Luka 19:1-48
19 KUA hoko atu a ia ki Ieriko, kua haele age ai;
2 Kitiala, ko e tagata ko Sakaio e higoa, ko e telona mua a ia, ko e tagata maukoloa foki a ia.
3 Kua fia mamata a ia kia Iesu, po kua fefe a ia; ka e nakai maeke ha ko e moto tagata; ha ko e tagata ku a ia.
4 Kua poi a ia ki mua, kua hake ke he sukamora, ke kitekite kia ia; ha ko e fina age ai ne fai.
5 Kua hoko atu a Iesu ke he mena ia, kua haga hake, kua kitia atu a ia, ati pehe atu ai kia ia, Sakaio na e, kia hifo fakaave a koe ki lalo; ha ko e mena lata he nofo au ke he hau a fale ke he aho nai.
6 Ati hifo fakaave ai a ia, kua talia a ia mo a fiafia.
7 Kua loma oti a lautolu ne kitia, kua pehe age, Kua hu atu a ia ke he tagata hala ke api ai.
8 Ka e tu mai a Sakaio, kua pehe mai ke he Iki, Ko e Iki na e, kitiala, ko e veveheua ne fai e au haku a tau mena ke he tau tagata nonofogati; kaeke foki kua mamahi taha he tukumale age e au to taui atu ai lagafa e au.
9 Kua tala age a Iesu kia ia, Ko e aho nai kua hoko mai ai e fakamouiaga ke he magafaoa nai, nukua eke a ia mo tama a Aperahamo.
10 Ha ko e mena kua hau e Tama he tagata ke kumi mo e fakamoui a ia ne galo.
11 Kua fanogonogo a lautolu ke he tau mena na, ti tala age ai foki e ia mo e taha fakatai, ha kua tata a ia ki Ierusalema, ha ko e mena piko na lautolu ko e hoko mai ne fai e kautu he Atua.
12 Ko e mena foki ia kua tala atu ai a ia, Ne fano e taha iki ke he motu mamao ke moua māna ke fakatu a ia mo Iki, to liu mai ai.
13 Kua ui e ia ke he hana tau fekafekau ne tokohogofulu, kua age kia lautolu hogofulu e mina; kua tala age foki kia lautolu, Kia fakafua aki e mutolu, ato liu mai au.
14 Ka e fakavihia a ia he motu hana, kua fakafano atu e lautolu e fekau ke mui atu kia ia, kua pehe atu, Nakai loto a mautolu ke he tagata na ke eke mo iki ha mautolu.
15 Ti kua liu mai a ia kua moua tuai e pule ke iki ai, ti tala age ke ui atu ke he tau fekafekau ia ne uta e ia ki ai e ario, ke o mai kia ia, kia iloa e ia takitaha ha lautolu a tau fakafua po ke fefe.
16 Ati hau ai taha, kua pehe mai, Ko e iki na e, ko e hau a mina kua moua ai e fala mina ne hogofulu.
17 Ti tala age a ia kia ia, Mitaki, ko e fekafekau mitaki na e, kua fakamoli a koe ke he mena kiliku, ko e mena ia kia pule ai a koe ke he hogofulu e māga.
18 Ati hau ai foki mo e taha, kua pehe mai. Ko e iki na e, ko e hau a mina kua moua ai e fala mina ne lima.
19 Ti tala age foki a ia kia ia, Ati pule foki a a koe ke he lima e māga.
20 Ti hau foki taha, kua pehe mai, Ko e iki na e, kitiala, ko e hau a mina hanai, ne toka ai e au kua afī he holoholo;
21 Ha ko e mena matakutaku ni au kia koe; ha ko koe ko e tagata mahani uka; kua ta hake e koe e mena nakai tuku hifo e koe ki lalo; kua helehele foki e koe e tau saito nakai gana e koe.
22 Ti tala age a ia kia ia, Ko e fekafekau kelea na e, ko e hau a kupu ni, ke fakahala ai e au a koe; kua iloa e koe, ko au ko e tagata mahani uka, ne ta hake e au e mena nakai tuku e au ki lalo, mo e helehele e au e tau saito nakai gana e au.
23 Ti ko e heigoa e mena nakai uta ai e koe haku a ario ke he fale fakafua tupe, kia moua ai e au ka hau, katoa mo e hana taui?
24 Kua tala age a ia kia lautolu ne tutu mai, Kia fofo a e mutolu e mina ia ia, ti age kia ia ne toka ai hogofulu e mina.
25 (Kua tala mai a lautolu kia ia, Ko e Iki na e, ha ha ia ia hogofulu e mina.)
26 Ha ko e mena tala atu e au kia mutolu, Ko e tagata ha i ai e tau mena, to age kia ia; ka ko ia kua nakai fai mena, to fofo e tau mena ha ia ia.
27 Ka ko lautolu kua eke au mo fi ha lautolu, ko lautolu kua nakai fia loto ke eke au mo iki ha lautolu, kia takitaki mai e mutolu ki hinai, mo e keli a lautolu ki mua haku.
28 Kua mole atu e tau kupu ia, ati mua atu ai a ia, kua fenoga ki Ierusalema.
29 Kua tata a ia ki Petefake mo Petania ke he mouga, ko Olive e higoa, ti fakafano atu ai e ia e na tutaki tokoua hana,
30 Kua pehe atu, Kia o atu a mua ke he māga ha i mua ha mua; ka hoko a mua ki ai, ti kitia ai e mua e punua asini kua fakave, nakaila heke ai he tagata; ti vevete e mua, mo e takitaki mai.
31 Kaeke foki he hūhu mai taha kia mua, Kua vevete mo ha e mua e asini? kia tala age a mua kia ia, kua pehe age, Kua manako ai e Iki.
32 Kua o a laua ne fakafano atu, ti moua ai e laua tuga he tala mai a ia kia laua.
33 Ha ne vevete e laua e punua asini, ati tala mai ai kia laua e tau tagata ha lautolu e manu, Kua vevete mo ha e mua e punua asini?
34 Ati tala age ai e laua, Kua manako ai e Iki.
35 Ti takitaki mai ai e laua kia Iesu; kua tolo hake e lautolu ha lautolu a tau tapulu ki luga he punua asini, ti fakaheke ai e lautolu a Iesu.
36 Ha ne haele age a ia, ti folafola e lautolu ha lautolu a tau tapulu ke he puhala.
37 Kua tata tuai a ia ke he mena ke hifo ai he mouga ko Olive; ti kamata ai e fiafia he lanu tutaki oti, ne fakaheke atu a lautolu ke he Atua mo e leo lahi, ha ko e tau mana oti ne kitia e lautolu;
38 Kua pehe age, Kia monuina e Patuiki, kua haele mai ke he higoa he Iki; ko e mafola ke he lagi, ko e fakahekeaga foki ke he tau mena i luga muatua.
39 Ti tala age kia ia e falu he tau farasaio mai he moto tagata, Ko e akoako na e, kia akonaki atu e koe hau a tau tutaki.
40 Ti tali mai a ia kia lautolu, kua pehe mai, Ke tala atu e au kia mutolu, ka fakamamate a lautolu nai, ti ui mai ni e tau maka.
41 Kua tata tuai a ia, kua kitia e ia e māga, ti tagi a ia ki ai,
42 Kua pehe age, Ane mai iloa a koe, ko koe ni, ke he hau a aho nai, ko e tau mena ke mafola ai a koe! Ka ko e ainei kua galo kia koe.
43 Ha ko e mena hoko mai kia koe e na aho ia, ke keli takai ai kia koe e lautolu kua fai fi kia koe e luo ke pototakai mai ni e lautolu a koe, ke pāpā a koe ke he tau fahi oti;
44 To fakatatai foki e lautolu a koe mo e kelekele katoa mo e tau fanau hau i loto ia koe; nakai toka foki e lautolu e taha maka ki luga he taha maka ki loto ia koe; ha kua nakai iloa e koe e vaha ne ahi mai ai a koe.
45 Kua hu atu a ia ke he faituga, ti kamata ai e ia ke vega ki fafo a lautolu ne fefekafuaaki ai;
46 Kua pehe age kia lautolu, Kua tohi, Ko e haku a fale ko e fale liogi haia; ka kua eke e mutolu mo ana he tau tagata fofo mena.
47 Ne fakaako mau a ia ke he tau aho oti ke he faituga. Ka ko e tau ekepoa ne mua, mo e tau tohikupu, katoa mo e tau iki he motu, kua kolo ke kelipopo a ia;
48 Ka e nakai moua e lautolu taha mena ke eke ai; ha kua foli e motu oti he fia fanogonogo kia ia.