Luka 8:1-56
8 KUA mole e tau mena ia, ti haele takai ai a ia ke he tau māga, mo e tau magamotu, kua ogoogo mo e fakamatala e vagahau mitaki he kautu he Atua, kua fakalataha foki mo ia e tokohogofulu ma ua,
2 Ko e falu a fifine foki, ne fakamoui mai he tau agaga kelea mo e tau kafo; ko Maria ne fakahigoa ko e Makatala, ne o ki fafo ia ia tokofitu e temoni,
3 Mo Ioana e hoana a Kusa ko e fekafekau pule ia a Herota, mo Susana, katoa mo e falu a fifine tokologa, ne fekafekau atu a lautolu kia ia he tau mena ha lautolu.
4 Ha ne fakapotopoto mai e moto tagata tokologa, kua o mai foki kia ia e taha māga mo e taha māga, ti tala age ai e ia e fakatai.
5 Kua fina atu e tagata gana saito ke gana ai hana tau saito; kua gana e ia, ti mokulu ai falu ke he kauhala; kua holia, ti kai ai he tau manu lele.
6 Kua mokulu foki falu ke he mena patu; kua tupu, ti fifigo ni, ha ko e mena nakai pala.
7 Kua mokulu foki falu ke he vao talatala; kua tupu fakalataha a ia mo e vao talatala, ati apitia ai.
8 Ka e mokulu falu ke he kelekele mitaki, kua tupu, kua fua mai e tau fua takiteau. Ha ne tala atu e ia e tau mena nai, kua ui atu, Ko ia ne fai teliga ke fanogonogo aki, ati fanogonogo mai a a ia.
9 Ka e hūhu kia ia hana tau tutaki, kua pehe age, Ko heigoa kia e fakatai ia?
10 Ti pehe atu a ia, Kua foaki atu kia mutolu ke iloa e mutolu e tau mena galo he kautu he Atua; ka kua tala age ai ke he falu ke he tau fakatai; kia kitekite a lautolu ka e nakai kitia; kia logona foki e lautolu ka e nakai maama kia lautolu.
11 Ko e fakatai hanai, Ko e saito, ko e kupu he Atua haia.
12 Ko lautolu ha he kauhala, ko lautolu ia ne fanogonogo; ati fina age ai e tiapolo, mo e uta kehe e kupu he tau loto ha lautolu, neke tua a lautolu, mo e fakamomoui ai.
13 Ko lautolu ha he mena patu, ko lautolu haia ka fanogonogo ke he kupu, ti talia ai mo e fiafia; ka e nakai fai vaka a lautolu, kua nakai leva ha lautolu a tua; ka hoko atu ke he tau aho ka kamatamata ai, ti o kehe ai a lautolu.
14 Ko e tau mena ne mokulu ke he vao talatala, ko lautolu haia ne fanogonogo, kua o atu ai, ati apitia ai ke he fakaatukehe, mo e tau koloa, mo e tau mena fakafiafia he mouiaga nai, nakai hohoko ke he motua ha lautolu a tau fua.
15 Ka ko e tau mena ha ha he kelekele mitaki, ko lautolu a ia ne fanogonogo ke he kupu, mo e taofi ki ai ke he loto fakamoli mo e mitaki; kua fua mai e tau fua ke he fakauka.
16 Nakai fai tagata ke tugi e ia e lamepa, ti ufi ai ke he kumete, po ke toka ki lalo he mohega; ka e toka ki luga he tokaaga lamepa, kia kitia atu e maama e lautolu he huhu mai.
17 Ha kua nakai fai mena galo ke nakai fakakite; ti nakai fai mena fufu, nakai fakailoa, ka e hoko he fakapuloa ni.
18 Hanai, a mutolu, po ke fefe ha mutolu a fanogonogo; ha ko ia kua moua, to foaki mai kia ia; ka ko ia kua nakai moua, to uta kehe ia ia e tau mena kua manatu kua moua e ia.
19 Kua o mai kia ia hana matua fifine, mo e hana tau matakainaga; ka kua nakai maeke ke hao mai kia ia ha ko e moto tagata.
20 Kua tala age e falu kia ia, kua pehe age, Kua tutu hau a matua fifine mo e hau a tau matakainaga i fafo, kua fia feleveia mo koe.
21 Ti tala age a ia, kua pehe age kia lautolu, Ko e haku a matua fifine, mo e haku a tau matakainaga, ko lautolu haia kua fanogonogo ke he kupu he Atua, mo e eke ai e lautolu.
22 Kua hake a ia ke he taha aho ke he foulua mo e tau tutaki hana; kua tala age foki a ia kia lautolu, Kia o a a tautolu ke he fahi uta he vai; ati tukuvaka atu ai a lautolu.
23 Kua fano e foulua ha lautolu, kua tugolo a ia, ti to hifo ai e afa ke he vai, kua puke e foulua, kua teitei tomo.
24 Ati o mai ai a lautolu kua fafagu a ia, kua pehe mai, Ko e Iki na e, ko e Iki na e, ko e mamate ha ne fai a tautolu; ti matike ai a ia, mo e hataki atu e matagi mo e tau peau he vai; ti mate ai, kua milino.
25 Kua tala age a ia kia lautolu, Ti ko e fe kia ha mutolu a tua? Kua matakutaku ni a lautolu mo e ofo; kua fevagavagavahauaki, Ko hai kia e tagata nai, ha ko e mena kua poaki a ia ke he tau matagi mo e vai, ti fanogonogo ai kia ia?
26 Kua hohoko atu a lautolu ke he fonua ko Katara, ko e fahi vai ia kua fehagai mo Kalilaia.
27 Kua hake a ia ki uta, ti feleveia ai mo ia e taha tagata he māga, kua leva tuai he heketia he tau temoni; kua nakai tapulu a ia, kua nakai nofo ke he fale, ka ko e tau tukuaga.
28 Kua kitia atu e ia a Iesu, ti ui atu ai a ia mo e fakaveli mai ki mua hana, kua tala age mo e leo lahi, Ko heigoa kia hāu kia au nai, Iesu na e, ko koe ni ko e Tama he Atua ne mua ue atu? Ke olelalo atu au kia koe, aua neke fakamamahi mai e koe au.
29 (Ha ko e mena poaki a ia ke he agaga kelea ke fano ki fafo he tagata. Ha ko e mena lagaloga e tapaki he temoni a ia; kua lili a ia ke he tau toua lapatoa, mo e tau mena ke fakamau aki hana tau hui, kua leoleo ai kia ia; ka e motumotuhia e tau toua kia ia, ati uta ai he temoni a ia ke he tutakale.)
30 Kua hūhu atu e Iesu kia ia, kua pehe atu, Ko hai kia hau a higoa? Kua tala mai a ia, Ko Lekeono; ha kua tokologa e tau temoni ne heke ia ia.
31 Kua olelalo mai a lautolu kia ia, aua neke poaki a ia kia lautolu ke o ke he po.
32 Na nonofo ai e tau puaka loga, kua totolo i luga he mouga; kua ole mai a lautolu kia ia, kia tuku mai kia lautolu ke heke ai. Ti tuku atu e ia a lautolu.
33 Ti o ai e tau temoni ki fafo he tagata, kua heke e tau puaka; ti hohopo hifo ai e fuifui puaka he mena pāpāti ke he vai, kua tomo ai.
34 Kua kitia e lautolu ne fagai e tau puaka e mena kua eke, ti fehola na lautolu, kua o atu mo e fakailoa ai ke he māga mo e tau kaina.
35 Ati o mai ai e faoa ke kitekite ke he mena kua eke; ne o mai kia Iesu, kua kitia atu e lautolu e tagata kua o ki fafo ia ia e tau temoni, ha ne nofo a ia he tau ve a Iesu; kua tapulu tuai, ti kua matala e loto; ti matakutaku ai a lautolu.
36 Kua tala age e lautolu ne kitia kia lautolu e mena kua malolo ai e tagata ne heketia.
37 Ti olelalo mai ai kia ia e motu oti ko Katara, kia fano kehe a ia ia lautolu; ha ko e mena kua hoko kia lautolu e matakutaku lahi; ti hake ai a ia ke he foulua, kua liu atu foki.
38 Kua ole mai kia ia e tagata ne o ki fafo ia ia e tau temoni ke fakalataha a laua mo ia; ka kua fekau atu e Iesu a ia, kua pehe atu,
39 Ati liu atu a koe ke he hau a faoa, mo e talatala atu e tau mena ne eke he Atua kia koe. Ti fano ai a ia kua fakamatala atu ke he māga oti e tau mena loga ne eke e Iesu kia ia.
40 Kua liu foki a Iesu, ti talia ai a ia he moto tagata; ha ko e mena talifaki mai a lautolu oti kia ia.
41 Kitiala, kua hau e taha tagata, ko Iairo e higoa, ko ia foki ne pule ke he sunako; kua fakaveli a ia ke he tau ve a Iesu, mo e ole mai kia ia, ke fina atu a ia ke he fale hana;
42 Ha ko e mena tokotaha hana tama fifine, tokai na kua hogofulu ma ua he tau tau hana, ko e mate ha ne fai a ia. Kua haele atu a ia, ka kua tautaomi mai kia ia e moto tagata.
43 Ko e taha fifine ne gagao he fakatafea hogofulu ma ua e tau tau, kua oti atu hana tau mena ke he tau ekekafo, ka kua nakai maeke he malolo ke he taha;
44 Kua fina age a ia ki tua hana, kua piki age ke he kala tapulu hana; ti maulu ai agataha hana fakatafea.
45 Kua tala age a Iesu, Ko hai ne piki mai kia au? kua fakatikai mai e tau tagata oti, ti tala age a Peteru mo lautolu ne fakalataha mo ia, Ko e Iki na e, kua tautaomi mo e feholiaki mai e moto tagata kia koe, ti pehe mai kia a koe, Ko hai a ia ne piki mai kia au?
46 Kua tala age a Iesu, Ne piki mai ni taha kia au; ha ko e mena kua iloa e au kua fina atu haku a mana.
47 Kua iloa he fifine, kua nakai galo a ia, ti hau ai mo e vivivivi, kua fakaveli mai ki mua hana, mo e talahau kia ia ki mua he motu oti e mena ne piki atu ai a ia kia ia, ti fakamalolo ai agataha a ia.
48 Kua tala age a ia kia ia, Haku tama fifine na e, kia fakamanavalahi a koe; ko e hau a tua kua moui ai a koe; ati fano a a koe mo e monuina.
49 Ha ne vagahau a ia, kua hau taha mai he fale he tagata ne pule he sunako, kua tala mai kia ia, Kua mate tuai e tama fifine hau, ua fakalavelave ke he akoako.
50 Kua logona e Iesu, ti tala age ai a ia kia ia, kua pehe age, Ua matakutaku a koe; kia tua a koe kuenaia; to moui ai a ia.
51 Kua hu atu a ia ke he fale, nakai maeke e ia ke hu atu taha, ka ko Peteru ni, mo Iakopo, mo Ioane, ko e matua tane foki mo e matua fifine he tama fifine.
52 Kua tagi hake a lautolu oti, mo e tagi tatuki, ha ko ia; ka kua tala age a ia Toka a e tagi hake, nakai mate a ia, ka kua mohe.
53 Kua feki a lautolu kia ia, ha kua iloa e lautolu kua mate a ia.
54 Ka ko ia, kua vega e ia a lautolu oti ki fafo, ti toto ai e ia hana a lima, kua ui, kua pehe age, Ma kute na e, ati matike a.
55 Ti kua liu mai hana agaga, ti matike ai agataha a ia; kua tala age a ia, kia age e tau mena ke ana kai.
56 Ati ofomate ai e na matua hana; ka e poaki e ia a laua, aua neke talahau atu kia taha e mena ne eke.