Luka 17:1-37
17 KUA tala age a ia ke he tau tutaki, Nakai maeke ni ke nakai hoko mai e tau mena ke tupetupe ai; oi te fakaalofa foki he tagata ke hoko mai ai.
2 Kua mitaki ia ia he pipi ke he hana ua e makaholo lahi, ti liti a ia ke he tahi; ka e kelea ni ke fakatupetupe e ia taha ia lautolu nai kua fakateaga.
3 A mutolu kia mutolu. Kaeke kua mahani kelea mai kia koe hau a matakainaga, kia akonaki atu e koe a ia; kaeke foki kua tokihala a ia, kia fakamagalo atu a koe kia ia.
4 Kaeke ke lagafitu ke he aho he mahani kelea mai kia koe, ti lagafitu ke he aho he mafoki mai kia koe, mo e pehe mai, Kua tokihala tuai au; kia fakamagalo atu a koe ki ai.
5 Ti pehe atu ai e tau aposetolo ke he Iki, Kia fakalahi e koe ha mautolu a tua.
6 Kua tala age e Iki, Ane mai kua lata ha mutolu a tua mo e fua sinapi, po kua tala age a mutolu ke he sukamina nai, Kia tāki a koe, mo e to ke he tahi; ti omaoma mai ni kia mutolu.
7 Ko hai foki taha ia mutolu kua fai fekafekau ke keli e kelekele, po ke leveki e tau mamoe, to tala age kia kia ia, ka hau a ia mai he kaina, Hau la mogoho nai ke takoto, ke kai?
8 Ka e nakai kia tala age kia ia, Ati taute mai a haku a mena kai, mo e pipi a koe, ti fekafekau mai kia au ato oti haku a kai mo e inu, ka mole ia, ti kai ai a koe mo e inu?
9 To fakaaue atu kia a ia ke he fekafekau ia, nukua eke e ia e tau mena ne poaki atu ai kia ia? toka ai, ko e nakai.
10 To pihia foki a mutolu, ka oti he eke e tau mena oti ne poaki atu ai kia mutolu, ti pehe a mutolu, Ko e tau fekafekau nakai aoga a mautolu; ha ko e tau mena kua lata ke eke e mautolu, ko e tau mena ia kua eke e mautolu.
11 Kua fenoga atu a ia ki Ierusalema, kua haele ai ke he hala Samaria mo Kalilaia.
12 Kua hoko a ia ke he taha māga, ati feleveia ai mo ia tokohogofulu e tagata lepela, kua tutu mamao mai a lautolu.
13 Kua tauui mai a lautolu, kua pehe, Ko e Iki na e, ma Iesu, kia fakaalofa mai a koe kia mautolu.
14 Kua fioia e ia, ti tala age ai a ia kia lautolu, Ati o a, ti fakakite atu a mutolu ke he tau ekepoa. Kua o a lautolu, ti fakamea ai a lautolu.
15 Ka ko e taha ia lautolu, kua iloa e ia kua fakamalolo tuai a ia, ti liu mai a ia, kua fakaheke atu ke he Atua mo e leo lahi.
16 Kua fakaveli fakafohifo a ia ke he tau ve hana, kua fakaaue kia ia; ko e Samaria foki a ia.
17 Ti tala age ai a Iesu, kua pehe age, Ka e nakai kia ko e mena fakamea e tokohogofulu? ti ko e fe kia e tokohiva?
18 Kua nakai kitia taha kua liu mai ke fakaheke atu ke he Atua, ka ko e tagata kehe nai hokoia.
19 Ti pehe age a ia kia ia, Kia matike a, ti fano; kua moui a koe he hau a tua.
20 Kua hūhu mai kia ia e tau farasaio, Po ke hoko mai a fe e kautu he Atua? Ti tali age a ia kia lautolu, kua pehe age, Nakai hau e kautu he Atua mo e kitia.
21 Nakai tala age foki a lautolu, Kitiala, ha hinei! po ke pehe, Kitiala, ha i kuna! ha ko e mena, kitiala, ha ha i ai ia mutolu e kautu he Atua.
22 Ti tala age a ia ke he tau tutaki, To hoko mai ni e tau aho ke manako lahi ai a mutolu ke kitia taha aho he Tama he tagata, ka e nakai kitia.
23 Ka tala mai e tau tagata kia mutolu, Kitiala, ha hinei? po ke pehe, Kitiala, ha i kuna! ua o a mutolu ki ai, po ke mumui atu ki ai.
24 Ha ko e mena tuga e uhila he kapa mai mai he taha fahi lagi, ti kikila atu ke he taha fahi lagi; ke pihia foki e Tama he tagata ke he hana aho.
25 Ka e lata he mamahi fakamua a ia he tau mena loga, mo e tiaki atu he hau nai.
26 Tuga foki ne eke ke he vaha kia Noa, to eke pihia ni ke he vaha he Tama he tagata.
27 Ne kai a lautolu, ne inu a lautolu, ne fai hoana a lautolu, ne fakafaitane, kua hoko ni ke he aho ne hu ai a Noa ke he vaka; ti hoko mai ai e fakapuke, kua mahaikava ai a lautolu oti.
28 Tuga foki he eke ke he vaha ia Lota, ne kai a lautolu, ne inu a lautolu, ne fakafua mai, ne fakafua atu, ne to mena, ne ta fale;
29 Ka ko e aho ia ni ne fano kehe ai a Lota i Sotoma, kua liligi hifo e afi mo e taio mai he lagi, mo e fakaoti ai a lautolo oti.
30 To eke pihia ni ke he aho ke fakakite mai ai e Tama he tagata.
31 Ko e tagata ha i luga he fale ke he aho ia, ka ko e hana tau mena ha he fale, aua neke hifo a ia ke uta; ti pihia foki a ia ha he fonua, aua neke liu mai foki a ia.
32 Kia manamanatu a a mutolu ke he hoana a Lota.
33 Ko e tagata foki ne fia kuku hana moui, to moumou ai kia ia; ka ko ia ke moumou ai, to fakahao ai e ia.
34 Kua tala atu e au kia mutolu, Ke he po ia ni, ha ha he mohega taha tokoua e tagata; to uta taha, ka e toka taha.
35 To holo fakalataha e tokoua a fifine; to uta taha, ka e toka taha.
36 Ha ha he kaina tokoua e tagata; to uta taha, ka e toka taha.
37 Ti tala mai a lautolu kia ia, kua pehe mai, Ko e Iki na e, po ko fe ka eke ai? Kua tala age a ia kia lautolu, Ko e mena ha i ai e tino, to tolo ki ai e tau aeto.