Mareko 13:1-37
13 KUA hu a ia ki fafo he faituga, ti kua tala age ai e taha he hana tau tutaki kia ia, Ko e akoako na e, ati kitekite a ke he tau maka nai kua lalahi pihia, mo e tau fale nai kua lalahi pihia.
2 Kua tala age a Iesu kia ia, kua pehe age, Kua kitekite kia a koe ke he tau fale lalahi nai? nakai ni toe taha maka ki luga he taha maka, ka e oti kana he fuluhi ki lalo.
3 Kua nofo a ia he mouga ko Olive, kua fehagai tonu mo e faituga, kua hūhu fakatekiteki ai kia ia a Peteru, mo Iakopo, mo Ioane, mo Aneterea.
4 Kia talahau mai a kia mautolu po ke eke a fe e tau mena ia? Po ke heigoa foki e fakamailoga ka tata e vaha ka hoko ai e tau mena oti ia?
5 Ti tala age a Iesu kia lautolu, kua pehe age, A mutolu, neke fakahehe e taha a mutolu,
6 Ha ko e mena tokologa a lautolu ke o mai ke he haku a higoa, mo e pehe, Ko au ko ia; ti fakahehe e lautolu e tau tagata tokologa.
7 Ka logona e mutolu e tau tau mo e tau ogo tau, ua fakaatukehe a mutolu; ha ko e mena hohoko mai e tau mena ia ke lata ai, ka e nakala hoko ke he fakaotiaga.
8 Ha ko e mena laga e taha motu ke he taha motu, ko e taha kautu foki mo e taha kautu; to ha i ai e tau mafuike ke he taha mena mo e taha mena; to ha i ai foki e tau hoge mo e fakafualoto; ko e kamataaga ia he tau mena matematekelea.
9 A mutolu kia mutolu, ha ko e mena tuku atu a mutolu e lautolu ke he pulega, to fahi foki a mutolu ke he tau sunako ha lautolu; to tutu atu foki a mutolu ki mua he tau iki mo e tau patuiki ha ko au ni, ke eke mo talahaua kia lautolu.
10 To fakamatala fakamua foki e vagahau mitaki ke he tau motu oti kana ke lata ai.
11 Ka takitaki e lautolu a mutolu, mo e tuku atu ai, aua neke manatu tuai a mutolu, ke he ha mutolu a tau kupu ke tala atu ai, aua foki neke fatuakiloto fakamua; ka ko e mena ka foaki atu kia mutolu ke he magaho ia, ko ia ni ke tala atu ai e mutolu; ha ko e mena nakai ko mutolu ke tala atu ai, ka ko e Agaga Tapu.
12 To tuku atu foki e matakainaga hana matakainaga kia mate, pihia foki e matua tane ke he hana tama tane; to tutu atu foki e fanau ke he ha lalu tau matua, to kelipopo a lautolu.
13 To vihiatia foki a mutolu he tau tagata oti ha ko e haku a higoa; ka ko e tagata ke tumau ato hoko ke he fakahikuaga, to fakamoui na ia.
14 Ka kitia foki e mutolu e mena vihiatia ke moumou aki, ne talahaua e Tanielu ko e perofeta, kua tu ke he mena nakai lata, (ko e tagata ne totou ai kia manamanatu ki ai!) ko lautolu ha i Iutaia ke he vaha ia, kia fehola a lautolu ke he tau mouga;
15 Ko e tagata ha i luga he fale, aua neke hifo a ia ke he fale, aua foki neke hu a ia ke uta ai taha mena he fale hana.
16 Ko e tagata foki ha he kaina, aua neke liu atu a ia ke uta hana tapulu.
17 Oi fakaalofa foki ke he tau fifine fatu, mo e tau fifine fakahuhu tama ke he vaha ia!
18 Kia liogi foki a mutolu neke fehola a mutolu ke he tau makalili.
19 Ha ko e vaha ia, to ha ha i ai e matematekelea nakai fakatai tali mai he kamataaga he tau mena ne eke he Atua, kua hoko mai ke he vaha nai; ti nakai tuai pihia foki.
20 Aua e fakakuku he Iki e tau aho ia, po kua nakai fakamoui ha tagata; ka ko e tau tagata kua fifili, kua fifili ne ia, kua fakakuku ai e ia e tau aho ia.
21 Kaeke foki ke pehe mai taha kia mutolu ke he vaha ia, Kitiala, ko e Keriso hanai; kitiala, ha ko; aua neke talia e mutolu.
22 Ha ko e mena tutu mai e tau Keriso pikopiko mo e tau perofeta pikopiko ti eke e lautolu e tau fakamailoga mo e tau mana ke fakahehe aki e tau tagata ne fifili, kaeke ke maeke ai.
23 A mutolu; kitiala kua talahau fakamua atu e au kia mutolu e tau mena oti ia.
24 Ko e vaha ia foki ka mole e matematekelea na, ti fakapouli ai e la, nakai huhulu mai foki e mahani.
25 To mokulu mai foki e tau fetu he lagi, to talue foki e tau kau he lagi.
26 Ati kitia atu ai e lautolu e Tama he tagata kua hau he tau aolagi, mo e malolo lahi mo e lilifu.
27 Ti fakafano atu ai e ia hana tau agelu, ke fakapotopoto e lautolu hana tau tagata ne fifili, mai he tau matamatagi ne fa; ke kamata he potu he lalolagi, ati hoko atu ke he patu lagi,
28 Kia manamanatu a mutolu ke he taha fakatai he mati, ka fakatoka tupu hake e tatupu, mo e matalatala mai e tau lau, ati iloa ai e mutolu kua tata mai e tau mafana.
29 Pihia foki na mutolu, ka kitia e tau mena ia kua tutupu mai, ti iloa ai e mutolu kua tata mai tuai, ha he tau gutuhala.
30 Ko e moli ke tala atu e au kia mutolu, nakai mole atu e hau nai, ato hohoko mai e tau mena oti ia.
31 To mole atu e lagi mo e lalolagi; ka ko e tau kupu haku, nakai mole atu ia.
32 Ka ko e aho ia, mo e magaaho ia nakai iloa e taha, po ke tau agelu he lagi, po ke Tama, ka ko e Matua ni hokoia.
33 A mutolu, kia mataala a a mutolu, mo e liogi, ha ko e mena nakai iloa e mutolu po ke hoko mai a fe e aho ia.
34 Tuga ne tagata ka fano ke he fenoga ke he motu kehe, kua toka e ia hana fale, ti age e pule ke he tau fekafekau hana, takitokotaha foki mo e hana gahua, ti tala age ke he leoleo gutuhala kia mataala a ia.
35 Hanai, kia mataala a mutolu; ha kua nakai iloa e mutolu po ke hau a fe e Iki he fale, po ke magaaho afiafi, po ke magaaho tulotopo, po ke magaaho ke ko ai e tau moa, po ke magaaho pogipogi;
36 Neke hau fakalutukia a ia, ti moua a mutolu ha ne momohe.
37 Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.