Luka 12:1-59
12 KUA eke e tau mena ia, ka kua fakapotopoto ai e moto tagata afe mo afe, kua feholiaki a lautolu; ti kamata ai a ia ke vagahau atu fakamua ke he hana tau tutaki, Kia kalo kehe ni a mutolu mo e mena fakaea he tau farasaio, ko e fakavai haia.
2 Ha kua nakai fai mena kua ufia ke nakai fakakite; nakai fai mena galo foki, ke nakai kitia.
3 Ko e haia foki, ko e tau mena oti kua talahau e mutolu ke he pouli, to logona ia ke he maama; ko e mena ne talahau fakatekiteki atu e mutolu ke he tau poko, to fakamatala ia ki luga he tau fale.
4 Ka e tala atu e au kia mutolu na, ko e haku a tau kapitiga, ua matakutaku a mutolu ia lautolu ne kelipopo e tino; ka mole ia, ti kua nakai tuai toe ha mena ke maeke ai e lautolu.
5 Ka e fakakite atu e au kia mutolu a ia ke matakutaku a mutolu ki ai; kia matakutaku a mutolu kia ia, ka mole he kelipopo e ia, ko e hana e pule ke liti atu ki Kehena; ko e moli, ke tala atu e au kia mutolu, kia matakutaku a mutolu kia ia.
6 Nakai kia fakafua lima e manu ikiiki ke he ua e asari? ka e nakai nimo foki taha a lautolu ki mua he Atua.
7 Ka kua oti kana he totou ha mutolu a tau lauulu. Ko e mena ia ua matakutaku ai a mutolu; kua mua a mutolu ke he tau manu ikiiki loga.
8 Kua tala atu foki e au kia mutolu, Ko e tagata ke talahau au ki mua he tau tagata, to talahaua a ia he Tama he tagata ki mua he tau agelu he Atua.
9 Ka ko ia ke fakatikai au ki mua he tau tagata, to fakatikai a ia ki mua he tau agelu he Atua.
10 Ko ia foki ke fai kupu ke he Tama he tagata, to fakamagalo a ia; ka ko ia ke kupu kelea ke he Agaga Tapu, nakai fakamagalo a ia.
11 Ka takitaki a mutolu ke he tau sunako, mo e tau iki, mo e tau patu, aua neke fakaatukehe a mutolu po ke fefe, po ke heigoa ha mutolu a tali atu, po ke tala atu ha ha e mutolu.
12 Ha ko e mena fakaako he agaga Tapu a mutolu ke he magaho ia ni ke he tau kupu ke lata ke tala atu ai.
13 Kua tala mai kia ia taha mai he moto tagata, Ko e akoako na e, kia tala age a koe ke he haku a matakainaga, kia vevehe māku e tau mena he matua ha maua
14 Ti pehe atu a ia kia ia, Teme na e, ne eke e hai au mo fakafili, mo e pule kia mutolu?
15 Ti tala age a ia kia lautolu, A mutolu, kia leveki e mutolu a mutolu neke velevelemena; ha ko e mena nakai moui taha he loga hana tau mena ha i ai;
16 Ti tala age a ia kia lautolu e fakatai, kua pehe age, Kua fua loga mai e fonua he taha tagata maukoloa;
17 Ti manamanatu hifo a ia, kua pehe, Ko heigoa e mena ke eke e au, ha kua nakai fai mena au ke tanaki ai haku a tau mena?
18 Ti pehe a ia, Hanai e mena ke eke e au; to ulu e au haku a tau fale saito, mo e ta fakalalahi; ti tanaki e au ki ai haku a tau fua mo e tau mena mitaki oti haku.
19 To pehe hifo au ke he haku a agaga, Haku agaga na e, ha ha ia koe e tau mena mitaki loga kua toka mo e tau tau loga; kia nofo fakatekiteki a, ti kai a, mo e inu, mo e fiafia ai a koe.
20 Ka kua tala age e Atua kia ia, Ko e goagoa na e, to ahi atu hau a moui mai ia koe ke he po a magaaho; to eke ma hai e tau mena ia ne taute e koe?
21 Ha ha ne pihia foki e tagata kua tanaki e tau koloa ia ia, ka e nakai maukoloa a ia ke he Atua.
22 Ati tala age ai a ia ke he hana tau tutaki, Ko e mena ia ke tala atu ai e au kia mutolu, ua fakaatukehe a mutolu he ha mutolu a moui, ke he mena ke kai ai a mutolu; po ke tau mena he tino, ke he mena ke tapulu ai a mutolu.
23 Kua mua e moui ke he mena kai; kua mua foki e tino ke he tapulu.
24 Kia manamanatu a mutolu ke he tau oreva, nakai gana saito a lautolu, ti nakai helehele saito a lautolu, to nakai fai poko a lautolu po ke fale saito, ka e fagai ni he Atua a lautolu; ka e nakai kia mua ha mutolu a mitaki ke he mitaki he tau manu?
25 Ko hai kia taha ia mutolu kua maeke ia ia he hana fakaatukehe ke fakalahi ai e loa he hana moui he taha kupita?
26 Kaeke kua nakai maeke ia mutolu e mena kiliku ke fakaatukehe a mutolu he ha ke he falu a mena?
27 Kia manamanatu a mutolu ke he tau talotalo po ke tupu fefe. Nakai gahua a lautolu ti nakai filo foki; ka e tala atu e au kia mutolu, ko Solomona mo e hana fulufuluola lahi nakai tapulu a ia poke taha he tau mena na.
28 Kaeke ke fakatapulu pihia he Atua e vao, ha ne moui mai he fonua ke he aho nai, ka e tolo a pogipogi ke he gutuumu; ka e nakai kia au atu he pihia kia mutolu, ko mutolu ne tua fakatote?
29 Ko mutolu foki, ua kumi e mutolu po ke kai a mutolu ha ha, po ke inu a mutolu ha ha; ua fakauaua foki ha mutolu a tau loto.
30 Ka ko e tau mena oti ia, kua kumi he tau motu he lalolagi; kua fioia foki he Matua ha mutolu kua aoga e tau mena ia kia mutolu.
31 Ka kia kumi e mutolu e kautu he Atua; ati lafi mai ai e tau mena oti ia kia mutolu.
32 Ua matakutaku a koe e fuifui mamoe gahoa na e; ha ko e mena finagalo ha mutolu a Matua ke foaki mai e kautu kia mutolu.
33 Kia fakafua atu e mutolu ha mutolu a tau mena, ti age ai e mutolu e tau mena fakaalofa; kia eke e mutolu e tau kato nakai popo ma mutolu, ko e koloa he lagi nakai tuai oti, nakai fakatata ki ai ha kaiha ti nakai kai foki he moko.
34 Ha ko e mena ha i ai ha mutolu a koloa, ha ha i ai foki mo e ha mutolu a tau loto;
35 Kia pipi ha mutolu a tau tokupu, kia puho foki ha mutolu a tau lamepa;
36 Ko mutolu foki, kia tuga e tau tagata a mutolu ne talifaki atu ke he iki ha lautolu, ato liu mai a ia he kaiaga mena; ka hau a ia mo e tukituki mai, ti vevete mai agataha e lautolu e puhala kia ia.
37 Uhoaki e tau fekafekau ia, ka moua mai a lautolu he iki ka hau, ha ne mataala agaia, Ko e moli, ke tala atu e au kia mutolu, to pipi e ia a ia, ti tala age kia lautolu ke takoto ke kai mena, ti fina age ni a ia, mo e fekafekau kia lautolu.
38 Kaeke ke hau a ia ke he leoleoaga ne ua he po, po ke hau ke he leoleoaga ne tolu he po, ka moua a lautolu ka kua pihia uhoaki e tau fekafekau ia.
39 Ka kia iloa e mutolu e mena nai, ane mai ke iloa he patu he fale e magapo ke hau ai e kaiha, po kua leveki e ia, ka e nakai toka e ia hana fale kia keli ki ai.
40 Hanai, kia nonofo tauteute a mutolu; ha ko e magaaho nakai manatu ai e mutolu, ke hau ai e Tama he tagata.
41 Ati tala mai ai a Peteru kia ia, Ko e Iki na e, kua tala mai kia e koe e fakatai na kia mautolu, po ke tau tagata oti?
42 Ti tala age ai e Iki, Ko hai foki e fekafekau pule, kua fakamoli a ia mo e loto matala, to kotofa a ia he hana iki ke pule ke he hana tau fekafekau, mo e age kia lautolu e tau mena kai ke he tau magaaho?
43 Uhoaki e fekafekau ia, ka hau hana iki ti moua e ia ha ne eke pihia.
44 Ko e moli, ke tala atu e au kia mutolu, to kotofa e ia a ia ke pule ke he hana tau mena oti.
45 Kaeke foki ke pehe hifo e fekafekau ia ke he hana loto, To fakamule mai hoku iki; ti kamata ai a ia ke fahi e tau fekafekau tane mo e tau fekafekau fifine, ti kai, mo e inu, mo e konahia.
46 To hau ni e iki he fekafekau ia ke he aho nakai tatali atu ai a ia, ko e magaaho foki nakai iloa e ia; ti fakahala lahi ai e ia a ia, mo e age kia ia hana taui fakalataha mo lautolu nakai Fanogonogo.
47 Ko e fekafekau foki ia kua iloa e finagalo he hana iki, ka e nakai tauteute ni a ia, ti nakai eke foki e tau mena ke lata mo e hana finagalo, to fahi fakalahi a ia.
48 Ka ko ia nakai iloa, kua eke e tau mena ke lata ai ke fahi, to fahi fakatote a ia. Ha ko ia kua foaki atu ki ai e tau mena loga, to kumi atu foki kia ia e tau mena loga; ko ia foki ne tuku atu ki ai he tau tagata e tau mena loga, to tala atu e lautolu kia ia ke fakalahi mai e tau mena.
49 Kua hau au ke liti e afi ke he lalolagi, ko heigoa e taha mena ke manako au ki ai, kaeke kua tafu tuai ainei?
50 Ko e taha papatisoaga ke papatiso ai au; kua mamahi lahi ni au ato fakahiku ai.
51 Piko kia a mutolu kua hau au ke ta atu e mafola ke he lalolagi? Kua tala atu au kia mutolu nakai; ka ko e feveheveheaki.
52 Ha ko e mena kamata he vaha nai he nonofo ke he fale taha e tokolima a tagata to feveheaki a lautolu, to vevehe e tokotolu mo e tokoua, ko e tokoua foki mo e tokotolu.
53 To feveheaki e matua tane mo e tama tane, ko e tama tane foki mo e matua tane; ko e matua fifine mo e tama fifine, ko e tama fifine foki mo e matua fifine; ko e matua fifine mo e figona fifine hana, ko e hoana foki mo e matua fifine he tane hana.
54 Kua tala age foki a ia ke he moto tagata, Ka kitia e mutolu e aolagi ha ne hake mai i luluga, ti tala age agataha e mutolu, Ko e uha ha ne hau; ti fakamoli ai foki.
55 Ka agi mai e matagi toga, ti tala age a mutolu, Ko e la ha ne fai; ti fakamoli ai foki.
56 Ko e tau tagata fakavai na e, kua iloa e mutolu ke mailoga e mahani he lagi, mo e lalolagi; ka ko e ha kua nakai mailoga ai e mutolu e kakano he vaha nai?
57 Ko heigoa foki e mena kua nakai fakafili ai e mutolu e tau mena tonu?
58 Ka o a mua ke he iki mo e tagata ne tagi he hana tau mena ha ha ia koe, kia eke taha a koe he magahehala kia fakafeilo a mua mo ia, neke toho e ia a koe ke he fakafili, ti tuku atu he fakafili a koe ke he fekafekau, ti tuku atu foki he fekafekau a koe ke he fale puipui.
59 Kua tala atu e au kia koe, nakai fakai ke hu atu ai a koe ki fafo, ato oti pito e tau tupe he age e koe.