Luka 6:1-49
6 KO e sapati ne ua aki e aho fakamua kua haele age ai a ia ke he tau ulu saito, ti faki ai he tau tutaki hana e tau fua saito, kua mili ai he tau lima ha lautolu, ti kai ai.
2 Kua pehe mai kia lautolu e falu he tau farasaio, Kua eke mo ha e mutolu e mena kua nakai lata he eke ke he sapati?
3 Kua tala age a Iesu, kua pehe age kia lautolu, Nakai kia totou e mutolu e mena ne eke e Tavita he fia taumafa a ia, katoa mo lautolu ne fakalataha mo ia;
4 He hu atu a ia ke he fale he Atua, ti kua talia e tau areto ne fakatokatoka ki mua, kua taumafa ai, mo e age kia lautolu ne fakalataha mo ia, ko e mena tapu ka kai ai, ka ko e tau ekepoa hoko lautolu?
5 Kua tala age a ia kia lautolu, Ko e Tama he tagata ko e Iki foki haia he sapati?
6 Ko e taha sapati foki kua hu ai a ia ke he sunako mo e fakaako ai; ne nofo ai e tagata kua mate hana lima matau.
7 Kua takahao kia ia e tau tohikupu mo e tau farasaio, po ke fakamalolo nakai e ia ke he sapati, kia moua e lautolu taha mena ke hokotaki ai a ia.
8 Ka kua fioia e ia ha lautolu a tau manatu, ti tala age a ia ke he tagata kua mate hana lima, Ati matike a, mo e tu mai ke he vaha loto. Ati matike ai a ia, kua tu mai.
9 Ti kua pehe age a Iesu kia lautolu, To hūhu atu e au taha mena kia mutolu, Kua lata nakai mo e sapati e mahani mitaki, po ke mahani kelea? Po ke fakamoui po ke tamate?
10 Kua kitekite fano a ia kia lautolu oti, kua tala age ke he tagata, Ati fakaolo a hau a lima; ti eke pihia a ia; ti kua mitaki tuai hana lima, tuga ne taha.
11 Ati vale lahi ai a lautolu, kua pulega ai po ke heinoa taha mena ke eke e lautolu kia Iesu.
12 Ko e vaha ia kua hake ai a ia ke he mouga ke liogi; kua ahogia hana liogi ke he Atua.
13 Kua aho foki, ati ui atu ai a ia ke he hana tau tutaki; kua fifili e ia e falu a lautolu ne tokohogofulu ma ua, kua fakahigoa foki e ia a lautolu, ko e tau aposetolo;
14 Ko Simona (ne fakahigoa atu foki e ia a ia ko Peteru,) mo Aneterea hana matakainaga, ko Iakopo mo Ioane, ko Filipo mo Patolomaio,
15 Ko Mataio mo Toma, ko Iakopo e tama a Alefaio, mo Simona kua higoa ko Salote.
16 Ko Iuta foki e matakainaga a Iakopo, mo Iuta Iasakariota, ko ia ne fakavai.
17 Kua o hifo a lautolu mo ia, ti tu a ia ke he kelekele tatai, mo e hana tau tutaki tokologa, mo e lanu tagata tokologa mai Iutaia oti, mo Ierusalema, mo e fahi tahi ko Turo mo Saitonu; kua o mai a lautolu ke fanogonogo kia ia, kia fakamalolo ai foki ha lautolu a tau gagao;
18 Ko lautolu foki ne matematekelea he tau agaga kelea, ti fakamalolo e ia a lautolu.
19 Kua foli e moto tagata oti ke piki atu kia ia; ha kua fina atu ia ia e mana, mo e fakamalolo aki a lautolu oti.
20 Kua kikite atu a ia ke he hana tau tutaki, mo e tala age, Uhoaki a mutolu ne nonofogati; ha ko e mena eke ma mutolu e kautu he Atua.
21 Uhoaki a mutolu ne fia kai ainei; ha ko e mena to mamakona a mutolu. Uhoaki a mutolu ne tagi ainei; ha ko e mena to kata a mutolu.
22 Uhoaki a mutolu ka fakavihia a mutolu he tau tagata, ka vevehe kehe a mutolu, mo e eke fakakelea ai e lautolu, mo e tiaki ai ha mutolu a tau higoa, tuga ne mena kelea, ha ko e Tama he tagata.
23 Kia fiafia a mutolu ke he aho ia, mo e kolikoli a mutolu; kitiala, ha ha he lagi ha mutolu a palepale kua lahi; ha ko e mena ne eke pihia foki ha lautolu a tau matua ke he tau perofeta.
24 Ka ko mutolu ne maukoloa, oi fakaalofa kia mutolu! ha kua moua tuai e mutolu ha mutolu a mitaki.
25 Oi fakaalofa kia mutolu kua makona mau! ha ko e mena to fia kai a mutolu. Oi fakaalofa kia mutolu kua kata ainei! ha ko e mena to fakatutuku a mutolu, mo e tagi aue.
26 Oi fakaalofa kia mutolu ka vagahau fakamitaki e tau tagata oti kia mutolu! ha ko e mena eke pihia ni ha lautolu a tau matua ke he tau perofeta pikopiko.
27 Ka e tala atu a au kia mutolu ne fanogonogo mai, Kia fakaalofa atu kia lautolu kua fai fi kia mutolu; kia totonu atu kia lautolu ne fakavihia mai kia mutolu.
28 Kia fakamonuina atu e mutolu kia lautolu ne kaialu mai kia mutolu; kia liogi atu a mutolu ma lautolu ne tukumale mai kia mutolu;
29 Ko ia ne tuki a koe ke he taha pakakauloa, kia haga atu ki ai taha; ko ia kua uta kehe hau a tapulu lahi, aua neke hataki e koe hau a tapulu tino foki kia ia.
30 Ati age a ke he tau tagata oti ka ole mai kia koe; ko ia ne fofo hau a tau mena, aua neke eke a koe ke liuaki mai.
31 Tuga ne loto a mutolu kia eke he tau tagata kia mutolu, kia eke pihia foki e mutolu kia lautolu.
32 Kaeke ke fakaalofa atu a mutolu kia lautolu kua fakaalofa mai kia mutolu, to fakaaue he ha kia mutolu? nukua fakaalofa atu e tau tagata hala kia lautolu kua fakaalofa mai kia lautolu.
33 Kaeke foki ke mahani mitaki atu a mutolu kia lautolu kua mahani mitaki mai kia mutolu, to fakaaue he ha kia mutolu? nukua eke pihia foki e tau tagata hala.
34 Kaeke ke age e mutolu kia ia kua ogo tupe mai, mo e amaamanaki a mutolu ke moua mai ai, to fakaaue he ha kia mutolu? ha ko e tau tagata hala foki, kua age e lautolu ke he tau tagata hala kua ogo tupe mai, kia moua e lautolu e tau tupe tatai.
35 Ka ko mutolu, kia fakaalofa atu a mutolu kia lautolu kua fai fi kia mutolu, ti mahani mitaki atu ki ai; kia age e tau tupe kua ogo, aua neke amaamanaki ke he taha mena ke ta mai; to lahi ai ha mutolu a palepale, to eke foki a mutolu mo fanau hana ne Mua ue atu; ha ko ia ne ofaofa e tau tagata vale, katoa mo lautolu ne mahani kelea.
36 Hanai, kia hofihofi noa ha mutolu a fakaalofa, tuga ne hofihofi noa e fakaalofa he Matua ha mutolu.
37 Ua fakafili atu foki e mutolu, ti nakai fakafili mai a mutolu; ua fakahala e mutolu, ti nakai fakahala mai a mutolu; kia fakamagalo atu a mutolu, ti fakamagalo mai kia mutolu.
38 Kia foaki atu e mutolu, ti foaki mai ai kia mutolu; to foaki mai e lautolu ke he tapulu ha mutolu ko e fafatiaga mitaki, kua fofota mo e lulululu ai, ke puke mo e puā ki tua. Ha ko e fafati ke fafati atu ai e mutolu, to fafati mai ai kia mutolu.
39 Kua tala age a ia e fakatai kia lautolu, To maeke kia ke he matapouli ke takitaki e taha matapouli? Nakai kia veveli a laua tokoua ni ke he luo?
40 Nakai mua e tutaki ke he hana akoako, ka kua takitaha mo e tuga hana akoako a lautolu kua fakaako fakamitaki.
41 Ko e heigoa e mena kua kitekite ai e koe ke he mala akau ke he mata he hau a matakainaga, ka e nakai kitia e koe e akau fakalava ke he mata hau?
42 To maeke fefe ia koe ke tala atu ke he hau a matakainga, Haku matakainaga na e, ati tuku mai a kia au ke kape kehe ai e mala akau he hau a mata, ka e nakai kitia e koe e akau fakalava ke he mata ni hau? Ko e fakavai na e, ati kape a fakamua e koe e akau fakalava he hau a mata, ti kitia fakamitaki e koe ke kape kehe ai e mala akau he mata he hau a matakainaga.
43 Ha kua nakai fai akau mitaki ke fua mai e tau fua kelea; ti nakai fai akau kelea ke fua mai e tau fua mitaki.
44 Ha ko e tau akau takitaha mo e iloa ai he hana tau fua; ha ko e mena nakai faki he tau tagata e tau fua mati mai he tau akau talatala; nakai faki foki e lautolu e fuhi vine mai he akau talatala.
45 Kua ta mai he tagata mahani mitaki e tau mena mitaki mai he tau mena mitaki kua tanaki ke he hana loto; ko e tagata mahani kelea foki, kua ta mai e ia e tau mena kelea mai he tau mena kelea kua tanaki ke he hana loto; ha ko e puke he loto ke vagahau mai ai hana gutu.
46 Ko e ha ne totoku ai e mutolu au, Ko e Iki na e, ko e Iki na e, ka e nakai eke e mutolu e tau mena ne tala atu ai e au?
47 Ko e tagata ka hau kia au, mo e fanogonogo ke he haku a tau kupu, ti eke ai e ia, to fakakite atu e au kia mutolu e tagata kua lata ki ai.
48 Kua lata a ia mo e tagata kua ta hana fale, kua keli fakahokulo ia, kua toka e fakave ki luga he mena patu; ti hoko mai ai e fakapuke, kua fafati lahi mai e vailele ke he fale ia, ka e nakai maeke he gahuahua ai ni; ha ko e mena kua fakatu tuai ki luga he mena patu.
49 Ka ko e tagata ne fanogonogo, ka e nakai eke e ia, kua lata a ia mo e tagata kua fakatu hana fale ki luga he kelekele, nakai fai fakave; kua fafati lahi mai e vailele ki ai, ti veli ai agataha, ati malipilipi lahi ai e fale ia.