Mareko 10:1-52
10 KUA toka e ia e mena ia, kua hoko atu a ia ke he kelekele i Iutaia he fahi atu a Ioritana; ti liu foki tolo mai e moto tagata kia ia, kua liu foki fakaako atu ai a ia kia lautolu tuga ne mahani ai a ia.
2 Ti o mai e tau farasaio kua hūhu age kia ia, ha ne kamatamata kia ia, Kua lata nakai ke tiaki he tane hana hoana?
3 Ti tala age a ia kia lautolu, kua pehe age, Ko e heigoa e poaki a Mose kia mutolu.
4 Ti kua tala mai ai a lautolu, Ne tuku mai e Mose kia mautolu, ke tohi e mautolu e taha tohi vega, mo e tiaki a ia.
5 Ti tala age ai a Iesu, kua pehe age kia lautolu, Ha kua mao ha mutolu a tau loto, ne tohi atu ai e ia e poaki na kia mutolu.
6 Ka e tali mai he kamataaga he tau mena ne eke, ne eke ai he Atua a laua ko e tane mo e fifine.
7 Ko e mena ia ke toka ai he tane hana matua tane mo e hana matua fifine, ka e fakalataha mo e hana hoana,
8 To eke ni a laua mo tino taha; hanai, nakai tuai tokoua a laua, ka e tino taha ni.
9 Hanai, ko ia kua fakalataha he Atua, aua neke vevehe he taha tagata.
10 Kua liu foki hūhu age hana tau tutaki kia ia ke he mena ia ki fale.
11 Ti kua tala age ai a ia kia lautolu, Ko e tagata kua tiaki hana hoana, mo e hoana ke he taha, kua faivao a ia kia ia.
12 Kaeke foki ke tiaki he fifine hana tane, mo e tane ke he taha, kua faivao tuai a ia.
13 Ti ta mai e lautolu kia ia e tau tama ikiiki, kia piki age a ia kia lautolu; ka kua hataki he tau tutaki a lautolu ne ta mai ai.
14 Kua fioia e Iesu ti hukia ai hana finagalo, ti pehe age a ia kia lautolu, Tokai e tau tama ikiiki, ke o mai a lautolu kia au, ti ua hataki a lautolu; ha ko e mena tuga a lautolu nai e tau tagata ha he kautu he Atua.
15 Ko e moli, ke tala atu e au kia mutolu, ko e tagata nakai talia e kautu he Atua tuga ne tama tote, nakai hu atu a ia ki ai.
16 Ti kua nikiti ai e ia a lautolu he hana tau lima, ti fakalago e ia hana tau lima ki luga ia lautolu, mo e fakamonuina ai.
17 Kua haele age a ia ke he puhala, kua poi mai ai taha, kua fakatokotui kia ia, mo e hūhu age ki ai, Ko e akoako mitaki na e, ko e heigoa e mena ke eke e au ke moua mai ai e au e moui tukulagi?
18 Ka e pehe age a Iesu kia ia, Kua totoku he ha e koe au kua mitaki? Nakai mitaki taha, ka ko e tokotaha ni hokoia, ko e Atua ia.
19 Kua iloa e koe e tau fakatufono, Ua faivao a koe; ua keli tagata a koe; ua kaiha a koe; ua fatipiko a koe; ua mahani hepehepe a koe; kia fakalilifu a koe ke he hau a matua tane, mo e hau a matua fifine.
20 Ti kua tala age ai a ia, kua pehe age kia ia, Ko e akoako na e, kua omaoma e au e tau mena oti na, tali mai he tote au.
21 Kua kitekite atu a Iesu kia ia, kua fakaalofa kia ia, ti pehe atu kia ia, Taha e mena kua toe nakaila moua e koe, Ati fano a, fakafua atu hau a tau mena oti, mo e age ke he tau nonofogati, ti moua ai e koe e koloa lahi ke he lagi; ati hau a koe, mo e nikiti e satauro, ti mui mai kia au.
22 Ti mamahi ai a ia ke he vagahau ia, kua fano kehe a ia mo e momoko, ha ko e mena loga hana koloa.
23 Ti kitekite fano a Iesu, mo e tala age ke he tau tutaki hana, Ko e mena uka ke hu atu e tau tagata muhu koloa ke he kautu he Atua.
24 Ti ofomate ai e tau tutaki ke he tau kupu hana. Ka e liu foki tala age a Iesu kia lautolu, kua pehe age, Ma fanau na e, ko e mena uka ke huhu a lautolu kua tua ke he koloa ke he kautu he Atua.
25 Mena maeke vave ke hu atu e kamela ke he pu he nila, ka e uka ke hu atu e tagata muhu koloa ke he kautu he Atua.
26 Ati ofomate lahi ai na lautolu, kua fevagavagahauaki a lautolu, kua pehe, To maeke ke fakamoui a hai?
27 Ka e kitekite a Iesu kia lautolu, mo e pehe, Nakai maeke ke he tau tagata, ka ko e Atua ni; ha kua maeke ke he Atua e tau mena oti kana.
28 Ti kamata ai a Peteru ke pehe age kia ia, Kitiala, kua toka tuai e mautolu e tau mena oti, ka e mumui atu kia koe.
29 Ti tala age ai a Iesu, kua pehe age, Ko e moli, ke tala atu ni au kia mutolu, ko e tagata ke toka e fale, po ke tau matakainaga, po ke tau mahakitaga, po ke matua tane, po ke matua fifine, po ke hoana, po ke fanau, po ke fonua, ha ko au ni mo e vagahau mitaki,
30 To moua e ia takiteau ke he mouiaga nai, ko e tau fale, mo e tau matakainaga, mo e tau mahakitaga, mo e tau matua fifine, mo e tau fanau, mo e tau fonua, katoa foki mo e favale mai, ka ko e moui he fahi atu ke moua ai e moui tukulagi.
31 Ka e tokologa a lautolu ne mumua ke uta ke fakamui a lautolu, ko lautolu foki ne fakamui to mumua a lautolu.
32 Ha he magahehala a lautolu, ha ne o hake ki Ierusalema, kua mua foki a Iesu kia lautolu; ti ofomate a lautolu, kua mumui atu foki a lautolu kia ia mo e matakutaku. Ti liu foki uta e ia e tokohogofulu ma ua, mo e kamata ke tala age kia lautolu e tau mena ke hoko kia ia,
33 Kua pehe atu, Kitiala, ko e o hake ha ne fai a tautolu ki Ierusalema, ti tuku atu ai e Tama he tagata ke he tau ekepoa ne mua, mo e tau tohikupu, to fakahala e lautolu a ia ke mate; to tuku atu foki e ia ke he tau tagata he motu kehe.
34 To fefeua foki e lautolu a ia, to fahi e lautolu a ia, to tauanu kia ia, mo e kelipopo a ia; ti tu mai a ia ke he aho tolu.
35 Kua o mai kia ia a Iakopo mo Ioane, ko e fanau a Sepetaio, kua pehe mai, Ko e akoako na e, kua manako a maua kia eke e koe ma maua e mena ka ole atu ai a maua.
36 Ti pehe age a ia kia laua, Ko e heigoa e mena ne manako a mua ki ai ke eke e au ma mua;
37 Ti tala age a laua kia ia, Kia tuku mai e koe a maua ke nonofo a maua ko e taha ke he hau a fahi matau, mo e taha ke he hau a fahi hema ke he hau a lilifu.
38 Kua tala age a Iesu kia laua, Nakai iloa e mua e mena ne ole mai ai a mua; to maeke nakai e mua ke inu ke he kapiniu ka inu ai au, mo e papatiso a mua ke he papatisoaga ka papatiso ai au?
39 Ti pehe age a laua kia ia, Mena maeke ia maua. Kua tala age ai a Iesu kia laua, To inu ni a mua ke he kapiniu ke inu ai au; katoa mo e papatisoaga ke papatiso ai au, to papatiso ai foki a mua;
40 Ka ko e tagata ke nofo he haku a fahi matau mo e haku a fahi hema, nakai ko e haku ia ke ta atu, ka ko lautolu hoko lautolu kua taute ma lautolu e mena ia.
41 Kua logona ai e tokohogofulu, ti kamata ai ke mamahi ha lautolu a tau loto kia Iakopo mo Ioane.
42 Ka e ui atu a Iesu kia lautolu, kua pehe atu a ia kia lautolu, Kua iloa e mutolu, ko e tau iki he tau motu kehe kua pule kia lautolu; mo e tau iki lalahi foki ha ha ia lautolu, kua pule a lautolu kia lautolu;
43 Ka e aua neke pihia a mutolu; ka ko e tagata ia mutolu ne fia iki to eke a ia mo fekafekau ha mutolu;
44 Ko ia ne fia mua ia mutolu, to eke a ia mo tupa ha mutolu oti.
45 Ha ko e Tama he tagata foki, nakai hau a ia ke fekafekau e tau tagata kia ia; ka kia fekafekau a ia, mo e foaki atu hana moui, ko e lukutoto ke hukui aki e tau tagata tokologa.
46 Kua hoko atu a lautolu ki Ieriko, ha ne o atu foki i Ieriko, ko ia katoa mo e hana tau tutaki, mo e moto tagata tokologa, kua nofo mai ke he kauhala a Patimaio e matapouli, ko e tama a Timaio, ke kaiole.
47 Kua logona e ia ha i ai a Iesu ko e Nasareta, ti kamata ai a ia ke ui, kua pehe age, Iesu na e, ko e tama a Tavita, kia fakaalofa mai a a koe kia au.
48 Ti hataki fakalahi atu ai e tau tagata tokologa kia fakamate a ia; ka ko ia ni kua au atu ai he ui, Ko e tama a Tavita na e, kia fakaalofa mai a koe kia au.
49 Ti tu ai a Iesu, mo e tala age, ke ui atu kia ia; ti ui age a lautolu ke he matapouli, kua pehe age kia ia, Kia fakamanavalahi a a koe, ati matike a, ha ne ui mai a ia kia koe.
50 Ti tiaki ai e ia hana tapulu, kua matike, mo e fano kia Iesu.
51 Ti tala age ai a Iesu, kua pehe age kia ia, Kua loto a koe ke ha ke eke e au kia koe? Ti tala age ai e matapouli kia ia, Raponi na e, kia maama haku tau mata.
52 Ti pehe age a Iesu kia ia, Ati fano a; kua moui tuai a koe he hau a tua kia au. Ti maama ai agataha hana tau mata; ti mui age a ia kia Iesu ke he puhala.