Luka 24:1-53
24 KO e aho fakamua he fahitapu, kua o atu ai a lautolu ke he tukuaga ke he matafatafa ata he aho; kua uta e tau mena manogi ne taute e lautolu; ko e falu a fifine foki ne fakalataha mo lautolu.
2 Ti kitia e lautolu e maka kua fuluhi kehe tuai he tukuaga;
3 Ti huhū atu a lautolu, ka e nakai kitia e tino he Iki ko Iesu.
4 Ha ne fakahahaku a lautolu he mena ia, kitiala, kua tutu mai kia lautolu e tokoua a tagata, kua tapulu ke he tau tapulu kikila.
5 Kua matakutaku a lautolu, kua tukutuku hifo ha lautolu a tau mata ke he kelekele, ti pehe mai a laua kia lautolu, Ko e heigoa e mena kua kumi ai e mutolu a ia kua moui ia lautolu kua mamate?
6 Nakai nofo a ia hinai, ka kua matike tuai; kia manatu a mutolu ne tala atu pihia e ia kia mutolu, he nofo a ia i Kalilaia,
7 Ne pehe atu, Ko e mena lata ke tuku atu e Tama he tagata ke he tau lima he tau tagata hala, mo e fakasatauro ai, to matike mai ke he aho tolu.
8 Ati manatu ai a lautolu ke he hana tau kupu.
9 Ti liliu atu a lautolu he tukuaga, kua fakamatala mai e tau mena oti ia ke he tokohogofulu ma taha, katoa mo lautolu oti.
10 Ko Maria foki i Makatala, mo Ioana, mo Maria e matua fifine a Iakopo, mo e falu a fifine ne fakalataha mo lautolu, ko lautolu ia ne fakamatala mai e tau mena ia ke he tau aposetolo.
11 Kua manatu foki a lautolu ke he tau kupu ha lautolu tuga ne fakatutala noa; ka e nakai talia e lautolu.
12 Ti kua matike a Peteru, kua poi ke he tukuaga; kua tukutuku hifo foki, kua kitia e ia e tau ie kua tafola kehe, ti fano ai, kua ofo a ia ke he mena kua eke.
13 Kitiala, ne o e tokoua ia lautolu ke he aho ia ke he māga ko Emau e higoa; ko e vaha loto mo Ierusalema onogofulu e satatio.
14 Ne vagavagahau a laua ke he tau mena oti na ne eke.
15 Kua vagavagahau a laua, mo e fekumihaki, ti fakatata mai ai a Iesu, kua o fakalataha mo laua.
16 Ka kua ufia ha laua a tau mata, kia nakai iloa ai e laua a ia.
17 Ti pehe a ia kia laua, Ko heigoa e tau kupu ia kua vagavagahau ai fakahaga a mua, mo e fakatutuku ai a mua?
18 Ko e taha ia laua ne higoa ko Kaleopa, kua tala age kia ia, kua pehe age, Hoko koe ni kia ne api i Ierusalema mo e nakai iloa e tau mena kua tutupu i ai ke he vaha nai?
19 Ti pehe a ia kia laua, Ko heigoa e tau mena? Ti tala age ai a laua kia ia, Ko e tau mena kia Iesu ko e Nasareta, ko e perofeta a ia, ne malolo ke he tau mena ne eke e ia, katoa mo e hana tau kupu ki mua he Atua mo e motu oti.
20 Ne tuku atu foki a ia he tau ekepoa ne mua, mo e tau patu ha tautolu, ke fakahala a ia kia mate; ti fakasatauro e lautolu a ia.
21 Ne amaamanaki foki a mutolu, ko ia ni ke lukutoto aki a Isaraela; ti nakai kuenaia he tau mena oti ia, kua tu e aho tolu tali mai he eke e tau mena ia.
22 Ka kua ofo ni a mautolu he falu a fifine ha mautolu, ne o ke he tukuaga ke he matafatafa ata he aho;
23 Ti nakai kitia e lautolu e tino hana; ti o mai a lautolu, mo e pehe mai, kua kitia e lautolu e fakakiteaga he tau agelu, ne pehe mai, kua moui mai a ia.
24 Ko e falu foki ia mautolu, ne o a lautolu ke he tukuaga, ti moua e lautolu tuga ne talahaua mai ai he tau fifine; ka e nakai kitia e lautolu a ia.
25 Ti tala age a ia kia laua, Ko e tau tagata goagoa na e, mo e loto uka kua nakai talia e tau mena oti ia ne talahau mai ai he tau perofeta.
26 Ka e nakai kia lata he mamahi e Keriso ke he tau mena pehena, ti hoko ai a ia ke he hana lilifu?
27 Ati fakamatala ai e ia kia laua e tau mena ne tohi kia ia ke he tau Tohi oti, kua kamata mai ia Mose, mo e tau perofeta oti.
28 Kua fakatata atu a lautolu ke he māga ne o a lautolu ki ai; ka e eke a ia tuga ne mena fano leva a ia.
29 Ti ole fakamakamaka a laua kia ia, kua pehe mai, Kia nofo a koe mo maua nai; ha ko e afiafi ainei, kua leva tuai e aho. Ati hu atu ai a ia, ke nonofo mo laua.
30 Kua takoto a ia ke he kaiaga mena fakalataha mo laua, ti toto ai e ia e areto, kua fakaaue, ti tofitofi, mo e age kia laua.
31 Ati ala ai ha laua a tau mata, kua iloa e laua a ia; ka e fakamaloma a ia kia laua.
32 Ati vagavagahau ai a laua, Nakai kia velagia ha taua a tau loto ki loto ia taua he vagavagahau a ia mo taua ke he puhala, he fakamatala mai foki e ia e tau Tohi kia taua?
33 Ti mamatike a laua mogoho ia, kua liliu atu ai ki Ierusalema; kua moua atu foki e laua e tokohogofulu ma taha mua fakapotopoto mo lautolu ne fakalataha mo lautolu;
34 Kua pehe mai a lautolu, Ko e moli, kua tu mai e Iki; kua fakakite foki a ia kia Simona.
35 Ko laua foki ne fakamatala atu e tau mena ne eke ke he puhala, mo e iloa foki e laua a ia he tofitofi e areto.
36 Ha ne vagavagahau a lautolu ke he tau mena nai, ti tu mai ai a Iesu ke he vaha loto ha lautolu; kua pehe age kia lautolu, Kia monuina a mutolu.
37 Kua fakaatukehe a lautolu, mo e matakutaku lahi ni, piko na lautolu, ko e agaga ne kitia e lautolu.
38 Ti pehe mai a ia kia lautolu, Kua fakaatukehe a mutolu he ha? to tupu he ha e mahalohalo ke he tau loto ha mutolu?
39 Kia kitekite mai a mutolu ke he haku a tau lima mo e haku a tau hui, ko au ni hanai; kia amoamo mai a mutolu kia au, mo e kitia; ha ko e agaga nakai fai kakano a ia mo e tau hui, tuga au nai kua kitekite a mutolu ki ai.
40 Kua oti he tala age, ti fakakite ai e ia kia lautolu hana tau lima mo e hana tau hui.
41 Ka kua nakai talia fakatonu e lautolu he fiafia mo e ofo, ti tala age a ia kia lautolu, Fai mena kai nakai a mutolu i hinai?
42 Ti age e lautolu kia ia taha magaika tunu, mo e taha magamelikerio.
43 Ti toto ai e ia, mo e kai ai ki mua ha lautolu.
44 Kua tala age a ia kia lautolu, Ko e tau kupu haia ne tala atu ai e au kia mutolu, he nofo au ia mutolu, kua lata ke fakakatoatoa ai e tau mena oti ne tohi kia au ke he fakatufono a Mose, mo e tau perofeta, mo e tau salamo.
45 Ati vevete ai e ia ha lautolu a tau loto kia maama ai kia lautolu e tau Tohi.
46 Kua tala age a ia kia lautolu, Kua tohi pihia, lata foki he mamahi pihia e Keriso, mo e matike mai ke he aho tolu ia lautolu kua mamate.
47 Kia fakamatala foki e tokihala mo e fakamagaloaga he tau hala ke he tau motu oti ke he hana higoa, ke kamata mai i Ierusalema.
48 Ko e tau talahau foki a mutolu ke he tau mena ia;
49 Kitiala, to fakafano atu e au kia mutolu a ia ne talahaua he haku a Matua; ka kia nonofo a mutolu ke he māga ko Ierusalema, ato moua e mutolu e malolo mai luga.
50 Kua uta e ia a lautolu ki tua ato hoko ni ki Petania; ti nikiti e ia hana tau lima, mo e fakamonuina e ia a lautolu;
51 Kua hoko ke he fakamonuina e ia kia lautolu, ti mavehe ai a ia mo lautolu, kua ta hake ke he lagi.
52 Kua hufeilo a lautolu kia ia, ti liliu atu ai ki Ierusalema mo e fiafia lahi;
53 Ha he faituga a lautolu nakai noa, kua nava mo e fakaaue atu a lautolu ke he Atua. Amene.