Luka 13:1-35
13 KO e vaha ia ne o mai ai e fala tagata kua talahau mai kia ia ke he tau tagata Kalilaia, ne fiofio e Pilato ha lautolu a tau toto, mo e tau toto he tau poa ha lautolu.
2 Kua tala age a Iesu, kua pehe age kia lautolu, Piko kia a mutolu, kua mua e hala he tau Kalilaia ia ke he tau tagata Kalilaia oti, ha kua mamahi ai a lautolu ke he tau mena pihia?
3 Kua tala atu e au kia mutolu, nakai: kaeke ke nakai tohihala a mutolu, ti malaia pihia a mutolu oti ni.
4 Mo e tokohogofulu ma valu, ne to ki luga ia lautolu e kolo i Siloa, ne mamate ai a lautolu; piko kia a mutolu kua mua ha lautolu a tau hala ke he tau tagata oti ne nonofo i Ierusalema?
5 Kua tala atu e au kia mutolu, nakai; kaeke ke nakai tokihala a mutolu, ti malaia pihia a mutolu oti ni.
6 Kua tala age a ia e fakatai nai, Ha he taha tagata e mati, ne to ke he hana ulu vine ne fano a ia ke kumi ai e tau fua, ka e nakai moua.
7 Ati tala age ai a ia ke he gahua vine, Kitiala, ko e mena hau au ke he tolu a tau ia, ke kumi fala fua ke he mati nai, ka e nakai moua e au, ati hio a ki lalo; ko heigoa foki e mena kua fakalavelave ai e ia e kaina?
8 Ka e tala age a ia, kua pehe age kia ia, Ko e iki na e, toka ai a ke he tau nai foki, ato keli takai e au, mo e age e tau mena ke tanu aki.
9 Kaeke foki ke fua mai, ti mitaki; kaeke kua nakai, ka mole ia, ati hio a e koe ki lalo.
10 Ko e taha sapati kua fakaako ai a ai ke he sunako.
11 Kitiala, kua nofo ai e fifine kua heke ai he temoni kua lolelole ai, ko e hana tau tau kua hogofulu ma valu; ti kua fakatolotolo a ia, ti nakai fahia a ia ke tu hake ki luga.
12 Kua kitia atu e Iesu a ia, ti ui atu ai a ia, kua pehe atu, Teme na e, kua vevete tuai hau a lolelole.
13 Kua fakalago atu e ia hana tau lima kia ia; ti hako agataha a ia, kua fakaaue atu foki a ia ke he Atua.
14 Ka ko ia ne pule ke he sunako, kua ita a ia he fakamalolo e Iesu ke he sapati, ti tala age a ia kua pehe age ke he moto tagata, Ne ono e aho ke lata he gahua ai; ko e tau aho ia ke o mai ai a mutolu ke fakamalolo ai, ka e toka ni e sapati.
15 Ti tala age ai e Iki kia ia, kua pehe age, Ko e fakavai na e, ka e nakai kia kua takitokotaha a mutolu mo e vevete ke he sapati hana povi po ke asini ke he fale povi, mo e takitaki ke fakainu?
16 Ka ko e fifine nai, ko e tama fifine a Aperahamo, kua lili tuai e Satani, kitiala, ko e hana tau tau ia kua hogofulu ma valu; ka e nakai kia lata ke vetevete e liliaga nai kia ia ke he sapati?
17 Kua tala age e ia e tau kupu ia, ati ma ai a lautolu oti ne ita age kia ia; ka kua fiafia e moto tagata oti ha ko e tau mena oti kua mitaki ue atu ne eke e ia.
18 Kua tala age foki a ia, Kua lata ha ha e kautu he Atua? to fakatai ki ai e au ha ha?
19 Kua lata a ia mo e fua sinapi, kua uta he taha tagata mo e tolo ke he hana kaina; kua tupu, ti eke mo akau lahi; kua momohe foki e tau manu lele ke he hana tau la.
20 Ti liu foki pehe a ia, To fakatai e au e kautu he Atua ha ha?
21 Kua lata a ia mo e mena ke fakaea aki, ne uta he taha fifine, mo e tuku ai i loto he falaoa lagatolu e fafati, ati oti ka e ea oti ai.
22 Kua fina age a ia ke he tau māga, mo e tau magamotu, kua fakaako fakahaga, ha ne fano hana fenoga ki Ierusalema.
23 Ti tala age e taha kia ia, Ko e Iki na e, to tokogaogao kia a lautolu ke fakamomoui? Ti pehe age a ia kia lautolu,
24 Kia eke taha a mutolu ke huhū atu ke he gutuhala apiapi; ha kua tala atu e au kia mutolu, to kumi e tau tagata tokologa kia huhū atu, ka e nakai maeke ni.
25 Ka oti he tu e patu he fale, mo e pa e gutuhala, ka e kamata a mutolu ke tutu i fafo, mo e tukituki e gutuhala, mo e pehe mai, Ko e Iki na e, ko e Iki na e, kia vevete mai a e koe kia mautolu; ka e ui mai a ia, kua pehe mai kia mutolu, Nakai iloa e au a mutolu po ke mai fe.
26 Ti kamata ai a mutolu ke pehe, Ne kai a mautolu mo e inu ki mua hāu, ne fakaako foki a koe ke he tau puhala ha mautolu.
27 Ti pehe mai ai a ia, Kua tala atu e au kia mutolu nakai iloa e au a mutolu po ke mai fe; ati o kehe a ia au ko mutolu oti ne eke mahani kelea.
28 Ha ha i ai e tagi aue mo e konoi he tau nifo; ka kitia e mutolu a Aperahamo, mo Isaako, mo Iakopo, mo e tau perofeta oti ke he kautu he Atua, ka ko mutolu kua vega ki fafo.
29 To o atu e tau tagata mai he fahi uta, mo e fahi lalo, mo e fahi tokelau, katoa mo e fahi toga ke tatakoto ke kai mena ke he kautu he Atua.
30 Kitiala, ha i ai falu ne fakamui to mumua ni a lautolu; ha i ai foki falu ne mumua to fakamui a lautolu.
31 Ko e aho ia ni kua o mai ai e falu a farasaio, kua tala mai kia ia, Fano a a koe, kia fano kehe, ha ko Herota kua fia kelipopo a koe.
32 Ti pehe age a ia kia lautolu, Ati o a a mutolu, mo e tala age ke he alope ia, Kitiala, kua vega e au ki fafo e tau temoni, kua fakamalolo foki e au e tau tagata gagao ke he aho nai, mo a pogipogi, ka ko anoiha ke fakahiku ai e au.
33 Ka e lata he fai fano au ke he aho nai, mo a pogipogi, katoa foki mo anoiha; ha ko e mena nakai maeke ni he mate ha perofeta ki tua a Ierusalema.
34 Ierusalema na e, Ierusalema na e, ko koe ne kelipopo e tau perofeta, mo e pinimaka a lautolu ne fakafano atu kia koe! lagaloga he manako au ke fakapotopoto e tau fanau hau, ke tuga ne moa kua fakapulupulu hana tau punua ki lalo hifo he hana tau tapakau; ka e nakai mafai a mutolu.
35 Kitiala, ke toka ai ha mutolu a fale ke moumou; ko e moli, ke tala atu e au kia mutolu, nakai fakai ke kitia e mutolu au, ato hoko atu ke he aho ke pehe ai a mutolu, Kia monuina a ia kua haele mai ke he higoa he Iki.