Mareko 3:1-35
3 KUA liu foki hu atu a ia ke he sunako, ne nofo ai foki e tagata kua mate hana a lima.
2 Ti takahao a lautolu kia ia, po ke ne fakamalolo nakai e ia ke he sapati, kia hokotaki ai e lautolu a ia.
3 Kua tala age a ia ke he tagata lima mate, Ati tu mai a ke he vaha loto.
4 Kua tala age a ia kia lautolu, Kua lata nakai mo e sapati e mahani mitaki, po ke mahani kelea; ke fakamoui, po ke tamate? Ka e fakanonono a lautolu.
5 Kua kitekite fano a ia kia lautolu mo e ita, kua hukia hana a finagalo ha kua mao ha lautolu a tau loto, ti tala age a ia ke he tagata, Ati fakaolo a hau a lima. Ti fakaolo ai e ia, ati mitaki ai hana a lima, kua tuga ne taha.
6 Kua o e tau farasaio ki fafo ti pulega ai agataha a lautolu mo e tau Herotiano kia ia, kia kelipopo e lautolu a ia.
7 Ka ko Iesu kua haele atu a ia mo e hana tau tutaki ke he vai; kua mumui atu foki e tau tagata tokologa kia ia mai Kalilaia, mo Iutaia,
8 Mo Ierusalema, katoa mo Itumaia, mo e fahi atu a Ioritana, katoa mo lautolu mai he fahi ko Turo mo Saitonu, kua tokologa foki a lautolu ne o age kia ia, he iloa e lautolu e tau mena ne eke e ia.
9 Kua tala age foki a ia ke he tau tutaki hana kia tatali mai ai e foulua tote kia ia; ha ko e moto tagata, neke tautaomi mai a lautolu kia ia.
10 Ha kua tokologa a lautolu ne fakamalolo e ia, ko e mena ia ne tautaomi mai ai kia ia a lautolu ne moua he tau kafo mamahi kia piki atu a lautolu kia ia.
11 Ko e tau agaga kelea foki kua kitia e lautolu a ia, ti fakaveveli a lautolu ki mua hana, mo e tauui, pehe, Ko koe ni ko e Tama he Atua.
12 Ka e hataki fakalahi atu e ia a lautolu, neke fakakite atu e lautolu a ia.
13 Kua haele hake a ia ke he mouga, kua ui atu a ia kia lautolu kua finagalo a ia ki ai; ti o mai ai a lautolu kia ia.
14 Ti kotofa ai e ia e tokohogofulu ma ua ke fakalataha a lautolu mo ia, kia fakafano atu e ia a lautolu ke fakamatala atu e vagahau mitaki,
15 Kia toka ai foki ia lautolu e pule ke fakamalolo ai e tau tagata gagao, mo e vega ai e tau temoni.
16 Kua fakahigoa e ia a Simona, ko Peteru,
17 Mo Iakopo ko e tama a Sepetaio, mo Ioane e matakainaga ha Iakopo, kua fakahigoa foki e ia a laua, ko Poaneki, ko e hana kakano, ko e na tagata pakulagi,
18 Mo Aneterea, mo Filipo, mo Patolomaio, mo Mataio, mo Toma, mo Iakopo ko e tama a Alefaio, mo Tataio, mo Simona ko e Kanana,
19 Mo Iuta Isakariota, ko ia foki ne afo a ia.
20 Kua o atu a lautolu ke he fale; ti liliu foki fakapotopoto mai ai e moto tagata, ti nakai tuai maeke ke kai mena a lautolu.
21 Kua logona ai hana magafaoa, ti o atu ai a lautolu ke tapaki a ia, ha kua pehe a lautolu, Kua vikoia a ia.
22 Ka ko e tau tohikupu ne o hifo mai Ierusalema, kua pehe a lautolu, Ha ha ia ia a Pelesepulo, ko e iki foki he tau temoni kua vega ai e ia e tau temoni.
23 Ti ui atu a ia kia lautolu, mo e tala age kia lautolu ke he tau kupu fakatai, Ke maeke fefe ia Satani ke vega e ia a Satani?
24 Kaeke foki ke feveheveheaki e kautu, ti nakai maeke ke tumau e kautu ia.
25 Kaeke foki ke feveheaki e magafaoa, ti nakai maeke ke tumau e magafaoa ia.
26 Ko Satani foki, kaeke kua totoko atu e ia kia ia ni, mo e feveheveheaki a ia, ti nakai maeke ke tumau a ia, ka kua hoko tuai ke he hana fakatulakiaga.
27 Nakai fakai ke maeke ia taha ke hu atu ke he fale he tagata toa, mo e fofo hana tau mena, ato lili fakamua e tagata toa ti fofo ai hana tau mena he fale.
28 Ko e moli ke tala atu e au kia mutolu, to fakamagalo e tau hala oti he tau tagata, katoa mo e tau kupu kelea oti ne vagahau kelea ai a lautolu;
29 Ka ko e tagata ne vagahau kelea ke he Agaga Tapu, nakai fakai ke moua e ia e fakamagaloaga tukulagi; ka e lata ni kia ia e fakahala tukulagi.
30 Na pihia age a ia, ha kua pehe a lautolu, Ha ha ia ia e agaga kelea.
31 Ti o mai ai hana tau matakainaga, mo e matua fifine hana, kua tutu i fafo, mo e fekau, atu kia ia, mo e tauui atu kia ia.
32 Ne nonofo takai ai e tau tagata kia ia ti pehe a lautolu kia ia, Kitiala, ho matua fifine, mo e tau matakainaga hau i fafo, ha ne kumi kia koe.
33 Ti tala age a ia kia lautolu, kua pehe age, Ko hai kia haku a matua fifine? ko hai foki haku a tau matakainaga?
34 Kua kitekite fano ai a ia ke he tau tagata ne agaagai mai kia ia, ti pehe age, Kitiala, ko e matua fifine haku, mo e tau matakainaga haku,
35 Ha ko e tagata kua eke e finagalo he Atua, ko e haku a matakainaga a ia, mo e haku a mahakitaga, mo e haku a matua fifine.