Luka 2:1-52
2 KO e vaha ia ne hoko mai ai e poakiaga a Kaisara Aokuso, kia tohia ai e tau tagata oti kana.
2 Kua eke e tohiaga fakamua nai ke he vaha ne pule ai a Kurenio i Suria.
3 Ti o atu e tau tagata oti, kia tohia takitokotaha ke he hana māga.
4 Kua hake foki a Iosefa mai Kalilaia, mai he māga ko Nasareta ki Iutaia, ke he māga a Tavita, kua higoa ko Petelehema, ha ko e faoa a ia mo e matohiaga a Tavita,
5 Kia tohia fakalataha mo Maria hana hoana ne fakatutane kia ia, kua fatu tuai a ia.
6 Ha ha i ai a laua, kua hoko ke he vaha ke fanau ai.
7 Ti fanau e ia hana tama uluaki, kua kaputi a ia ke he ie, mo e fakatakoto a ia ke he fale povi, ha kua nakai fai mena ke nonofo ai a lautolu ke he fale ke api ai e tau fenoga.
8 Ha ha he vao he māga ia e tau leveki mamoe, ha ne nonofo mo e leveki ai ke he po ha lautolu a tau fuifui mamoe.
9 Kitiala, e agelu he Iki, kua tu mai kia lautolu kua kikila takai mai foki kia lautolu e lilifu he Iki, ti matakutaku lahi ai a lautolu.
10 Ti pehe mai e agelu, kia lautolu, Ua matakutaku a mutolu; kitiala, kua fakamatala atu e au kia mutolu e tala mitaki, ke fiafia lahi ai e tau tagata oti he motu.
11 Ha ko e aho nai kua fanau ai ma mutolu ke he māga a Tavita, e Fakamoui, ko e Iki a ia ko e Keriso.
12 Ko e fakamailoga hanai kia mutolu, to kitia e mutolu e tama mukemuke, kua kaputi ke he ie, ha ne takoto ke he fale povi.
13 Kua fakaofo he fakalataha mo e agelu ko e kau mai he lagi ne tokologa, kua fakaheke ke he Atua, kua pehe age,
14 Ko e fakahekeaga, ke he Atua ni ke he tau mena i luga muatua; mo e mafola ke he lalolagi, ko e finagalo fakaalofa ke he tau tagata.
15 Kua o kehe ia lautolu ke he lagi e tau agelu, ti fevagavagahauaki e tau leveki mamoe, Ati o a a tautolu ki Petelehema, ke kitia e tautolu e mena nai kua eke, kua fakailoa mai he Iki kia tautolu.
16 Kua alumaki atu a lautolu, ti moua ai a Maria, mo Iosefa, mo e tama mukemuke ha ne takoto ke he fale povi.
17 Kua kitia e lautolu, ti fakailoa atu ai e lautolu e mena ne talahaua mai kia lautolu ke he tama ia.
18 Ko lautolu oti ne logona, kua ofo a lautolu he tau mena ne talahaua mai kia lautolu he tau leveki mamoe.
19 Ka ko Maria kua taofi e ia e tau kupu oti ia mo e manamanatu ki ai ke he hana loto.
20 Kua liliu atu e tau leveki mamoe, ha ne nava mo e fakaheke ke he Atua, ha ko e tau mena oti ne fanogonogo ki ai mo e kitekite a lautolu ki ai, tuga ne talahaua mai kia lautolu.
21 Kua hoko ke he aho valu ke peritome ai e tama, ti fakahigoa ai a ia, ko Iesu, ne fakahigoa aki he agelu, ka e nakala nofo he manava he hana matua fifine.
22 Kua oti e tau aho he fakameaaga a Maria ke lata mo e fakatufono a Mose, ti ta hake ai e laua a ia ki Ierusalema, ke tuku atu ki mua he Iki;
23 Tuga ne tohi ke he fakatufono he Iki, Ko e tau tama tane uluaki oti ke talahaua kua fakatapu mo e Iki.
24 Ke uta foki e poa, ke lata mo e kupu he fakatufono he Iki, Ko e na kulukulu, po ke ua e punua lupe.
25 Kitiala, ha ha i Ierusalema e taha tagata, ko Simeona e higoa; ko e tagata mahani tututonu a ia mo e matakutaku ke he Atua, ha ne talifaki atu a ia ke he fakamafanaga a Isaraela, ha ha i luga ia ia e Agaga Tapu.
26 Kua iloa e ia ke he Agaga Tapu, nakai hoko kia ia e mate, ato kitia fakamua e ia e Keriso he Iki.
27 Ko e Agaga ne fano ai a ia ke he faituga, kua ta mai e tama ko Iesu he tau matua hana, ke eke ai e laua māna tuga ne mena kua lata mo e fakatufono;
28 Ati hapai ai e ia ke he hana tau lima, kua fakaaue atu ke he Atua, kua pehe atu,
29 Ko e Iki na e, kua tuku atu ainei e koe hau a fekafekau kia fano mo e monuina, tuga hau a kupu;
30 Ha kua kitia tuai he haku a tau mata e fakamouiaga mai ia koe;
31 Ne taute e koe i mua he tau motu oti kana;
32 Ko e maama ke fakamaama aki e tau motu kehe mo e lilifu he motu hau ko Isaraela.
33 Kua ofo a Iosefa mo e hana matua fifine he tau mena ne talahaua kia ia.
34 Ti fakamounina e Simeona a laua, kua tala age foki kia Maria hana matua fifine, Kitiala, kua kotofa e tama nai ke veveli ai mo e liu tutu ai foki e tokologa i Isaraela, ke eke foki mo fakamailoga ke eke fakakelea ki ai;
35 (To hokaia foki hau a loto ke he pelu), kia fakakite ai e tau manatu he tau loto he tau tagata tokologa.
36 Ha ha i ai e perofeta fifine ko Ana, ko e tama fifine a Fanuelu, ko e magafaoa a Asera, kua fuakau a ia, ne nonofo a laua mo e hana tane ne fitu e tau tali mai he tamafine tote a ia.
37 Kua takape foki a ia, toka ai kua valu e hogofulu ma fa e tau tau, ti nakai fano kehe a ia he faituga, ka e fekafekau a ia, ha ne fakakanopogi mo e liogi ke he aho mo e po.
38 Ko e magaaho ia ni, kua tu mai ai a ia ti fakaaue atu ke he Iki, mo e vagavagahau kia ia ke he tau tagata oti kana ne talifaki ke he lukototo i Ierusalema.
39 Kua eke e laua e tau mena oti ke lata mo e fakatufono he Iki, ti liliu atu ai ki Kalilaia, ke he māga ha laua ko Nasareta.
40 Kua tupu ni e tama, kua malolo foki hana loto, kua puke ke he iloilo, ha ha ia ia foki e fakaalofa noa he Atua.
41 Na o ki Ierusalema hana tau matua ke he taha tau mo e taha tau ke he galue he paseka.
42 Kua hoko a ia ke he hogofulu ma ua he hana tau tau, ati o hake ai a lautolu ki Ierusalema, ke lata mo e mahani he galue.
43 Kua mole e tau aho, ati liliu mai ai a laua, ka kua nofo gaia e tama ko Iesu i Ierusalema, nakai iloa e Iosefa mo e hana matua fifine.
44 Piko na laua ha he fenoga a ia, kua po taha a laua he magahehala, ti kumi ai e laua a ia ke he faoa ha laua mo e tau tagata ne mahani mo laua.
45 Kua nakai kitia a ia, ti liliu atu ai a laua ki Ierusalema, ha ne kumi a ia.
46 Kua mole tolu e aho, ati moua ai e laua a ia ke he faituga, ha ne nofo ke he vaha loto he tau akoako, kua fanogonogo kia lautolu, mo e hūhu mena kia lautolu.
47 Kua ofomate a lautolu oti kana ne fanogonogo kia ia ke he loto matala hana mo e hana tau kupu ne tali atu.
48 Kua ofomate a laua he kitia atu e laua a ia, ti pehe age hana matua fifine kia ia, Ma mea ko e heigoa e mena ne eke pihia ai a koe kia maua? Kitiala, ne kumi hau a matua tane mo au kia koe mo e fakatukehe.
49 Ti pehe ai a ia kia laua, Ko e ha ne kumi mai ai au e mua? Nakai kia iloa e mua ko e mena lata ke nofo au ke he fale he haku a Matua?
50 Ka e nakai maama kia laua e kupu ne tala age a ia kia laua.
51 Ti o hifo a ia mo laua, kua hoko ki Nasareta, kua omaoma a ia kia laua; ka ko a hana matua fifine kua toka e ia e tau kupu oti ia ke he hana loto.
52 Kua tupu e pulotu mo e tino a Iesu, kua ofania a ia he Atua katoa mo e tau tagata.