Luka 23:1-56
23 TI matike a lautolu oti, kua takitaki a ia kia Pilato.
2 Ti kamata ai a lautolu ke hokotaki a ia, kua pehe atu, Ne moua e mautolu e tagata nai, kua uhu kehe e ia e motu, kua hataki foki e ia, ua uta e telu kia Kaisara, kua pehe age, ko ia ko e patuiki ko Keriso.
3 Ati hūhu mai ai a Pilato kia ia, kua pehe mai, Ko koe kia e patuiki he tau tagata Iutaia? Kua tala atu a ia kia ia, kua pehe atu, Haia.
4 Ti tala age ai a Pilato ke he tau ekepoa ne mua mo e moto tagata, Nakai moua e au ha mena ke fakahala ai e tagata nai.
5 Ka kua fakamakamaka a lautolu, kua pehe mai, Kua fakalagalaga e ia e motu, kua fakaako a ia ki Iutaia oti, kua kamata mai i Kalilaia, kua hoko mai ki hinei.
6 Kua logona e Pilato a Kalilaia, ati hūhu age ai a ia, po ke tagata Kalilaia a ia.
7 Kua iloa e ia mena mai he magakautu a Herota a ia, ati fakafano atu ai a ia kia Herota, ha ha i Ierusalema a ia he vaha ia.
8 Kua kitia atu e Herota a Iesu, ati fiafia lahi ai a ia; ha kua leva tuai he fia kitia a ia, ha ko e tau mena loga kua logona ai kia ia; kua amaamanaki foki a ia ke kitia e taha mana ka eke e ia.
9 Ti hūhu mai a ia kia ia ke he tau kupu loga; ka e nakai tali atu a ia kia ia ha kupu.
10 Ti tutu ki luga e tau ekepoa ne mua, mo e tau tohikupu, kua hokotaki fakamakamaka a lautolu kia ia.
11 Kua fakalialia kia ia a Herota mo e hana kau, mo e va kia ia; kua fakatapulu foki e lautolu a ia ke he tapulu kikila, ti liuaki atu a ia kia Pilato.
12 Ko e aho ia ni, kua fakafeilo ai a Pilato mo Herota; ha kua feitaaki fakamua a laua.
13 Kua fakapotopoto foki e Pilato e tau ekepoa ne mua, mo e tau patu, mo e tau tagata,
14 Kua pehe age a ia kia lautolu, Kua ta mai e mutolu e tagata nai kia au, tuga ne uhu kehe e ia e motu; kitiala, kua fakafili tuai e au a ia ki mua ha mutolu; ka e nakai moua e au ha mena ke fakahala ai e tagata nai ke he tau mena ne hokotaki mai e mutolu kia ia.
15 Pihia foki mo Herota, ne fakafano atu e au a mutolu kia ia; kitiala, nakai eke e ia ha mena ke lata ai ke mate a ia.
16 Ko e hanai foki, to fahi e au a ia, ti vevete atu ai.
17 (Kua lata foki he vevete ne ia e taha tagata kia lautolu ke he galue.)
18 Ka e tauui mai e moto tagata oti kana, kua pehe mai, Uta kehe a e tagata na, ka e vevete mai a Parapa kia mautolu;
19 (Ko e tagata ia ne toka he fale puipui ha ko e fakafualoto ne eke ke he māga, mo e kelipopo tagata.)
20 Ati liu foki talahau mai ai e Pilato, nukua fia vevete atu e ia a Iesu.
21 Ka kua tauhea fakalahi mai a lautolu, kua pehe mai, Kia fakasatauro a, ati fakasatauro a a ia.
22 Kua tala age lagatolu foki a ia kia lautolu, Ka ko heigoa e mena kelea ne eke e ia? Nakai moua e au ia ia ha mena ke fakahala ai a ia kia mate; hanai to fahi e au a ia, ti vevete atu ai.
23 Ka e fakamakamaka mai a lautolu mo e leo lahi kua tala mai ke fakasatauro a ia; ti kautu ha lautolu ni a leo, mo e leo he tau ekepoa ne mua.
24 Kua tala age a Pilato, kia eke ai ha lautolu a manako.
25 Kua vevete atu e ia kia lautolu ko ia ne toka ai ke he fale puipui ha ko e fakafualoto mo e kelipopo tagata, ne ole mai ai a lautolu; ka e tuku atu e ia a Iesu ke he manako ha lautolu.
26 Ha ne takitaki atu e lautolu a ia, ti tapaki ai e lautolu a Simona, ko e taha Kurene a ia, ne hau a ia mai he kaina; kua tuku e lautolu kia ia e satauro ke fua ai ki tua a Iesu.
27 Ne mumui atu kia ia e moto tagata tokologa, mo e tau fifine ne tagi tatuki, mo e tagi aue kia ia.
28 Ka e haga atu a Iesu kia lautolu, kua tala age, Ko e tau tama fifine a Ierusalema na e, ua tagi kia au; ka kia tagi a mutolu kia mutolu, katoa mo e tau fanau ha mutolu.
29 Kitiala, to hoko mai e tau aho ke tala mai ai e tau tagata, Uhoaki a lautolu ne tufua, mo e tau fifine nakai fanau, mo e tau huhu nakai fakahuhu ai.
30 To tala age e tau tagata ke he vaha ia ke he tau mouga, Mafuluhi mai a ki luga kia mautolu; ke tala age foki ke he tau mena matiketike, Ati ufiufi hifo a kia mautolu.
31 Kaeke foki kua eke e tau mena nai ke he akau mata, ko e heigoa e mena ke eke ke he akau mago?
32 Ko e falu a matahavala foki ne tokoua, kua takitaki atu ai fakalataha mo ia, ke kelipopo.
33 Kua hohoko atu a lautolu ke he mena ne higoa, ko e mena ne toka ai e tau ulupoko, ti fakasatauro ai e lautolu a ia, mo e na matahavala, ko e taha ke he fahi matau, mo e taha ke he fahi hema.
34 Ti tala age a Iesu, Ma Matua na e, kia fakamagalo atu e koe a lautolu; ha kua nakai iloa e lautolu e mena kua eke e lautolu. Kua tufatufa e lautolu hana tau tapulu, kua eke ai e vili.
35 Kua tutu mai e tau tagata, mo e kitekite mai. Ko e tau patu foki, kua va mai kia ia fakalataha mo lautolu, kua pehe mai, Ne fakamoui e ia e falu a tagata, ati fakamoui a e ia a ia, kaeke ko e Keriso a enā kua fifili he Atua.
36 Kua va mai foki kia ia e tau tagata he kau; kua o age kia ia, mo e age kia ia e vineta,
37 Kua pehe age, Kaeke ko e patuiki he tau tagata Iutaia a koe, ati fakamoui a e koe a koe.
38 Ne tohi foki e tohi ki luga hana ke he kupu Heleni, mo Roma, mo Heperu, KO E PATUIKI HANAI HE TAU TAGATA IUTAIA.
39 Ko e taha foki he na tagata matahavala ne tautau, kua kupu kelea a ia kia ia, kua pehe age, Kaeke ko e Keriso a koe, kia fakamoui a e koe a koe, katoa mo maua nai.
40 Kua tala age taha, kua hataki kia ia, kua pehe age, Nakai kia matakutaku a koe ke he Atua, ha kua fakahala fakalataha a tautolu?
41 Ti kua tonu ni ha taua a fakahala; ha ko e mena kua taui mai a taua ke lata mo e tau mena ne eke e taua; ka ko ia nai, nakai fai mena hepehepe ne eke e ia.
42 Ati tala age ai a ia kia Iesu, Ko e Iki na e, kia manatu mai a a koe kia au ka haele mai a koe ke he hau a kautu.
43 Ti pehe mai ai a Iesu kia ia, Ko e moli, ke tala atu e au kia koe, ko e aho nai ke fakalataha ai a taua mo koe i parataiso.
44 Na kua hoko ke he magaaho ono, ti pouli oti ai e motu, kua hoko ni ke he magaaho hiva;
45 Kua fakapouligia foki e la, ko e ie puipui foki he faituga kua maheua ke he lotoga.
46 Ati ui ai a Iesu, kua leo lahi, kua pehe atu, Ma Matua na e, kua tuku atu e au haku agaga ke he hau a tau lima. Kua vagahau e ia e tau kupu ia, ti matulei ai.
47 Kua kitia he takitaki he tokoteau e mena kua eke, ti fakaheke atu ke he Atua, kua pehe atu, Ko e moli, ko e tagata mahani tututonu a ena.
48 Ko e tau tagata oti ne fakapotopoto ke mamata ke he mena ia, kua kitekite ke he tau mena kua eke, kua pokipoki ni e lautolu ha lautolu a tau fatafata, ti liliu atu ni.
49 Kua tutu fakamamao atu foki e tau tagata oti ne mahani mo ia, mo e tau fifine foki ne mumui kia ia mai Kalilaia, kua kitekite mai ke he tau mena ia.
50 Kitiala, ko e taha tagata, ko Iosefa e higoa, ko e taha patu a ia ne pule, ko e tagata mahani mitaki mo e tututonu;
51 (Nakai loto fakalataha a ia ke he pule mo e mena ne eke e lautolu), ko e Arimataia a ia, ko e māga haia i Iutaia; ko ia foki taha ne talifaki atu ke he kautu he Atua;
52 Kua fano a ia kia Pilato mo e ole e tino a Iesu.
53 Kua ta hifo ai a ia, kua vakai foki ke he ie lino, ti tuku ai ke he tukuaga ne tuki ke kaumaka, nakaila tuku ai ha tagata.
54 Ko e aho haia he tauteaga, kua tata e sapati.
55 Kua mumui atu foki e tau fifine ne o mai mo ia i Kalilaia, kua kitekite a lautolu ke he tukuaga, mo e tokaaga he hana tino.
56 Ti liliu atu a lautolu, kua taute e tau mena manogi, mo e tau lolo manogi; ti okioki a lautolu ke he sapati, Ke lata mo e poaki.