Luka 21:1-38
21 KUA haga hake a ia, kua kitia e tau tagata mauoloa, ha ne tolo ha lautolu a tau poa ke he mena ne toka ai e tau tupe.
2 Kua kitia foki e ia e taha fifine takape kua nofogati, kua tolo ki ai ua e tupe ikiiki.
3 Ti tala age a ia, Ko e moli, ke tala atu e au kia mutolu, ko e tau mena he fifine takape nofogati na kua tolo ki ai, kua mua ia ke he tau mena ha lautolu oti.
4 Ha ko e mena tolo e lautolu oti e falu a mena mai he tau mena loga ha lautolu ke he tau poa he Atua; ka ko ia kua nofogati kua tolo e ia ki ai hana tau mena oti ne moui ai a ia.
5 Kua vagavagahau ni falu ke he tau mena he faituga, ke he hana tauteuteaga ke he tau maka fulufuluola, mo e tau poa, ti tala age a ia,
6 Ko e tau mena na kua kitekite a mutolu ki ai, to hoko mai ni e tau aho, ke nakai tuai toka ai taha maka ki luga he taha maka, ka e ulu oti ki lalo.
7 Ati hūhu mai ai a lautolu kia ia, kua pehe mai, Ko e akoako na e, to hoko mai a fe e tau mena ia? Ko e heigoa foki e fakamailoga ka teitei hoko ai e tau mena ia?
8 Kua tala age a ia, A mutolu, neke fakakehe ai a mutolu; ha ko e mena o mai tokologa ke he haku a higoa, mo e pehe mai, Ko au ko ia, kua tata foki e vaha; hanai, ua mumui atu a mutolu kia lautolu.
9 Ka logona e mutolu e tau tau mo e tau fakaagitau, ua fakaatukehe a mutolu, ha ko e mena lata ni he hoko fakamua mai e tau mena ia, ka e nakai hoko mai agataha e fakaotiaga.
10 Ati tala age ai a ia kia lautolu, To laga e taha motu ke he taha motu, ko e taha kautu foki ke he taha kautu.
11 To ha i ai e tau mafuike lalahi ke he taha mena mo e taha mena, ko e tau hoge foki, mo e tau tatalu, mo e tau mena fakamatakutaku, mo e tau fakamailoga lalahi mai he lagi.
12 Ka e nakaila hoko e tau mena oti ia to tapatapaki e lautolu mo e favale mai kia mutolu, to tuku atu foki a mutolu ke he tau sunako, mo e tau fale puipui, ti takitaki atu foki a mutolu ke he tau patuiki, mo e tau iki, ha ko e haku a higoa.
13 To hoko e tau mena ia kia mutolu ke eke mo talahau kia lautolu.
14 Hanai, kia tokaloto e mutolu, ke ua manamanatu fakamua a mutolu ke he taha kupu ke tali atu ai e mutolu.
15 Ha ko e mena to ātu e au e kupu ma mutolu mo e pulotu, nakai fai tagata fetoko mai kia mutolu, ke maeke ia ia ke tali mai, po ke totoko mai kia mutolu.
16 To tuku atu foki a mutolu he tau matua mo e tau matakainaga, mo e tau faoa, mo e tau kapitiga, ko e falu foki ia mutolu to kelipopo e lautolu.
17 To fakavihia foki a mutolu he tau tagata oti, ha ko e haku a higoa.
18 Ka e nakai fakai ke to ha lauulu taha ha mutolu.
19 Ko e ha mutolu a fakauka, kia moua ai ha mutolu a moui.
20 Ka kitia e mutolu kua pātakai a Ierusalema he tau kau, ti iloa ai e mutolu ke he vaha ia kua tata hana moumouaga.
21 Ko e vaha ia, kia fehola a lautolu ha i Iutaia ke he tau mouga; ko lautolu foki ha i loto he māga ia, kia o kehe a lautolu; ko lautolu foki ha he tau kaina, aua neke huhu a lautolu ki loto he māga.
22 Ha ko e tau aho ia ke fakahala ai, kia fakamoli ai e tau mena oti ne tohi.
23 Oi fakaalofa ke he tau fifine kua fatu, katoa foki mo lautolu kua fakahuhu tama ke he tau aho ia ni; ha ko e mena hoko e matematekelea lahi ke he motu, mo e ita ke he tau tagata he motu nai.
24 To mamate a lautolu ke he mata he pelu; to paea foki ke he atu motu oti; to taholi foki a Ierusalema he tau motu kehe, ato fakakatoa ai e tau vaha he tau motu kehe.
25 To ha i ai foki e tau fakamailoga ke he la, mo e mahina, mo e tau fetu; ha he lalolagi foki e matematekelea he tau motu ke he fakahakuhaku; ke go foki e tahi mo e loka;
26 To mamate foki e tau tagata he matakutaku mo e talifaki ke he tau mena ke hohoko mai ke he lalolagi; he ko e mena lulululu ai e tau kau he lagi.
27 Ati kitia ai e lautolu e Tama he tagata kua hau ke he aolagi, mo e malolo, mo e lilifu lahi.
28 Ka kamata he eke e tau mena ia kia kitekite hake mo e haga hake a mutolu; ha kua tata tuai ha mutolu a fakamouiaga.
29 Ti tala age a ia kia lautolu e fakatai, Ati kikite a a mutolu ke he mati, katoa mo e tau akau oti;
30 Ka kito matalatala mai e tau lau, kua kikite a mutolu, ti iloa ai kua tata tuai e tau mafana.
31 Kia pihia foki a mutolu, ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.
32 Ko e moli, ke tala atu e au kia mutolu, Nakai mole atu e hau nai, ato hohoko mai e tau mena oti.
33 To mole atu ni e lagi, mo e lalolagi; ka ko e haku a tau kupu, nakai mole atu ni a ia.
34 A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu.
35 Ha ko e mena tuga ne matahele, ke hoko mai ai kia lautolu oti kana kua nonofo ke he lalolagi oti.
36 Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.
37 Kua mahani a ia ke fakaako ke he faituga ka aho, ka e fano a ia ki tua ka po, mo e nofo ke he mouga, ko Olive e higoa.
38 Kua maama mai e aho, ati o mai ai kia ia e tau tagata oti ke he faituga ke fanogonogo kia ia.