Lologo a Solomona 8:1-14
8 ANE mai kua eke a koe mo tugane haku, ne kai e huhu he haku matua fifine po kua mitaki ni! po kua taufigita a taua mo koe he kitia e au a koe ki fafo; ka e nakai fakavihia mai a lautolu kia au.
2 Po kua takitaki e au a koe, mo e ta mai e au a koe ke he fale he haku a matua fifine, kia fakaako mai e koe au; ti ta atu e au kia koe e uaina manogi, mo e huhua he haku a tau fua rimoni ke inu ai a koe.
3 Ha ha i lalo haku ulu hana lima hema, kua peka mai foki kia au hana lima matau.
4 Ko e tau tama fifine a Ierusalema na e kua pehe atu au kia omonuo mai a mutolu, ke aua neke fakalagalaga e mutolu, po ke fafagu e mutolu haku a fakahele ato loto a ia ki ai.
5 Ko hai kia hanā kua hake mai he tutakale, kua falanaki ai ke he hana fakahele? Ne fafagu e au a koe i lalo he moli; ne mamahi fanau ai hāu a matua fifine kia koe ke he mena ia; ne mamahi fanau a ia mo e fanau mai e ia a koe he mena ia.
6 Kia tuku e koe au po ke fakamau fakamailoga ke he hāu a loto, ke tuga ne fakamau fakamailoga ke he hāu a lima; ha ko e mena malolo e fakaalofa tuga ne mate; kua favale e ita-tafuā tuga ne tukuaga; ko e hana puho ko e puho he afi haia kua puho lahi mahaki ni.
7 Nakai maeke ke he tau vai loga ke tamate e fakaalofa, nakai maeke ke tafia ai he tau vailele. Ane mai kua ta age he tagata e tau koloa oti he hana fale kia ofania a ia po kua vihiatia ni.
8 Ha ha ia mautolu e mahakitaga tote kua nakai fai huhu a ia; ko e heigoa kia e mena ke eke e tautolu mo e mahakitaga ha mautolu ke he aho ka utu vagahau mai ai kia ia?
9 Kaeke ko e kaupa a ia, ti ati hake ai e tautolu e kolo ario ki luga hana; ka ko e mena kaeke ko e gutuhala a ia, ti puipui aki e tautolu a ia ke he tau lapa arasi.
10 Ko au ko e kaupa ko e haku tau huhu foki kua tuga hana tau kolo; ti eke au ki mua hana tuga ne taha kua ofania.
11 Ha ha ia Solomona e ulu vine i Paalahamoni; ne tuku atu e ia e ulu vine ke he tau tagata leveki ulu vine; ke takitaha a lautolu mo e ta mai ai taha e afe tupe ario ha ko e hana, tau fua.
12 Ko e ulu vine haku, ko e haku ni haia, ha ha i mua haku ia. Solomona na e, taha e afe ke eke e koe māu; ka e ua e teau ma lautolu ne leveki hana tau fua.
13 Ko koe na kua nofo ke he tau kaina, kua fanogonogo a lautolu ne fakalataha mo koe ke he leo hāu; kia fakafanogonogo mai au foki ki ai.
14 Haku fakahele na e, kia hola a a koe, kia eke a koe ke tuga ne sevi po ke punua aila i luga he tau mouga ne toka ai e tau mena manogi.