Luka 18:1-43
18 KUA tala age foki e ia e fakatai kia lautolu, kia liogi mau ke lata ai, ka e aua neke fakalolelole;
2 Kua pehe age, Ha he taha māga e taha fakafili, kua nakai matakutaku ke he Atua, ti nakai maimaina ke he tau tagata.
3 Ha he māga foki ia e taha fifine takape, ne fano kia ia, kua pehe age, Kia fakafili e koe a ia ha i ai haku a tau mena.
4 Ko e falu a aho nakai maeke ai a ia; ati oti, ka e pehe hifo a ia ke he hana loto, Pete ni he nakai matakutaku au ke he Atua, ti nakai maimaina au ke he tau tagata;
5 Ka ko e mena kua fakahoha mai kia au e fifine takape nei, ti fakafili ai e au hana tau mena, neke fakamamahi mai kia au he fa hau mau a ia.
6 Ti pehe mai e Iki, Kia fanogonogo mai a a mutolu ke he kupu he fakafili mahani hepehepe.
7 Ka e nakai kia fakafili he Atua e tau mena ha lautolu ne fifili e ia, ha ha ne tauui a lautolu kia ia ke he aho mo e po, pete ni he mule mai a ia kia lautolu?
8 Kua tala atu e au kia mutolu, To fakafili vave e ia e tau mena ha lautolu. Ka hau e Tama he tagata, mailoga he ha ke moua mai e ia e tua ke he lalolagi?
9 Kua tala age foki e ia e fakatai nai ke he falu a tagata ne tua a lautolu kia lautolu piko kua mahani tututonu, ka e fakalialia a lautolu ke he fala tagata;
10 Ne o hake ke he faituga e tokoua a tagata ke liogi; ko e farasaio taha, ko e telona taha.
11 Ne tu e farasaio kua liogi fakatekiteki atu ke he tau kupu nai, Ko e Atua na e, kua fakaaue atu au kia koe, he nakai tuga e fala tagata au, ko lautolu ne fofo mena, ko e tau matahepehepe, ko e tau faivao, nakai tuga foki e telona ko.
12 Kua fakakanopogi takilagaua au ke he tau fahitapu; kua uta e au e tau mena ne hogofulu aki haku a tau mena oti ka moua.
13 Ko e telona foki kua tu mamao atu, nakai maeke ke haga hake hana tau mata ke he lagi, ka kua pokipoki hana fatafata, kua pehe age, Ko e Atua na e, kia fakaalofa mai a koe kia au ko e tagata hala.
14 Kua tala atu e au kia mutolu, kua hifo e tagata na ke he hana fale kua talahaua tututonu, ka e nakai pihia taha; ha ko ia ne fakatokoluga e ia a ia, to fakatokolalo ai a ia; ka ko ia ke fakatokolalo e ia a ia, to fakamatalahi a ia.
15 Kua ta mai he falu a tagata e tau tama mukemuke kia ia, kia piki age a ia kia lautolu; kua kitia he tau tutaki, ti hataki ai e lautolu a lautolu.
16 Ka ko Iesu, kua ui age a ia kia lautolu, kua pehe age, Tokai e tau tama ikiiki ke o mai kia au, ti ua hataki e mutolu a lautolu; ha ko e mena tuga a lautolu nai e tau tagata ha ha he kautu he Atua.
17 Ko e moli ke tala atu e au kia mutolu, ko e tagata nakai talia e kautu he Atua ke tuga e tama tote, nakai hao ni a ia ki ai.
18 Kua huhu mai kia ia e taha iki, kua pehe mai, Ko e akoako mitaki na e, ko heigoa e mena ke eke e au ke moua ai e moui tukulagi?
19 Ti tala age a Iesu kia ia, Kua totoku he ha e koe au kua mitaki? nakai mitaki taha, ka ko e tokotaha hokoia, ko e Atua haia.
20 Kua iloa e koe e tau poaki; ua faivo a koe; ua kelipopo tagata a koe; ua kaiha a koe; ua fatipiko a koe; kia fakalilifu a koe ke he hau a matua tane mo e hau matua fifine.
21 Kua pehe mai a ia, Kua oma e au e tau mena oti ia tali mai ni he tote au.
22 Kua fanogonogo a Iesu ke he tau kupu ia, ati tala age ai kia ia, Taha e mena kua toe nakai la moua e koe; kia fakafua atu e koe hau a tau mena oti, mo e tufatufa ke he tau nonofogati, ti moua ai e koe e tau koloa loga ke he lagi; ati hau a koe mo e mui mai kia au.
23 Kua logona e ia e mena ia, ti momoko ai a ia; ha kua loga lahi hana koloa.
24 Kua fioia e Iesu a ia kua momoko tuai, ati tala age ai a ia, Ko e mena uka ni he hu atu e tau tagata maukoloa ke he kautu he Atua.
25 Maeke vave ke hu atu e kamela ke he pu he gila, ka e uka ke hu atu e tagata maukoloa ke he kautu he Atua.
26 Ti pehe mai a lautolu ne logona, To maeke ke fakamoui a hai?
27 Kua tala age a ia, Ko e tau mena nakai maeke ke he tau tagata, kua maeke ni ke he Atua.
28 Ti pehe mai a Peteru, Kitiala, Kua toka e mautolu e tau mena oti, ka e mumui atu ia koe.
29 Ti tala age a ia kia lautolu, Ko e moli, ke tala atu e au kia mutolu, Ko e tagata kua toka e fale, po ke tau matua, po ke tau matakainaga, po ke hoana, po ke tau fanau, ha ko e kautu he Atua.
30 To moua e ia e tau mena fatualoga ke he vaha nai, ko e moui tukulagi foki ke he mouiaga ne tatali.
31 Kua takitaki e ia e tokohogofulu ma ua, kua tala age kia lautolu, Kitiala, ko e o hake ne fai a tautolu ki Ierusalema, ti fakamoli ai e tau mena oti ne tohi he tau perofeta ke he Tama he tagata.
32 Ha ko e mena tuku atu a ia ke he motu kehe, to va ki ai, mo e ekefakakelea, ti tauanu foki ki ai;
33 To fahi foki e lautolu mo e kelipopo a ia; ka ko e aho tolu ke liu foki tu a ia.
34 Ti nakai maama ni kia lautolu e tau mena na; kua galo foki kia lautolu e kupu na, ti nakai iloa e lautolu e tau mena ne fakamatala mai.
35 Kua tata a ia ki Ieriko, kua nofo ke he kauhala e taha tagata matapouli, kua kaiole;
36 Kua logona e ia e moto tagata ne o age, ati hūhu ai a ia, ko e heigoa.
37 Kua tala age a lautolu kia ia, Ko Iesu ko e Nasareta ha ne fano?
38 Ti ui atu ai a ia, kua pehe, Ma Iesu na e, ko e tama a Tavita, kia fakaalofa mai a koe kia au.
39 Kua hataki a ia e lautolu ne mumua kia fakamate a ia; ka ko ia kua au atu ai he ui, Ko e tama a Tavita na e, kia fakaalofa mai a koe kia au.
40 Ti tu a Iesu, mo e poaki atu kia takitaki mai a ia kia ia. Kua tata mai a ia, ati huhu age ai a ia kia ia, kua pehe age,
41 Ko e heigoa e mena kua manako ki ai a koe ke eke e au māu? Ti pehe mai a ia, Ko e Iki na e, kia ala au.
42 Ti tala age a Iesu kia ia, Ati ala a; ko e hau a tua kua moui ai a koe.
43 Ti ala ai agataha a ia, ti mui atu kia ia, ha ne fakaheke atu ke he Atua; kua kitia he tau tagata oti, ti nava atu ai a lautolu ni ke he Atua.