Mareko 16:1-20
16 KUA mole e aho sapati, ti fakafua ai e Maria ko e Makatala, mo Maria e matua fifine a Iakopo, mo Salome, e tau mena manogi, kia o atu ai a lautolu ke fakatākai aki a ia.
2 Ko e magaaho pogipogi he aho fakamua he fahi tapu, ne o atu ai a lautolu ke he tukuaga ke he magaaho ne hake ai e la.
3 Kua fevagavagahauaki foki a lautolu, kua pehe, To fuluhi kehe e hai e maka ma tautolu he gutu he tukuaga?
4 Kua kitekite atu a lautolu, ti kitia ai, kua fuluhi kehe tuai e maka; ha kua lahi mahaki ni.
5 Kua huhu atu a lautolu ke he tukuaga, ati kitia ai e lautolu e fuata ha ne nofo ke he fahi matau, kua tapulu ke he tapulu hinavake mo e loa; ti matakutaku ai na lautolu.
6 Ka e tala age a ia kia lautolu, Ua matakutaku a mutolu; kua kumi e mutolu a Iesu ko e Nasareta ne fakasatauro; kua tu mai tuai a ia, nakai nofo i hinei; ati kitekite a ke he mena ne tuku ai e lautolu a ia.
7 Ka e o a mutolu ti tala age ke he tau tutaki hana, katoa mo Peteru, kua mua atu a ia kia mutolu ki Kalilaia; to kitia ai e mutolu a ia, tuga ne talahau e ia kia mutolu.
8 Ti o fakatepetepe a lautolu ki fafo, kua fehola kehe he tukuaga; kua moua foki a lautolu he vivivivi, mo e hopo ate; kua nakai tala age foki a lautolu ha kupu kia taha, he matakutaku.
9 Kua tu mai a Iesu he he magaaho pogipogi he aho fakamua he fahi tapu ti kua fakakite fakamua a ia kia Maria ko e Makatala, ko ia ne vega ai e ia e tau temoni ne tokofitu.
10 Kua fano a ia, mo e tala age kia lautolu ne fa fakalataha mo ia, ha ha ne fakatutuku a lautolu mo e tagi.
11 Kua logona e lautolu ni e ogo kua moui a ia, mo e kitia e ia a ia; ka e nakai ni talia e lautolu.
12 Kua mole e tau mena ia, kua fakakite a ia, kua kehe tuai hana a tino ke he tokoua ha lautolu, ha ne o a laua ke he kaina.
13 Ti o ai a laua mo e tala age kia lautolu ne toe; ka e nakai ni talia e lautolu a laua.
14 Kua fakakite fakamui a ia ke he tokohogofulu ma taha kua tatakoto a lautolu ke kai mena; ati akonaki atu ai a ia kia lautolu he nakai talia e lautolu, to loto mao, ha kua nakai talia e lautolu e ogo ha lautolu ne kitia a ia kua liu foki tu mai.
15 Kua tala age foki a ia kia lautolu, O atu a a mutolu ke he lalolagi oti, ti fakamatala atu ai e vagahau mitaki ke he tau tagata oti kana.
16 Ko ia ne tua mo e papatiso, to fakamoui a ia; ka ko e tagata nakai tua, to fakahala a ia.
17 To mumui atu foki e tau fakamailoga nai ke he tau tagata ne tua; to vega e lautolu e tau temoni ke he haku a higoa; to vagahau a lautolu ke he tau vagahau fou;
18 To toto e lautolu e tau gata; kaeke foki ke inu e lautolu taha mena ke mamate ai, nakai haofia ai a lautolu; to fakalago foki ha lautolu a tau lima ke he tau tagata gagao, mo e fakamalolo a lautolu.
19 Kua mole atu foki e vagahau he Iki kia lautolu, ti ta hake ai a ia ke he lagi, ti kua nofo ai a ia ke he fahi matau he Atua.
20 Ati o atu ai a lautolu, mo e fakamatala atu ke he tau mena oti; kua gahua fakalataha foki e Iki mo lautolu, ti fakamoli e kupu ke he tau fakamailoga ne mumui atu ai. Amene.