Lologo a Solomona 6:1-13
6 KO koe na kua mitaki ue atu he tau fifine, kua fano ki fe hāu a fakahele, po kua afe age ki fe hāu a fakahele, kia kumi e tautolu mo koe a ia?
2 Kua hifo haku a fakahele ke he hana kaina, ke he tau ulu pasama, ke taumafa ai a ia ke he hana kaina, mo e tau ai e tau fiti susana.
3 Kua eke au ma e haku a fakahele, kua eke foki a ia maaku; kua fagai ai e ia hana fuifui manu ke he vaha loto he tau susana.
4 Haku fakahele na e, kua mitaki a koe, tuga na Tiresa; kua mitaki tuga na Ierusalema; kua matakutakuina tuga ne kau he ha i ai e tau matini.
5 Kia haga kehe e koe hāu a tau fofoga ia au, ha kua matakutaku ai au; ko e hāu a lauulu kua tuga ne tau fulu koti he fuifui koti kua tatakoto ai ke he mouga ko Kiliata.
6 Ko e tau nifo hāu kua tuga ne fuifui mamoe fifine kua hake mai he takeleaga; ko e takitaha a lautolu oti mo e fanau ai e tau mahaga, ti nakai ha ha i ai foki taha ia lautolu ne mamate hana tau punua.
7 Kua tuga ne maga rimoni hāu a tau ofoofo i loto he ufimata hāu.
8 Ne tokoonogofulu e patuiki fifine; mo e tokovalugofulu e hoana fakahoa; ko e tau tamafine ikiiki foki nakai ni maeke ke totou he tokologa.
9 Ko e haku a lupe, ko e haku tagata kua katoatoa hana mitaki, ne tokotaha a ia, ne tokotaha a ia he hana matua fifine, ko e fakahele a ia hana ne fanau a ia. Ne kitekite mai e tau tama fifine kia ia, ti fakamonuina ai e lautolu a ia. Ko e tau patuiki fifine mo e tau hoana fakahoa ne fakaheke atu foki a lautolu kia ia.
10 Ko hai kia hanā kua kikila mai tuga ne matafatafaata he aho; kua mitaki mai po ke mahina; kua kikila mai po ke lā; kua matakutakuina tuga ne kau ha ha i ai e tau matini?
11 Ne hifo au ke he kaina haku ne to ai e tau ekosi, ke kitekite ke he tau mena kua tutupu ai he pahua, ke kitekite po ke gotogoto mai nakai e vine, po ke matala nakai e tau fiti rimoni?
12 Ka kua nakaila iloa e au kua tuku ai au he haku loto ke he tau kariota a Aminatipo.
13 Liu mai a, kia liu mai a koe, ko e fifine Sulamita na e, kia liu mai a koe, liu mai a, kia kitekite atu a mautolu kia koe. Kua kitekite he ha a mutolu ke he fifine Sulamita? Ke tuga ne koli i Mahanaima?