Mareko 1:1-45
1 KO e kamataaga he vagahau mitaki a Iesu Keriso ko e Tama he Atua.
2 Tuga ne tohi he tau perofeta, Kitiala, to fekau atu e au haku a fekafekau ke mua atu a ia ki ho mua, ka taute e ia hāu a hala ki ho mua.
3 Ko e leo he taha tagata ha ne ui he tutakale, ati tauteute a e hala he Iki; ati fakahako a e tau puhala māna.
4 Kua eke e Ioane hana papatisoaga ke he tutakale, mo e fakamatala atu e papatisoaga he tokihala kia fakamagalo ai e tau hala.
5 Kua o age foki e motu oti a Iutaia kia ia, katoa mo e tau tagata Ierusalema, ti papatiso atu e ia a lautolu oti ke he vailele ko Ioritana, kua fakakite atu ai ha lautolu a tau hala.
6 Kua tapulu a Ioane ke he ie fulufulu kamela, ko e pipi kili manu foki ke he hana tokupu; ne kai foki e ia e tau hē akerisi mo e meli vao.
7 Kua fakamatala e ia, kua pehe, Na mui mai taha ia au, kua homo atu a ia ia au, nakai aoga au ke tukutuku hifo mo e vetevete e pipiaga he hana tau afialoalohui.
8 Ko au ni kua papatiso atu e au a mutolu ke he vai; ka ko ia to papatiso e ia a mutolu ke he Agaga Tapu.
9 Ko e vaha ia kua haele age ai a Iesu mai Nasareta i Kalilaia, kua papatiso foki e Ioane a ia i Ioritana.
10 Kua haele hake a ia he vai, ti kitia ai agataha e ia e lagi ha ne maihi mai, mo e Agaga kua haele hifo kia ia tuga ne lupe.
11 Kua vagahau mai foki e leo mai he lagi, kua pehe mai, Ko e haku a Tama fakahele a koe, kua fiafia au kia koe.
12 Ti uta ai agataha he Agaga a ia ke he tutakale.
13 Ti ha i ai a ia ke he tutakale fagofulu e po, kua kamatamata ai e Satani; ha i ai a ia mo e tau manu favale, kua fekafekau foki e tau agelu kia ia.
14 Kua tuku tuai a Ioane ke he fale puipui, ti haele ai a Iesu ki Kalilaia, kua fakamatala ai e vagahau mitaki he kautu he Atua, kua pehe atu,
15 Kua hoko mai e vaha, kua tata mai tuai e kautu he Atua; ati tokihala a, mo e talia e vagahau mitaki.
16 Kua fina age a ia, ha he tapa vai he vai i Kalilaia, ti kitia ai e ia a Simona mo Aneterea e matakainaga hana, ha ne liti e kupega ke he vai, ha ko e na tagata takafaga a laua.
17 Ti tala age a Iesu kia laua, Ati mumui mai a kia au, to eke e au a mua mo takafaga ke he tau tagata.
18 Ti toka ai agataha e laua ha laua a tau kupega, ka e mumui atu ni kia ia.
19 Kua tolotolomaki atu fakatote he mena ia, ti kitia ai e ia a Iakopo, ko e tama a Sepetaio, mo Ioane e matakainaga hana, ha he foulua, ha ne ono ha laua a tau kupega.
20 Ti ui atu agataha a ia kia laua; ti toka ai e laua ha laua a matua ko Sepetaio ke he foulua mo e tau fekafekau, ka e mumui atu kia ia.
21 Kua o atu a lautolu ki Kapanaumi; ko e sapati kua haele atu ai a ia ke he sunako mo e fakaako atu ai.
22 Kua ofomate foki a lautolu he hana tau kupu, ha kua fakaako a ia kia lautolu tuga ne tagata ha i ai e pule, ka e nakai tuga e tau tohikupu.
23 Na nofo ai foki ke he sunako ha lautolu e tagata ha i ai e agaga kelea; kua ui foki a ia,
24 Kua pehe age, Oi, Iesu na e, ko e Nasareta! ko heigoa hau kia mautolu? Kua haele mai kia a koe ke mahakava ai a mautolu? Kua iloa e au a koe, ko e Tagata Tapu he Atua a koe.
25 Ti kua hataki age e Iesu a ia, kua pehe age, Fakamate a, ti fano a a koe ki fafo ia ia.
26 Ti fakafitikia ai he agaga kelea a ia, kua ui foki mo e leo lahi, ti fano ai ki fafo ia ia.
27 Ti ofomate ai a lautolu oti, mo e hūhu taha ke he taha, kua pehe Ko heigoa a enei? Ko heigoa e tau kupu fakaako fou nai? ha kua pule a ia ke he tau agaga kelea, mo e fekau ai, ti fanogonogo mai ai a lautolu kia ia.
28 Ati tuogo ai agataha e tala ia ke he fahi oti ko Kalilaia.
29 Kua huhu atu a lautolu ki fafo he sunako, ti o atu ai agataha a lautolu ke he fale a Simona mo Aneterea, kua o fakalataha mo Iakopo mo Ioane.
30 Na takoto ai foki e matua fugavai fifine a Simona he kafo vevela; ti tala age ai agataha e lautolu a ia kia ia.
31 Kia unuunu atu a ia kia ia, kua toto e ia hana a lima, kua fakatu a ia ki luga; ti mole ai agataha hana a kafo vevela, ti kua fekafekau ai a ia kia lautolu.
32 Kua hoko ke he magaaho afiafi, kua to tuai e la, ti ta mai ai e lautolu e tau tagata oti kua gagao, katoa mo lautolu kua heketia he tau temoni.
33 Kua tatanaki oti age foki e māga ia ke he gutuhala.
34 Ti fakamalolo e ia e tau tagata tokologa kua gagao he tau gagao kehekehe, kua vega foki e ia e tau temoni tokologa; ti hataki e ia e tau temoni, ua vagahau a lautolu ha kua iloa e lautolu a ia.
35 Ko e magaaho pogipogi kua uhu matike a ia, ti hu atu ai a ia ki fafo, mo e haele aga ke he mena tokanoa, kua liogi ai.
36 Na mumui fakamakutu foki kia ia a Simona mo lautolu ne fakalataha mo ia, ke kumi a ia.
37 Kua moua e lautolu a ia, ti tala age e lautolu kia ia, Ha ne kumi he tau tagata oti a koe.
38 Ti pehe a ia kia lautolu, Kia o a tautolu ke he tau māga ne tata mai, ke fakamatala atu e au ki ai e vagahau mitaki, ha ko e mena ia ne hau ai au.
39 Ne fakamatala foki e ia e vagahau mitaki ke he tau sunako ha lautolu i Kalilaia oti, mo e vega e tau temoni.
40 Kua hau foki e taha lepela kia ia, kua ole kia ia, mo e fakatokotui kia ia, kua pehe, Kaeke kua finagalo a koe ki ai, kua maeke ni ia koe ke fakamea au.
41 Kua hohofi noa e fakaalofa a Iesu kia ia, kua fakaolo atu hana a lima, kua piki atu kia ia, mo e tala age ki ai, Mena loto au ki ai; kia mea a koe.
42 Kua vagahau atu a ia, ti maulu ai agataha e kafo lepela ia ia, kua mea tuai a ia.
43 Kua hataki fakalahi foki a ia, ti tuku atu agataha a ia ke fano.
44 Kua pehe atu foki kia ia, A koe, neke talahau atu e koe ha mena kia taha; ka e fano a a koe mo e fakakite atu a koe ke he ekepoa, mo e uta e tau poa ne puaki mai ai a Mose, he hau a fakameaga ke eke mo fakamailoga kia lautolu.
45 Kua fano a ia kua kamata e ia ke fakamatala fano mo e fakapuloa e tala ati oti ka e nakai tuai maeke ia Iesu ke fina age fakakite ke he māga, ka kua nofo ki tua ke he tau mena tokanoa, na o age foki kia ia e faoa mai he tau fahi oti.