Malaki 3:1-18
3 KITIALA, kua fakafano atu e au haku a fekau, ke tauteute e ia e puhala ki mua haku; to hoko fakalutukia mai foki e Iki ke he hana faituga, ko ia ne kumi ai e mutolu, ko e Agelu he maveheaga haia, ko ia kua manako a mutolu ki ai; kitiala, to haele mai ni a ia, kua pihia mai a Iehova Sapaota
2 Ka ko hai ke fakauka ai ke he aho ka haele mai ai a ia? ko hai foki ke tu atu ka fakakite mai a ia? ha ko ia kua tuga e afi he tagata tunu auro, kua tuga foki e moli he tagata unu tapulu;
3 Kua nofo a ia po ke tagata kua tunu mo e fakamea e ario; to fakamea ai e ia e fanau a Levi, to vevehe kehe foki e ia e kelekele ia lautolu tuga he eke ke he auro mo e ario; ti ta atu ai e lautolu e tau poa kia Iehova kua eke mo e mahani tututonu.
4 Ti mitaki ai kia Iehova e poa a Iuta mo Ierusalema, tuga ne tau aho i tuai, tuga ne tau tau fakamua.
5 To fakatata ai au kia mutolu ke he fakafiliaga; to fakaave foki au ke eke mo talahau kia lautolu kua eke e tau lagatau he taulaatua, mo lautolu kua faivao, mo lautolu kua omonuo pikopiko, mo lautolu kua fofo e palepale, kua favale atu foki ke he fifine takape, mo e tama kua mamate hana tau matua, katoa mo lautolu kua fakakeukeu e fakafiliaga he tagata kehe; kua nakai matakutaku foki a lautolu kia au, kua pihia mai a Iehova Sapaota.
6 Ha ko au ko Iehova nakai ni hiki e au haku mahani; ko e mena ia kua nakai fakaoti ai a mutolu ko e fanau a Iakopo.
7 Kua o kehe a mutolu mo e tau fakatufono haku, mo e nakai omaoma a mutolu ki ai, tali mai he tau aho he tau matua ha mutolu. Kia liliu mai a a mutolu kia au, ti liu atu ai au kia mutolu, kua pihia mai a Iehova Sapaota. Ka kua pehe mai a mutolu, Ko e heigoa e mena ke liliu atu ai a mautolu?
8 Ko e mena fofo kia he tagata e tau mena he Atua? ka ko mutolu, kua fofo e mutolu haku a tau mena. Ka kua pehe mai a mutolu, Ko e heigoa kia he tau mena hau kua fofo e mautolu? Kua fofo e mutolu e tau mena ne hogofulu aki ha mutolu a tau mena, katoa mo e tau poa.
9 Kua malaia lahi ni a mutolu, ko e motu oti ni, ha kua fofo e mutolu haku a tau mena.
10 Kia ta mai e mutolu e tau mena ke hogofulu aki ha mutolu a tau mena oti kana ke he fale kua tatanaki ai e tau mena; kia ha i ai e tau mena kai ke he haku a fale; mo e kamatamata mai ai e mutolu au ke he tau mena na, kua pihia mai a Iehova Sapaota; po ke hafagi nakai e au e tau pa he lagi ma mutolu, mo e liligi atu e au e monuina ma mutolu, ato lahi ue atu ni haia.
11 To akonaki atu e au a ia ne kai e tau mena ha ko mutolu, ti nakai moumou ai e ia e tau fua he kelekele ha mutolu; ti nakai mokulu mataali e tau fua he tau vine ke he ha mutolu a tau fonua, kua pihia mai a Iehova Sapaota.
12 To fakamonuina atu foki he tau motu oti kia mutolu; ha ko e mena to eke a mutolu mo motu kua manako ki ai e tau tagata, kua pihia mai a Iehova Sapaota.
13 Kua mamafa ha mutolu a tau kupu kia au, kua pihia mai a Iehova, ka kua pehe mai a mutolu, Ko e heigoa kia ha mautolu a tau kupu ne vagahau atu ai kia koe?
14 Kua pehe age a mutolu, Nakai aoga ke fekafekau ke he Atua, ko e heigoa foki e mena kua moua e tautolu he omaoma ke he hana fekau, mo e o fano a tautolu mo e tau tapulu pilo ki mua a Iehova Sapaota.
15 Hanai, kua talahau ai e tautolu kua monuina a lautolu kua fakatokoluga; kua ati hake ai foki a lautolu kua mahani kelea; kua kamatamata a lautolu ke he Atua, ka e hao ni a lautolu.
16 Ti fevagavagahau aki a lautolu ne matakutaku kia Iehova; kua hagao mai foki a Iehova mo e fanogonogo mai; ti tohi ai e tohi ke fakamanatu ai ki mua hana, ma lautolu ne matakutaku kia Iehova, mo e manamanatu ai ke he hana higoa.
17 To eke foki a lautolu maku, ko e koloa uho ni, kua pihia mai a Iehova Sapaota, ke he aho kua kotofa ai e au; to fakaalofa foki au kia lautolu, tuga he fakaalofa e tagata ke he hana tama tane kua fekafekau kia ia.
18 Ti liliu kitia ai e mutolu kua kehe e tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.