Luka 9:1-62
9 KUA fakapotopoto e ia e tokohogofulu ma ua he hana tau tutaki, ti tuku atu ai e ia kia lautolu e malolo mo e pule ke he tau temoni oti, kia fakamalolo foki e tau gagao.
2 Ti fakafano atu e ia a lautolu, ke fakamatalaatu e kautu he Atua, mo e fakamalolo e tau tagata gagao.
3 Kua tala age foki a ia kia lautolu, Ua uta e mutolu taha mena mo e fenoga, po ke tau tokotoko, po ke kato, po ke mena kai, po ke tupe, aua neke takiua e tau tapulu tino.
4 Ko e fale foki ka huhu atu a mutolu ki ai, kia nonofo ai, to o ai a mutolu.
5 Ko lautolu foki nakai talia a mutolu, ka o kehe a mutolu he māga ia, kia lulululu atu a e kelekele he tau hui ha mutolu, kia eke mo talahau kia lautolu.
6 Kua o atu a lautolu, ti o fano ke he tau māga kua fakamatala e vagahau mitaki, mo e fakamalolo e tau gagao ke he tau mena oti.
7 Kua logona he patuiki ko Herota e tau mena oti ne eke e ia, ti fakahahaku ai a ia, ha kua tala mai he falu, Kua matike mai a Ioane ia lautolu kua mamate;
8 Ka ko falu, Kua fakakite mai a Elia; ka ko falu, Kua matike mai taha he tau perofeta i tuai.
9 Ka e pehe age a Herota, Ne hio kehe e au e ulu a Ioane; ka ko hai hanai kua fanogonogo ai au ke he tau mena pehena? Ti foli a ia ke kitia a ia.
10 Kua liliu mai foki e tau aposetolo, mo e fakamatala mai kia ia e tau mena oti ne eke e lautolu. Kua takitaki atu e ia a lautolu, hoko lautolu, ke he mena tokanoa he māga, ko Petesaita e higoa.
11 Kua kitia he moto tagata, ti mumui atu a lautolu kia ia; kua talia e ia a lautolu, kua vagahau atu foki kia lautolu ke he kautu he Atua, ti fakamalolo e ia a lautolu ne fia malolo.
12 Kua leva tuai e aho, ati o mai ai kia ia e tokohogofulu ma ua, kua pehe mai, Kia fakafano atu e koe e moto tagata, kia o a lautolu ke he tau magamotu mo e tau kaina kua tata mai, ke api ai, ke moua ai foki e tau mena ke kai; ha ko e tutakale ne nonofo ai nai a tautolu.
13 Ka e pehe age a ia kia lautolu, Kia age e mutolu e tau mena ke kai e lautolu. Ti pehe mai a lautolu, Nakai fai mena a tautolu, lima noa ne areto, ti ua e ika; to o la a mautolu ke fakatau e tau mena ke kai ai e motu oti nai.
14 Ha ko lautolu, tokai ko e lima e afe he tau tane. Kua tala age a ia ke he tau tutaki hana, Tala age a a mutolu kia tatakoto a lautolu ke he tau vahega, takitokolimagofulu.
15 Ti eke pihia ni a lautolu, mo e fekau a lautolu ke tatakoto ki lalo.
16 Ati toto ai e ia e lima a areto, mo e na ika ua, kua haga hake ke he lagi, kua fakaaue; ti tofitofi, mo e age ke he hana tau tutaki ke tufatufa age ke he moto tagata.
17 Ti kai ai a lautolu, kua mamakona oti ni; ti uta foki ha lautolu a tau valavala mena ne toe, hogofulu ma ua ni e kato.
18 Kua liogi tokotaha a ia; ne fakalataha mo ia hana tau tutaki; ti kua hūhu age a ia kia lautolu, kua pehe age, Ko e heigoa e tau kupu he tau tagata kia au po ko hai?
19 Kua tala age a lautolu, kua pehe age, Ko Ioane ko e papatiso; ka ko falu, Ko Elia; ka ko falu foki, Kua matike mai taha he tau perofeta i tuai.
20 Ti pehe a ia kia lautolu, Ka ko mutolu, ko e heigoa e tau kupu ha mutolu kia au po ko hai? Ti tala age ai a Peteru, kua pehe, Ko e Keriso he Atua a koe.
21 Ati hataki ai e ia a lautolu, kua tala age, neke talahau e mena ia ke he taha;
22 Kua pehe atu, Ko e mena lata ke mamahi he Tama he tagata he tau mena loga, ke tiaki foki a ia he tau patu, mo e tau ekepoa ne mua, mo e tau tohikupu; ke kelipopo foki a ia, ka fakatu hake foki a ia ke he aho tolu.
23 Kua tala age a ia ke he tau tagata oti, Ka fia mui mai taha kia au, ua omaoma a ia kia ia, ka e nikiti e ia hana satauro ke he tau aho oti, ti mui mai kia au.
24 Ka ko e tagata ne fia kuku e moui hana, to moumou ai kia ia; ka ko ia ke moumou hana moui ha ko au, to fakamoui ai e ia.
25 Ha kua aoga ha ha ke he tagata, kaeke kua moua e ia e lalolagi oti, ka e moumou ai e ia a ia, po ke tiaki ai?
26 Ha ko e tagata ke ma ia au, mo e haku a tau kupu, to ma ni ia ia e Tama he tagata, ka hau a ia mo e lilifu hana, mo e lilifu he Matua, mo e lilifu he tau agelu tapu.
27 Ko e moli, ke tala atu e au kia mutolu, ha ne tutu mai falu hinai, nakai hoko kia lautolu e mate, ato kitia e lautolu e kautu he Atua.
28 Kua mole tuai e tau kupu ia, na kua po valu, ti uta ai e ia a Peteru, mo Ioane, mo Iakopo, kua hake ke he mouga ke liogi.
29 Ha ha ne liogi a ia, kua faliu hana tino, kua hinavake mo e kikila lahi mai hana tau tapulu.
30 Kitiala, kua vagavagahau mo ia e tokoua a tagata, ko Mose mo Elia a laua.
31 Ne fakakite mai a laua mo e lilifu; kua vagavagahau a lautolu ke he hana matulei, ke fakahiku ai e ia i Ierusalema.
32 Ka ko Peteru mo laua ne fakalataha mo ia kua fia mohe a lautolu; ka e ala a lautolu, ti kitia e lautolu hana lilifu, mo e na tagata ne tutu fakalataha mo ia.
33 Kua o kehe tuai a laua ia ia, ti tala age ai a Peteru kia Iesu, Ko e Iki na e, mitaki he nonofo a tautolu i hinai; to ta e mautolu tolu e fale api, māu taha, ma Mose taha, ma Elia foki taha; kua nakai iloa e ia e mena ne talahau e ia.
34 Ha ne vagahau a ia, ka e hoko mai e aolagi, kua ūfia ai a lautolu; kua matakutaku a lautolu he hoko mai e aolagi.
35 Ti hau ai e leo mai he aolagi, kua pehe mai, Ko e haku a Tama fakahele hanā; Kia fanogonogo a mutolu kia ia.
36 Kua mole atu e leo, ati kitia atu ai a Iesu hokoia. Kua nakai lelea ni a lautolu, ti nakai talahau kia taha he na aho ia ha mena he tau mena ne kitekite a lautolu ki ai.
37 Ko e pogipogi, kua o hifo ai a lautolu he mouga, ti feleveia ai mo ia e moto tagata tokologa.
38 Kitiala, ko e taha he moto tagata, kua ui mai, Ko e akoako na e, ke olelalo atu au kia koe ke kitekite mai a koe ke he haku a tama tane, ha ko ia ko e haku a tama fuataha.
39 Kitiala, kua tapaki a ia he agaga, ti fakatutū ai agataha, kua fakafitikeleu a ia, mo e ifo e gutu, kua tatuki a ia, ti fano kehe fetamaki ia ia.
40 Ne olelalo atu foki au ke he tau tutaki hāu ke vega a ia ki fafo; ka kua nakai maeke ia lautolu.
41 Kua tala age a Iesu, kua pehe age, Ko e hau nakai tua mo e faliuliu, ti nofo au ia mutolu, mo e fakauka kia mutolu ato a fe? Ati ta mai a hau a tama tane ki hinai.
42 Kua hau a ia, ti palu hifo a ia he temoni, mo e fakafitikeleu ai. Ati hataki ai e Iesu e agaga kelea kua fakamalolo foki e tama, mo e liuaki atu a ia ke he hana matua tane.
43 Ti ofomate ai a lautolu oti ke he mana he Atua. Kua ofo a lautolu oti ke he tau mena oti ne eke e Iesu, ti tala age ai a ia ke he hana tau tutaki,
44 Kia fanogonogo fakamitaki a mutolu ke he tau kupu nai; ha ko e tuku atu ne fai e Tama he tagata ke he tau lima he tau tagata.
45 Ka e nakai maama kia lautolu e kupu na, kua galo ia lautolu, kia nakai iloa ai e lautolu e mena ia; kua matakutaku foki a lautolu ke hūhu kia ia e kupu ia.
46 Ati tupu ai ia lautolu e taufetoko, po ko hai ia lautolu ke mua?
47 Kua fioia e Iesu e tau manamanatu he tau loto ha lautolu, ti toto ai e ia e tama tote, mo e fakatu a ia he tapa hana;
48 Ti tala age a ia kia lautolu, Ko ia ke talia e tama tote nai ha ko e haku a higoa, kua talia e ia au; ko ia foki ke talia au, kua talia e ia a ia ne fakafano mai au; ha ko ia ne tote ue atu ia mutolu oti, to mua a ia ni.
49 Ati tala age ai a Ioane, kua pehe age, Ko e Iki na e, ne kitia e mautolu taha ha ne vega e tau temoni ke he hau a higoa, ti hataki e mautolu a ia he nakai mui mai a ia kia tautolu.
50 Ti pehe age a Iesu kia ia, Ua hataki e mutolu a ia; ha ko ia nakai kau kehe kia tautolu, kua kau fakalataha mo tautolu a ia.
51 Kua hoko atu ke he vaha ke ta hake ai a ia, kua haga fakamakai a ia ke haele ki Ierusalema;
52 Kua fakafano atu e ia e tau fekafekau ki mua hana; kua o atu ai a lautolu mo e afe ke he taha māga i Samaria, ke taute ai māna.
53 Ka e nakai talia e lautolu a ia, ha kua gutu atu hana fenoga ki Ierusalema.
54 Kua iloa he tau tutaki hana ko Iakopo mo Ioane, ti pehe a laua, Ko e Iki na e, kua loto nakai a koe, ke tala age a maua ke he afi ke hifo mai he lagi, ke fakaotioti a lautolu, ke tuga ne eke e Elia?
55 Kua haga ki tua a ia, mo e akonaki atu a laua, kua pehe age, Nakai iloa e mua e kakano ha mua a tau loto;
56 Ha kua nakai hau e Tama he tagata ke fakaoti e tau moui he tau tagata, ka e fakamoui ai. Ti o atu ai a lautolu ke he taha māga.
57 Kua o a lautolu he puhala, ti pehe mai ai e taha kia ia, Ko e Iki na e, to mui atu au kia koe ke he tau mena oti ke haele a koe ki ai.
58 Ti pehe age a Iesu kia ia, Na fai ofaga e tau alope, ti fai mena foki ke momohe ai e tau manu lele; ka ko e Tama he tagata nakai fai mena a ia ke mohe ai.
59 Kua tala age a ia ke he taha, Ati mui mai a kia au. Ka kua pehe mai a ia, Ko e Iki na e, toka au ke fano fakamua ke tanu haku a matua tane.
60 Ka e tala age a Iesu kia ia, Ati tokai a lautolu kua mamate ke tanu ha lautolu a tau tagata mamate; ka ko koe, kia fano mo e fakakite atu e kautu he Atua.
61 Kua tala age foki taha kia ia, Ko e Iki na e, to mui atu au kia koe; ka e toka au ke mavehe fakamua mo e haku a faoa.
62 Ka e pehe age a Iesu kia ia, Ko ia kua toto hana lima ke he arote mo e haga ki tua, nakai lata a ia mo e kautu he Atua.