Luka 16:1-31
16 KUA tala age foki a ia ke he hana tau tutaki, Ko e taha tagata maukoloa ha ia ia e fekafekau kua pule; ne hokotaki a ia kia ia, kua moumou e ia hana tau mena.
2 Kua ui atu a ia kia ia, kua pehe age kia ia, Ko e heigoa e mena nai kua logona e au kia koe? Ati talahau mai a e kupu ke he tau mena ne pule a koe ki ai; ha kua nakai tuai maeke ke eke a koe mo fekafekau ke pule.
3 Ti pehe hifo ai e fekafekau ke he hana loto, Ko e heigoa e mena ke eke e au? ha ko e uta kehe ne fai he haku iki e feua haku he fekafekau pule. Nakai maeke ia au ke keli e kelekele; to ma au ke kaiole.
4 Kua iloa e au e mena ke eke e au, kia talia au he tau magafaoa ha lautolu, ka uta kehe haku a feua he fekafekau pule.
5 Ti ahi takitaha e ia e tau tagata oti ne toka ai e tau mena he hana iki, kua tala age a ia ke he taha, Po ke fiha e mena he haku a iki ne toka ia koe?
6 Ati tala age ai a ia, Teau e paita lolo. Ti pehe age a ia kia ia, Ati toto a e tohi hau, kia nofo fakaave ki lalo, mo e tohi ke lima e hogofulu.
7 Ti tala age a ia ke he taha, Po ke ne fiha e mena ha ia koe? Kua tala age a ia, Ne teau e kori saito. Ti pehe age a ia kia ia, Ati toto a e tohi hau, mo e tohi ke valugofulu.
8 Ti kua nava ai e iki ke he fekafekau hepehepe, ha kua eke e ia mo e pulotu; ha kua mua e pulotu he tau tagata he mouiaga nai ke he hau ha lautolu, ke he tau tagata he maama.
9 Ke tala atu foki e au kia mutolu, ko e koloa he mahani hepehepe kia eke ai e mutolu e tau kapitiga ma mutolu, kia talia ai e lautolu a mutolu ke he tau fale tukulagi, ka toka kehe ai a mutolu.
10 Ko ia ne fakamoli ke he mena tote, to fakamoli foki a ia ke he tau mena loga; ka ko ia ne hepehepe ke he mena tote, to hepehepe foki a ia ke he tau mena loga.
11 Kaeke foki kua nakai fakamoli a mutolu ke he koloa he mahani hepehepe, ke tuku atu e hai kia mutolu e koloa moli ke leveki?
12 Kaeke foki kua nakai fakamoli a mutolu ke he tau mena he tagata kehe, ke tuku atu e hai kia mutolu ha mutolu a tau mena?
13 Nakai maeke ke he taha fekafekau ke fekafekau ke he na iki tokoua; ha ko e mena fakavihia e ia taha, ka e fakaalofa atu ke he taha; ka nakai pihia, ti piki atu a ia ke he taha, ka e fakateaga ke he taha. Nakai maeke ia mutolu ke fekafekau ke he Atua mo Mamone.
14 Kua fanogonogo e tau farasaio ke he tau mena oti ia, ko lautolu ne velevele mena, ti va mai ai a lautolu kia ia.
15 Ati tala age ai a ia kia lautolu, Ko mutolu kua fia tututonu a mutolu ki mua he tau tagata kua fioia he Atua ha mutolu a tau loto; ha ko e mena ne mua he mitaki ke he tau tagata, kua vihiatia a ia ki mua he Atua.
16 Ha i ai e fakatufono mo e tau perofeta ato hoko ni kia Ioane; tali mai he vaha ia, kua fakamatala ai e vagahau mitaki he kautu he Atua, kua lagahou foki e tau tagata oti ke huhu ki ai.
17 Kua maeke vave ke mole atu e lagi mo e lalolagi, ka e nakai maeke ke to taha magamatatohi he fakatufono.
18 Ko ia kua tiaki hana hoana, ka e fai hoana ke he taha, kua faivao a ia; ko ia ka fai hoana, kia ia ne tiaki he hana tane, kua faivao foki a ia.
19 Ko e taha tagata maukoloa, ne tapulu ke he tapulu kula uhi mo e ie mitaki, kua makona fakahololoa ni a ia ke he tau aho oti.
20 Ko e taha tagata nofogati foki, ko Lasaro e higoa, ne takaveli a ia ke he gutuhala hana kua popo a ia.
21 Kua manako lahi a ia ke kai valavalamena ne mokulu hifo he kaiaga mena he maukoloa; ka kua o mai e tau kuli mo e epoepo hana a popo.
22 Ati oti ka e mate e tagata nofogati, kua uta he tau agelu a ia ke he fatafata a Aperahamo. Ne mate foki e maukoloa, kua tanu;
23 Ha ha he po kua matematekelea ai, ti haga hake ai, kua kitia mamao atu e ia a Aperahamo mo Lasaro ke he hana fatafata.
24 Ti ui atu a ia, kua pehe atu, Ma matua na e, ma Aperahamo, kia fakaalofa mai a koe kia au, ti fakafano mai e koe a Lasaro, kia fufui e ia e tapunu matalima hana ke he vai, ke fakamalū aki e alelo haku, nukua matematekelea au ke he afi puhopuho nai.
25 Ti pehe mai a Aperahamo, Haku tama na e, kia manamanatu a a koe ne moua e koe hau a tau mena mitaki ke he hau a mouiaga, ka e moua e Lasaro e tau mena kelea; ka ko e vaha nai, kua fakafiafia a ia hinai, ka e matematekelea a koe.
26 Nakai kuenaia e tau mena oti ia, ka kua toka mau e maihi lahi he vaha ha tautolu; kia nakai maeke ke hao ai a lautolu ne fia o atu i hinei kia mutolu; kia nakai maeke foki ke hao mai a lautolu ne fia o mai i kuna kia mutolu nai.
27 Ati tala age ai a ia, Ma matua na e, kua ole atu au kia koe, kia fakafano atu a koe a ia ke he magafaoa he haku a matua tane;
28 Ha ko e mena tokolima haku a tau matakainaga; kia talahau fakatonu atu e ia kia lautolu, neke o mai foki a lautolu ke he mena matematekelea nei.
29 Kua pehe mai a Aperahamo kia ia, ha ha ia lautolu a Mose mo e tau perofeta, kia fanogonogo a lautolu kia lautolu.
30 Ka e pehe atu a ia, Ma matua na e, ma Aperahamo; aua ia, kaeke ke fina atu taha ia lautolu ne mamate kia lautolu, ti tokihala ai a lautolu.
31 Ti pehe mai a ia kia ia, Kaeke kua nakai fanogonogo a lautolu kia Mose, mo e tau perofeta, pete ni he matike mai taha ia lautolu kua mamate, ka e nakai maeke ni a lautolu.