Lologo a Solomona 7:1-13
7 KO e tama fifine he iki na e, ku fulufuluola na ati kehe hāu a tau hui ke he tau afialoalohui; ko e tau tutakiaga he hāu a tau patupula kua tuga ne kahoa kua eke he tau lima he tufuga.
2 Ko e hāu a pito kua tuga ne kapiniu veliveli ne toka ai e uaina kua fiofio; ko e hāu a manava kua tuga ne fakapotopotoaga fua saito, kua fakatutu ai e tau fiti susana.
3 Ko e na huhu ua hāu kua tuga ne tau punua sevi ua, ne fanau ua ai he sevi taha.
4 Ko e ua hāu kua tuga ne kolo ne ati aki ke he tau nifo elefane; ko e hāu a tau mata kua tuga ne vai namo i Hesepona ne tata age ke he gutuhala i Peterepima; ko e hāu a ihu kua tuga ne kolo a Lepanona ne fakafehagai mo Tamaseko.
5 Ko e hāu a ulu ki luga hāu kua tuga a Karamelu, mo e hāu a lauulu kua tuga ne ie kula uhi; kua lili ai e patuiki ke he hāu a lauulu.
6 Ko e fakahele na e, kua tino mitaki lahi a koe, kua fulufuluola lahi ni a koe, ke fiafia ki ai.
7 Ko e tokoluga nai hāu kua lata mo e tokoluga he pama; ko e tau huhu hāu foki kua tuga ne tau fuhi fua vine.
8 Ne pehe au, To hake au ke he pama, to toto atu e au ke he hana tau lau; kia eke hāu a tau huhu ke tuga ne tau fuhi fua vine, mo e namu he hau a ihu ke tuga ne fua moli.
9 Ko e hāu a fofoga foki kua tuga ne uaina mitaki ma e haku a fakahele kua hifo fakahakohako, kua hifo fakatekiteki ai he tau lau gutu ha lautolu ne momohe.
10 Kua eke au ma e haku a fakahele, kua hagao mai foki kia au hana manako.
11 Haku fakehele na e, kia hau a, ke o a taua ke he vao; mo e momohe ai ke he tau maga.
12 Kia uhu matike a taua mo e o atu ke he tau ulu vine, mo e kitekite ai po ke gotogoto mai nakai e tau vine, po ke matala nakai hana tau fiti, po ke tupuolamoui foki nakai e tau rimoni; to fakaalofa atu au kia koe ke he mena ia.
13 Kua manogi mai e tau fua tutaima; kua tata mai foki ke he gutuhala ha taua e tau fua mena oti kua mitaki ue atu; ko e tau fua mena fakaulu tau, katoa mo e tau fua mena kua leva he toka, ne tatanaki e au māu haku fakahele na e.