Mareko 14:1-72
14 KUA mole ua e aho, ti hoko ai ke he paseka, mo e galue he areto nakai fakaea; ti kumi ai e tau ekepoa ne mua mo e tau tohikupu, po ke eke fefe ha lautolu a fakavai ke tapaki ai a ia, mo e tamate a ia.
2 Ka e pehe a lautolu, Aua ia mo e galue, neke fakalagalaga ai e tau tagata.
3 Kua nofo a ia i Petania ke he fale a Simona ko e lepela, ha ne takoto he kaiaga mena, ti hau ai e fifine mo e lupo alapasa, ha i ai e lolo nato mitaki fakafua uka; kua fela e lupo ti liligi ai e ia ki luga he hana fufuga.
4 Ha i ai falu kua hogohogomanava ai a lautolu, kua pehe age a lautolu, Kua moumou he ha e lolo manogi?
5 Kane mai ne fakafua, po kua moua ai e tau tenari tolu e teau mo e tumā, ke age ke he tau tagata nonofogati; ti loma ai a lautolu ke he fifine.
6 Ka e pehe age a Iesu, Toka ai a ia; kua fakalavelave mo ha e mutolu a ia? ko e mena mitaki ne eke e ia kia au nai.
7 Ha kua nonofo mau e tau tagata nonofogati ia mutolu, ko e tau aho oti ka loto ki ai a mutolu, kua maeke ia mutolu ke eke fakamitaki atu kia lautolu; ka ko au nai, nakai nofo mau au ia mutolu.
8 Kua eke e ia e mena ne maeke ia ia, kua fakatākai tuai e ia haku a tino, ko e tauteaga he haku a tukuaga.
9 Ko e moli ke tala atu e au kia mutolu, ko e tau mena oti kana ha he lalolagi ke fakamatala ai e vagahau mitaki nai, to talahau foki ki ai e mena nai kua eke e ia ke eke mo fakamanatuaga kia ia.
10 Ko Iuta Isakariota ko e taha he tokohogofulu ma ua, kua fano a ia ke he tau ekepoa ne mua, ke afo ai a ia kia lautolu.
11 Kua logona e lautolu, ti fiafia ai, mo e tala age e lautolu e tau tupe ke age kia ia; ti amaamanaki e ia ke moua taha magaaho ke maeke vave ai ke afo ai a ia.
12 Ko e aho fakamua he areto nakai fakaea ke taute ai e paseka, kua tala age ai hana tau tutaki kia ia, Po ke mena fe kua finagalo a koe ki ai, ke o a mautolu ke taute ai e paseka ke taumafa ai a koe?
13 Ti fakafano atu e ia e tokoua he hana tau tutaki, mo e tala age kia laua, Ati o a a mua ke he māga, to fakataupa ai a mutolu mo e taha tagata ha ne uta e vai kelekele kula, ti mumui atu a mua kia ia.
14 Ko e mena foki ke hu atu ai a ia, kia tala age ke he patu he fale ia, Kua puaki mai e akoako ko fe e poko ke momohe ai e tau fenoga, ke kai ai e mautolu e paseka, mo e haku a tau tutaki.
15 To fakakite age e ia kia mua e taha poko lahi tapa ki luga, kua oti he taute; kia tauteute ai e mua ma tautolu.
16 Ti o ai hana tau tutaki, kua hoko ke he māga ia, ti kitia atu ai tuga ne talahau e ia kia laua; ti tauteute ai e laua e paseka.
17 Kua hoko ke he mogoho afiafi, kua haele age ai a ia mo e tokohogofulu ma ua.
18 Kua tatakoto a lautolu mo e kai mena, ti tala age ai a Iesu kia lautolu, Ko e moli ke tala atu e au kia mutolu, to afo he taha ia mutolu au, ko ia ni kua kai fakalataha mo au.
19 Ti kamata ai ke momoko a lautolu, kua takitokotaha a lautolu mo e pehe age kia ia, Ko au kia? ti pehe taha, Ko au kia?
20 Ti tala age a ia kia lautolu, kua pehe age, Ko e taha he tokohogofulu ma ua, ko ia ha ne fufui fakalataha e tau lima ha maua ke he kumete.
21 Ko e fano ne fai e Tama he tagata tuga e mena ne tohia tuai kia ia; ka ko e tagata ka afo e Tama he tagata oi te fakaalofa ke he tagata ia, mitaki kia ia ane nakai fanau mai a ia.
22 Ha ne kai mena a lautolu, ti toto ai e Iesu e areto, mo e fakaaue, ti tofitofi, mo e age ai kia lautolu, kua pehe age, Kia toto a, ti kai; ko e haku a tino a enei.
23 Kua toto foki e ia e kapiniu, mo e fakaaue; ti age ai kia lautolu, ti inu ai a lautolu oti kana.
24 Ne tala age foki a ia kia lautolu, Ko e haku e toto a enei, ko e toto he maveheaga fou, kua fakamaligi mo e tau tagata tokologa.
25 Ko e moli ke tala atu e au kia mutolu, nakai tuai inu au ke he fua vine, ato hoko ni ke he aho ia ke inu ai au ke he uaina fou ke he kautu he Atua.
26 Kua lologo e lautolu e tau lologo, ati o atu a lautolu ke he mouga ko Olive.
27 Kua tala age a Iesu kia lautolu, To tupetupe a mutolu oti ha ko au ke he po nai; ha kua tohi, To ta e au e leveki mamoe, ti mavehevehe ai e tau mamoe.
28 Ka mole haku a liu foki tu mai, ti mua atu au kia mutolu ki Kalilaia.
29 Ka e tala age a Peteru kia ia, Kaeke ke tupetupe e tau tagata oti, ka e nakai pihia au.
30 Ti tala age ai a Iesu kia ia, Ko e moli ke tala atu e au kia koe, ke he aho nai, ke he po nai ni, nakaila ko lagaua e tau moa, to fakatikai lagatolu mai a koe kia au.
31 Ka e au atu ai he talahau e ia, Pete ni he mamate fakalataha a taua mo koe, ka e nakai fakatikai au kia koe. Kua talahau pihia foki a lautolu oti.
32 Kua hoko atu a lautolu ke he taha fonua ko Ketesemane e higoa, ti tala age a ia ke he hana tau tutaki, Kia nonofo a mutolu i hinai, ka e liogi au.
33 Ti uta e ia fakalataha mo ia a Peteru, mo Iakopo, mo Ioane, ti kamata ai ke hopo e ate hana mo e mānu lahi.
34 Ti tala age ai a ia kia lautolu, Kua mamahi lahi haku a loto, ke hoko ke he mate; kia nonofo a a mutolu he mena nai mo e mataala.
35 Kua tolotolomaki atu a ia ki mua, ti fakaveli a ia ke he kelekele, mo e liogi atu, kia mole atu ia ia e na magaaho ia kia ia, kaeke kua maeke ai.
36 Kua pehe atu, Ava, ma Matua na e, mena maeke ia koe e tau mena oti kana; kia uta kehe a e kapiniu nai ia au; ka e aua neke eke hoku loto, ka ko e hāu a finagalo.
37 Kua haele age a ia, kua moua a lautolu ha ne momohe; ti tala age a ia kia Peteru, Simona na e, kua mohe kia a koe? Ai kia fahia a koe ke mataala ke he taha magapo?
38 Kia mataala a, mo e liogi, neke hoko mai e kamatamata kia mutolu; kua makai ni e loto, ka ko e tino kua lolelole.
39 Kua liu atu a ia, kua liogi atu, kua tala atu e kupu agaia.
40 Kua liu mai foki a ia, kua moua a lautolu ha ne momohe foki, ha kua mao ha lautolu a tau fifimata; nakai iloa foki e lautolu po ke tala age ha ha e lautolu kia ia.
41 Kua liu mai foki a ia kia lautolu, ko e lagatolu ia, ti pehe age a ia kia lautolu, Ati momohe leva a, mo e okioki; toka ai; kua hoko mai e magapo; kitiala, kua tuku atu ai e Tama he tagata ke he tau lima he tau tagata hala.
42 Ati matike a, ke o a tautolu. Kitiala, kua tata mai tuai a ia ke afo au.
43 Ha ne vagahau a ia, ka e hau agataha a Iuta, ko e taha he tokohogofulu ma ua, kua fakalataha mai foki mo ia e moto tagata tokologa, ne o mai he tau ekepoa ne mua, mo e tau tohikupu, mo e tau patu, ha ha ia lautolu e tau pelu mo e tau akau.
44 Kua tuku atu he tagata ne afo a ia e fakamailoga kia lautolu, kua pehe atu, Ko ia ka fakafigita e au ko ia haia; kia tapaki e mutolu a ia, mo e takitaki fakamalolo atu e mutolu a ia.
45 Kua hoko mai a ia, ti hau leva agataha a ia kia ia, kua pehe age, Rapai na e, Rapai na e, ti figita e ia a ia.
46 Ati hoko age ai ha lautolu a tau lima kia ia, mo e tapaki e lautolu a ia.
47 Ko e taha ia lautolu ne tutu ai, kua aki e pelu, ti ta ai e ia e fekafekau he ekepoa ne mua, kua motupu ai hana teliga.
48 Ti tala age ai a Iesu kia lautolu, kua pehe atu Kua o mai kia a mutolu mo e tau pelu, mo e tau akau ke tapaki au, tuga ne fofo mena au?
49 Ne nofo mau au mo mutolu ke he tau aho he fakaako atu e au ke he faituga, ka e nakai tapaki ai e mutolu au; ka e fakamoli ai e tau Tohi.
50 Ati tiaki ai e lautolu oti a ia, ka e fehola.
51 Kua mui atu kia ia e taha fuata, kua tapulu hana tino ke he ie lino; kua tapaki foki he tau fuata a ia.
52 Ka e tiaki e ia e ie lino, kua hola atu ai ia lautolu mo e nakai fai felevehi.
53 Ti takitaki e lautolu a Iesu ke he ekepoa ne mua, ha ne fakapotopoto oti ai foki kia ia e tau ekepoa ne mua, mo e tau patu, mo e tau tohikupu.
54 Kua mui mamao atu foki a Peteru kia ia, kua hoko ni ke he fale he ekepoa ne mua; ti nofo ai fakalataha mo e tau fekafekau, kua mumu ai ke he afi.
55 Ka ko e tau ekepoa ne mua, mo e fakapotopotoaga auloa, kua kumi e lautolu e tau tagata talahau mena kia Iesu kia kelipopo ai a ia; ka e nakai moua.
56 Ha kua tokologa a lautolu ne fatipiko kia ia; ka e nakai fakalataha ha lautolu a talahau.
57 Ati tutu ai falu mo e fatipiko kia ia, kua pehe age,
58 Ne fanogonogo atu a maua kia ia, ne pehe mai, To ulu e au e faituga nai ne eke he tau lima, ti ta foki e au taha ke he aho tolu, nakai eke he tau lima.
59 Kua nakai fakalataha foki ha laua a talahau ke he mena ia.
60 Ti tu ai e ekepoa ne mua ki mua, mo e hūhu atu kia Iesu, kua pehe atu, Nakai lea mai a koe he ha? Ko heigoa e talahau he tau tagata nai kia koe?
61 Ka e fakanono a ia, ti nakai fakai ke lea a ia. Ti liu foki hūhu kia ia e ekepoa ne mua, kua pehe mai kia ia, Ko koe kia ko e Keriso, ko e Tama hana kua fakaheke ki ai?
62 Ti pehe age a Iesu, Ko au haia; ti kitia e mutolu e Tama he tagata ha ne nofo ke he fahi matau hana ha i ai e mana, to hau foki a ia ke he tau aolagi.
63 Ati hēhē ai he ekepoa ne mua hana tau tapulu, kua pehe age, To aoga ha ha kia tautolu e falu a tagata talahau mena?
64 Kua logona ni e mutolu e vagahau kelea ke he Atua. Kua manatu ke ha a mutolu? Ka e talahau e lautolu oti, kua lata ke mate a ia.
65 Ti kamata ai e falu ke tauanu kia ia, mo e ufiufi ai hana tau fofoga, ti taumoto kia ia, mo e pehe age ki ai, Ati talahau la. Ko e tau fekafekau foki ne tapoki atu e lautolu a ia.
66 Ha ha i lalo a Peteru ke he fale; kua fina age e taha fekafekau tamafine he ekepoa ne mua;
67 Kua kitia e ia a Peteru ha ne mumu ke he afi, kua kikite atu foki a ia kia ia, mo e pehe, Ko koe foki ne fakalataha a mua mo Iesu ko e Nasareta.
68 Ka ko ia kua fakatikai, kua pehe, Nakai kitia e au a ia, ti nakai logona foki e au e mena ne talahau mai e koe. Ti fano a ia ki fafo ke he fakamaluaga he gutufale, ti ko ai e moa.
69 Kua kitia foki a ia he taha fekafekau tamafine, kua kamata a ia ke tala age kia lautolu ne tutu mai, Ko e taha ha lautolu a ena. Ti liu foki fakatikai ai a ia.
70 Kua levaleva, ti tala age ai e tau tagata ne tutu ai kia Peteru, Ko e moli, ko e taha ia lautolu a koe; ha ko e Kalilaia a koe, kua vagahau pihia a koe.
71 Ati kamata ai ke kaialu a ia, mo e omonuo, Nakai kitia e au e tagata na kua talahau mai e mutolu.
72 Ati ko lagaua ai e moa; ti manatu hifo ai a Peteru ke he kupu ne tala age e Iesu kia ia, Nakai ko lagaua e tau moa ato fakatikai lagatolu mai a koe kia au. Kua manamanatu hifo a ia ki ai, ti tagi ai a ia.