele na e, kia liu mai a ato hoko ke he magaaho hauhau, ato mole atu foki e ata, kia eke a koe ke tuga ne sevi po ke punua aila ke he tau mouga ko Petere.