Luka 20:1-47
20 KO e taha aho he tau aho ia, ha ne fakaako ai e ia e moto tagata ke he faituga, mo e fakamatala e vagahau mitaki, ti hoko mai ai kia ia e tau ekepoa ne mua, mo e tau tokikupu, mo e tau patu.
2 Kua tala age a lautolu kia ia, kua pehe age, Tala mai a kia mautolu, ko e heigoa e pule kua eke ai e koe e tau mena nai; ti age e hai kia koe e pule nai?
3 Ti tala age a ia, kua pehe age kia lautolu, To huhu foki e au kia mutolu e taha kupu; kia tala mai ai e mutolu kia au;
4 Ko e papatisoaga a Ioane, mai he lagi kia, po ke mai he tau tagata?
5 Ti kua fevagavagahauaki a lautolu, kua pehe, Kaeke ke tala atu a tautolu, Mai he lagi; ti pehe mai ai a ia, Ti ko e ha nakai talia ai e mutolu a ia?
6 Ka tala atu a tautolu, Mai he tau tagata ti taulitimaka mai ai he tau tagata oti kia tautolu; ha ko e taofi ha lautolu, ko Ioane ko e perofeta a ia.
7 Ti tala age ai a lautolu, Nakai iloa e mautolu, po ke mai fe.
8 Ti pehe mai ai a Iesu kia lautolu, Ti nakai tala atu foki e au kia mutolu e pule kua eke ai e au e tau mena nai.
9 Ti kamata ai a ia ke tala atu e fakatai nai ke he motu; Ko e taha tagata ne to e ulu vine, ti tuku atu ai ke he tau tagata gahua vine; ati fano ai a ia ke he motu kehe kua mule.
10 Kua hoko ke he vaha ke fua ai, ti fakafano atu ai e ia e fekafekau ke he tau tagata gahua vine, kia ta mai e lautolu kia ia e fala fua he ulu vine; ka e fahi a ia he tau tagata gahua vine, ti fakafano noa mai e lautolu a ia.
11 Ti fakafano atu e ia taha fekafekau, kua fahi foki e lautolu mo e fakakelea a ia, ti fakafano noa mai e lautolu a ia.
12 Ti fakafano atu e ia taha ke tokotolu aki, kua keli tafule foki e lautolu a ia, ti vega kehe ai.
13 Ati tala age ai e iki hana e ulu vine, Ko heigoa e mena ke eke e au? To fakafano atu e au haku a tama fakahele; na ko e maimaina mai a lautolu kia ia, ka kitia e lautolu a ia.
14 Ka kua kitia a ia he tau tagata gahua vine, ti fevagahauaki ai a lautolu, kua pehe, Ko e hakeaga hanai; o mai a ke kelipopo e tautolu a ia, kia eke ai e fonua ma tautolu.
15 Ti tulei atu e lautolu a ia ki tua he ulu vine, mo e kelipopo ai. Ti ko e heigoa e mena ke eke he iki hana e ulu vine kia lautolu?
16 To fina atu a ia, mo e fakaotioti e tau tagata gahua vine ia, ka e tuku atu e ulu vine ke he falu a tagata. Kua fanogonogo a lautolu, ti pehe mai a lautolu, Aua ia, neke pihia.
17 Ti kitekite a ia kia lautolu, kua pehe age, Ti ko e heigoa hanai kua tohi, Ko e maka ne tiaki he tau tagata ati fale, kua eke a ia mo maka he malokuaga tapa ki luga.
18 Ko e tagata ne veli ki luga he maka ia, ke mapakipaki ai a ia, ka ko e tagata ke to hifo e maka ki ai ke malipilipi ai a ia.
19 Kua fia tapaki a ia he tau ekepoa ne mua mo e tau tohikupu ke he magaaho ia ni; ka kua matakutaku a lautolu ke he tau tagata, ha kua iloa e lautolu, kua fakalata e ia e fakatai ia kia lautolu.
20 Kua takahao a lautolu mo e fakafano atu e falu a tagata toko kia ia, kua tututonu fakatupua a lautolu, kia moua ai e lautolu taha kupu hana ke tuku atu ai a ia ke he lima mo e pule he iki.
21 Ti hūhu mai a lautolu kia ia, kua pehe mai, Ko e akoako na e, kua iloa e mautolu kua vagahau a koe mo e fakaako mai mo e tonu, nakai fakamailoga e koe taha tagata, ka kua fakaako e koe e puhala he Atua mo e fakamoli;
22 Po ke lata ke uta e mautolu e telu kia Kaisara, po ke nakai?
23 Ka kua fioia e ia ha lautolu a fakavai, ati tala age ai a ia kia lautolu, Ko e heigoa e mena kua kamatamata mai ai e mutolu au?
24 Fakakite mai a kia au taha tenari, Ko hai kia hana e fakatino, mo e tohi ha i ai? Kua tala mai a lautolu, Ha Kaisara.
25 Ti pehe age ai a ia kia lautolu, Ko e tau mena a Kaisara, kia uta a ma Kaisara; ko ko e tau mena he Atua, kia uta a ke he Atua.
26 Nakai maeke ni ia lautolu ke moua hana tau kupu ki mua he tau tagata; kua ofo a lautolu he tali hana, kua fakafenono a lautolu.
27 Kua o mai kia ia e falu he tau satukaio, ko lautolu kua taofi, nakai tuai tu mai taha kua mate; kua huhu mai a lautolu kia ia,
28 Kua pehe mai, Ko e akoako na e, kua tohi mai e Mose kia tautolu, kaeke ke mate e matakainaga he taha tagata, kua fai hoana a ia, ka kua mate a ia nakai fai tama, kia hoana hana matakainaga ke he fifine, kia fanau ai ha tama mo e matakainaga hana.
29 Hanai, ne tokofitu e matakainaga; kua fai hoana e taokete, kua mate a ia nakai fai tama.
30 Ko e hana tehina to he tua kua hoana ke he fifine, kua mate foki a ia nakai fai tama.
31 Kua hoana foki ki ai a ia ne tokotolu aki; kua pihia foki ato hoko ke he tokofitu, kua mamate a lautolu, ka e nakai fai tama a lautolu.
32 Ka e mate fakamui fakaoti e fifine.
33 Hanai ka hoko ke he liliu tutu mai, ko hai ia lautolu ke eke māna e hoana? ha ko e mena hoana e tokofitu kia ia.
34 Ti tala age a Iesu, kua pehe age kia lautolu, Ko e tau tagata he mouiaga nai kua fai hoana a lautolu, mo e fai tane;
35 Ka ko lautolu ne talahaua kua aoga ke moua e lautolu e mouiaga ia, mo e liliu foki tutu mai ia lautolu kua mamate, nakai tuai fai hoana a lautolu, po ke fai tane;
36 Nakai fakai foki ke mamate a lautolu; ha ko e mena kua fakataufata a lautolu mo e tau agelu; ko e tau fanau he Atua foki a lautolu, ko e tau tagata ia he liliu foki tutu mai.
37 Ka ko e tutu mai ha lautolu kua mamate, kua fakailoa mai ia e Mose ke he kupu ke he akau talatala, he totoku e ia e Iki, ko e Atua a Aperahamo, ko e Atua foki a Isaako, ko e Atua foki a Iakopo.
38 Nakai ko e Atua a ia ha lautolu kua mamate, ka ko lautolu kua momoui; ha ko e mena kua momoui oti ia ia.
39 Ati tala mai ai e falu he tau tohikupu, kua pehe mai, Ko e akoako na e, kua tonu hau a kupu.
40 Ti kua nakai tuai fakamalolo a lautolu ke hūhu kia ia ha mena.
41 Ati tala age ai a ia kia lautolu, Kua talahau fefe e tau tagata, ko e Keriso ko e Tama a ia a Tavita?
42 Ka ko Tavita ni kua pehe mai ke he tohi he tau salamo, Kua tala age e Iki ke he haku a Iki, Ati nofo a a koe ke he haku a fahi matau,
43 Ato eke e au a lautolu kua fai fi kia koe mo fakatuagahui hāu.
44 Hanai, kua totoku e Tavita a ia ko e hana Iki, ka e eke fefe a ia mo tama hana?
45 Ati tala age ai a ia ke he hana tau tutaki, kua fanogonogo mai foki e tau tagata oti,
46 A mutolu, mo e tau tohikupu ne fia evaeva mo e tau tapulu leleva, kua manako foki kia fakaalofa mai e tau tagata kia lautolu ke he male, katoa mo e tau nofoa uho he tau sunako, mo e tau mena mua ke tatakoto ai he tau kaiaga mena;
47 Ko lautolu kua fakaoti e tau fale he tau fifine takape, kua fakaloaloa foki ha lautolu a tau liogi ke eke mo ufiufi; to moua a lautolu na he fakahala kua mua ue atu.