Lologo a Solomona 4:1-16
4 HAKU a fakahele na e, kua mata mitaki a koe, kitiala kua mata mitaki a koe; kua tuga ne tau mata lupe hāu a tau mata i loto e ie ufimata hāu. Ko e hāu a lauulu kua tuga ne tau fulu koti he fuifui koti kua tatakoto ai ke he mouga ko Kiliata.
2 Ko e tau nifo hāu kua tuga ne fuifui mamoe fifine kua helehele e tau fulu kua o hake mai he takeleaga; ko e takiua e punua ha lautolu oti, ti nakai ha ha i ai taha ia lautolu kua mamate hana tau punua.
3 Ko e hāu a tau laugutu kua tuga ne manoa kula momoho, kua fulufuluola foki hāu a gutu; ko e hāu a tau ofoofo kua tuga ne maga fua rimoni i loto hāu a ie ufimata.
4 Ko e ua hāu kua tuga ne kolo a Tavita, ne ati ke toka ai e tau kanavaakau; ne taha e afe akau punuti ne tautau ai, ko e tau akau punuti he tau toa e tau akau punuti oti ia.
5 Ko e na huhu ua hāu kua tuga ne tau punua sevi ua ne fanau ua ai he sevi taha, kua totolo ai a lautolu ke he vaha loto he tau susana.
6 To fina atu au ke he mouga ne moua ai e muro, mo e matiketike ne toka ai e pili lipano; ato hoko ke he magaaho hauhau, ato mole atu foki e ata.
7 Haku kapitiga na e, kua mitaki hāu a tino oti, nakai ni fai ila kia koe.
8 Kia o a taua i Lepanona, haku hoana na e, kia o a taua i Lepanona. Kia kitekite a taua mai he tapunu mouga a Amana, mo e tapunu mouga a Senira, mo Heremoni, mai he tau ana leona foki, mo e tau mouga he tau nameri.
9 Kua fakamalolo e koe au haku mahakitaga na e, haku hoana na e; kua fakamalolo e koe au ke he taha he hāu a na mata, mo e taha kahoa mai he ua hāu.
10 Haku mahakitaga na e, haku hoana na e, kua homo atu hāu a fakaalofa mai! kua mua he mitaki e fakaalofa hāu ke he uaina! kua mua foki e manogi he hāu a tau puke lolo, ke he tau mena manogi oti kana.
11 Haku hoana na e, kua hihina hifo e meli he hāu a tau laugutu; ha ha i lalo he alelo hāu e meli mo e puke huhu; ko e namu foki he tau tapulu hāu kua tuga ne namu a Lepanona.
12 Ko e haku a mahakitaga na e, ko e haku hoana na e, ko e kaina kua puipui a ia; ko e vaikeli kua puipui; ko e vaipuna kua fakamau fakamailoga.
13 Ko e hāu a tau akau mui ko e ulu rimoni haia, mo e hana tau fua kua mua he mitaki; ko e kofera katoa mo e nato,
14 Ko e nato mo e karoko; ko e kani mo e kinamoni, katoa mo e tau akau oti ko e tau lipano; ko e muro mo e aloe; katoa mo e tau lakau oti kua mua he manogi;
15 Ko koe ko e vaipuna ke he kaina, ko e vaikeli, ko e vai he moui; ko e vailele foki kua tafe mai i Lepanona.
16 Ko e matagi tokelau na e, kia ala mai a; ko e matagi toga na e, kia hau a; kia agi mai a ke he hāu a kaina, kia mapuke mai ai hana tau mena manogi. Kia haele mai haku a fakahele ke he hana kaina, mo e taumafa ai hana tau fua ne mitaki ue atu.