Luka 10:1-42
10 KUA mole e tau mena ia, ti kotofa ai he Iki e falu ne tokofitugofulu, kua fakafano atu a lautolu ke takitokoua, ke mumua kia ia ke he tau māga mo e tau mena oti ko e haele ne fai a ia ki ai.
2 Kua tala age foki a ia kia lautolu, Kua loga e tau saito ke helehele, ka ko e tau tagata gahua, kua tokogahoa a lautolu; kia olelalo a mutolu ke he Iki hana e tau saito ke helehele, kia fekau atu e ia e falu ke gahua ke he hana tau saito ke helehele.
3 Ati o atu a, kitiala, kua fakafano atu e au a mutolu ke tuga e tau punua mamoe ke he vaha he tau luko.
4 Ua uta e mutolu e kato tupe, po ke kato, po ke tau afialoalohui; ua fakaalofa atu foki a mutolu kia taha ke he puhala.
5 Ko e fale ke huhu atu a mutolu ki ai, kia pehe atu fakamua a mutolu, Kia monuina e faoa nai.
6 Kaeke ko e tagata he monuina ha i ai, to hoko kia ia ha mutolu a fakamonuina; ka nakai, ti liuaki mai ai kia mutolu.
7 Kia nonofo a mutolu he fale ia ke kai mo e inu e tau mena ka ta mai ai e lautolu; ha kua lata e eke gahua mo e hana palepale. Ua o fano a mutolu ke he taha fale mo e taha fale.
8 Ko e māga ke hohoko atu a mutolu ki ai, kua talia foki e lautolu a mutolu, kia kai a mutolu e tau mena ka fakatokatoka mai ai kia mutolu;
9 Kia fakamalolo foki e mutolu e tau tagata gagao ha i ai, ti tala age kia lautolu, Kua tata kia mutolu e kautu he Atua.
10 Ka ko e māga ke hohoko a mutolu ki ai, ti nakai talia e lautolu a mutolu; kia o a mutolu ke he tau male ha lautolu, mo e pehe age,
11 Ko e kelekele ni mai he māga ha mutolu, kua piki mai kia mautolu, ke holoholo atu e mautolu kia mutolu; ka kia iloa e mutolu e mena nai, kua tata tuai kia mutolu e kautu he Atua.
12 Kua tala atu e au kia mutolu, ko e aho haia ke laukauka ai a Sotoma ke he māga ia.
13 Oi fakaalofa kia koe ma Korasina! Oi fakaalofa kia koe ma Petesaita! ane mai eke i Turo mo Saitonu e tau mana ne eke ia mutolu, po kua tokihala tigahau a lautolu mo e nonofo ke he ie kafu popo mo e efuefu afi.
14 Ka e laukauka a Turo mo Saitonu ke he fakafiliaga kia mutolu.
15 Ko koe foki ma Kapanaumi, kua fakatokoluga, ati hoko ke he lagi, to palu hifo ni a koe ke he po.
16 Ko ia ke fanogonogo kia mutolu, kua fanogonogo a ia kia au; ko ia ke totoko kia mutolu, kua totoko a ia kia au; ko ia foki ne totoko kia au, kua totoko atu a ia kia ia ne fakafano mai au.
17 Kua liliu mai tuai e tokofitugofulu mo e fiafia, kua pehe mai, Ko e Iki na e, kua fanogonogo mai e tau temoni kia mautolu, ha ko e hau a higoa.
18 Kua tala age a ia kia lautolu, Ne kitia e au a Satani kua to mai he lagi tuga ne uhila.
19 Kitiala, ke foaki atu e au kia mutolu e pule ke holi ai e tau gata mo e tau akarava, katoa mo e malolo oti he fi; nakai fakai foki taha mena ke kelea ai a mutolu.
20 Aua foki neke fiafia a mutolu ke he mena nai, he fanogonogo e tau agaga kia mutolu; ka ko e hanai ke fiafia ai a mutolu, he tohi ha mutolu a tau higoa ke he lagi.
21 Ko e magaaho ia kua fiafia lahi ai e finagalo a Iesu, ti kua pehe age a ia, Kua fakaaue au kia koe ma Matua na e, ko e Iki he lagi mo e lalolagi, he ufiufi e koe e tau mena nai he tau tagata iloilo, mo e loto matala, ka kua fakakite atu ai ke he tau tama mukemuke; ko e haia ma Matua na e, ha ko e hau a finagalo ni haia.
22 Kua tuku mai he haku a Matua e tau mena oti kia au; nakai iloa foki e taha e Tama, ko e Matua hokoia; nakai iloa foki e taha e Matua, ko e Tama hokoia, mo e tagata kua loto e Tama ke fakakite atu ki ai.
23 Kua haga atu a ia ke he hana tau tutaki, kua tala age fakatekiteki, Uhoaki e tau mata ha lautolu kua kitia he tau mena kua kitia e mutolu;
24 Ha ko e mena ke tala atu e au kia mutolu, tokologa e tau perofeta mo e tau patuiki ne fia mamata ke he tau mena nai kua kitia e mutolu, ka e nakai kitia e lautolu; ne fia fanogonogo foki ke he tau mena nai kua fanogonogo ai a mutolu, ka e nakai fanogonogo ai a lautolu.
25 Kitiala, kua tu e taha ako fakatufono, kua kamatamata kia ia, kua pehe mai, Ko e akoako na e, ko e heigoa e mena ke eke e au ke moua ai e au e moui tukulagi?
26 Kua tala age a ia kia ia, Ko e heigoa kua tohi ke he fakatufono? fefe hau a totou?
27 Kua tali mai a ia, kua pehe mai, Ke fakaalofa atu a koe ke he Iki hau a Atua, mo e hau a loto katoa, mo e hau a agaga katoa, mo e hau a malolo katoa, mo e hau a manatu katoa; ke fakaalofa atu foki a koe ke he tagata ne katofia mo koe, kia tuga ni a koe kia koe.
28 Ati pehe age ai a ia kia ia, Ko e moli a koe; kia eke pihia e koe, ti moui ai.
29 Ka kua fia fakatututonu e ia a ia, kua tala age kia Iesu, Ko hai kia e tagata ne katofia mo au?
30 Kua tala age a Iesu kua pehe age, Ko e taha tagata ne hifo a ia mai Ierusalema ki Ieriko, kua moua a ia he tau tagata fofo mena; kua āki e lautolu hana tau tapulu, mo e fahi a ia, kua o a lautolu, kua toka a ia, kua teitei mate.
31 Kua hifo taha ekepoa ke he puhala ia, kua kitia e ia a ia, ti fano ai a ia ke he taha kauhala.
32 Kua pihia foki mo e tagata he magafaoa a Levi, kua fano ke he mena ia, kua hoko atu mo e kitia ai; ti fano ai a ia ke he taha kauhala.
33 Ka ko e taha tagata Samaria kua fina age a ia, kua hoko ke he mena ha i ai a ia, kua kitia a ia, ti hofihofi ai hana fakaalofa kia ia;
34 Kua fano mo e pipi hana tau kafokia, kua liligi foki ki ai e magalolo mo e uaina; ti fakaheke a ia i luga he hana manu ni, kua takitaki a ia ke he fale ke api ai e tau fenoga, mo e leveki a ia.
35 Ko e pogipogi ko e fano ha ne fai a ia, ti eke mai e ia ua e tenari, kua age ke he patu he fale, mo e pehe age kia ia, Kia leveki a e koe a ia; ka fakafua foki e koe e falu a mena, to palepale e au kia koe ka liu mai au.
36 Kua manatu fefe a koe, po ko hai taha he tokotolu na ne eke mo tagata katofia kia ia ne moua he tau tagata fofo mena?
37 Ti pehe mai a ia, Ko ia ne fakaalofa atu kia ia. Ti tala age a Iesu kia ia, Ati fano a mo e eke pihia e koe.
38 Kua o a lautolu, ti afe atu ai a ia ke he taha māga; ko e taha fifine foki, ko Mareta e higoa, kua talia a ia he hana fale.
39 Ko e hana matakainaga foki, ko Maria e higoa, kua nofo a ia ki lalo ke he tau ve a Iesu, mo e fanogonogo ke he hana tau kupu.
40 Ka kua fakafita a Mareta he tuegutu, kua tu mai, mo e pehe mai, Ko e Iki na e, nakai kia manatu mai a koe, kua toka au he matakainaga haku ke eke mena tokotaha? kia tala age a koe kia ia ke lagomatai mai kia au.
41 Ka e tala age a Iesu, kua pehe age kia ia, Mareta, Mareta na e, kua fakaatukehe a koe, mo e kapaletu hau a loto ke he tau mena loga;
42 Ka e taha e mena kua aoga; kua fifili foki e Maria e mena uho, nakai maeke he uta kehe ia ia.