Mareko 4:1-41
4 KUA kamata foki e ia ke fakaako atu ha ha he tapa vai, kua fakapotopoto mai e moto tagata tokologa kia ia; ti haele hake a ia ke he foulua ha he vai mo e nofo ai, ha i ai foki e moto tagata oti ke he tapa vai.
2 Ti kua loga e tau mena ne fakaako ai e ia kia lautolu ke he tau kupu fakatai, kua pehe foki a ia he hana fakaako atu,
3 Kia fanogonogo mai a a mutolu, kitiala, ko e tagata gana saito, ne fina atu ke gana saito.
4 Ha ha ne gana ai, kua mokulu falu ke he kauhala, ti o mai ai e tau manu lele, mo e kai ai.
5 Ti mokulu falu ke he mena patu, kua tote ni e kelekele ha i ai; ti tupu vave ai he tote ni e kelekele ne tokai.
6 Kua hake e la, ti vela ai, ti kua fifigo ni, he nakai fai vaka.
7 Kua mokulu foki falu ke he vao talatala, kua tuputupu hake e vao talatala, ati apitia ai, ti nakai fua mai.
8 Ti mokulu falu ke he kelekele mitaki, kua tupu hake, mo e tuputupu loga ai, kua fua mai takitolugofulu e tau fua he falu, takiono e hogofulu he falu, takitaha teau he falu.
9 Kua tala age foki a ia kia lautolu, Ko e tagata ne fai teliga ke fanogonogo aki, ati fanogonogo mai a a ia.
10 Kua tokotaha a ia, ti huhu age ai kia ia e tau tagata ne fakalataha mo ia katoa mo e tokohogofulu ma ua ke he fakatai.
11 Ti tala age a ia kia lautolu, Kua foaki atu kia mutolu ke iloa ai e mutolu e tau mena galo he kautu he Atua; ka ko lautolu ha i tua, kua tala age e tau mena oti kia lautolu ke he tau fakatai;
12 Kia kitekite a lautolu mo e kitia, ka e nakai iloa; kia fanogonogo foki a lautolu mo e logona, ka e nakai maama; neke mafokifoki mai a lautolu, mo e fakamagalo ai e tau hala ha lautolu.
13 Kua tala age foki a ia kia lautolu, Nakai kia iloa e mutolu e fakatai nai? Po ke iloa fefe e mutolu e tau fakatai oti?
14 Ko e tagata gana saito, kua gana e ia e kupu.
15 Ko lautolu hanai ha he kauhala ne gana ai e kupu; ka fanogonogo a lautolu, ti fina age ai agataha a Satani, mo e uta kehe ai e kupu ne gana ke he tau loto ha lautolu.
16 Pihia foki a lautolu ne gana ke he mena patu, ko lautolu haia ne fanogonogo ke he kupu, ti talia ai agataha mo e fiafia;
17 Ka e nakai fai vaka a lautolu, ti nakai leva ha lautolu a tumau; ka tupu e matematekelea, po ke favale ha ko e kupu, ti tupetupe ai agataha a lautolu.
18 Ko lautolu foki hanai ne gana ai ke he vao talatala, ko lautolu haia ne fanogonogo ke he kupu,
19 Ka ko e fakaatukehe ke he tau mena he lalolagi nai, mo e fakavai he koloa, mo e manako lahi ke he falu a mena, kua hu atu ke he loto, ti apitia ai e kupu, ti nakai fua mai ai.
20 Ko lautolu hanai ne gana ai ke he kelekele mitaki, ko lautolu haia ne fanogonogo ke he kupu mo e talia, ti fua mai ai takitolugofulu e falu, ka e takionogofolu e falu ka e takiteau e falu.
21 Ne tala age foki a ia kia lautolu, Ke ta mai kia e lamepa kia tuku atu ai ki lalo he kumete, po ko lalo he mohega? Ka e nakai kia fakatu a ia ki luga he tokaaga lamepa?
22 Ha kua nakai fai mena galo ke nakai fakakite; ti nakai fai mena ne fufu, ka e hoko he fakapuloa ni.
23 Ko ia ne fai teliga ke fanogonogo aki, ati fanogonogo mai a a ia.
24 Ne tala age foki e ia kia lautolu, A mutolu kia mutolu ke he mena ne fanogonogo ai; ko e fafati ka fafati atu ai e mutolu, to fafati mai ai kia mutolu; ko mutolu ne fanogonogo, to lafi age kia mutolu.
25 Ha ko ia kua fai mena to age mena kia ia; ka ko ia nakai fai mena, to uta kehe ia ia e mena kua moua.
26 Kua tala age foki e ia, Ko e kautu he Atua, tuga ne tagata ia ne gana e tau fua saito ke he kelekele.
27 Kua mohe foki a ia he po, mo e ala hake he aho; kua gotogoto hake e tau fua saito, mo e tuputupu, ka e nakai kitia e ia po ke eke fefe.
28 Ha kua tupu noa ia he kelekele, kua fai lau fakamua, ti fai huki ni, ka e fakamui e tau fua saito motua.
29 Ka motua e tau fua saito, ti helehele ai agataha, ha kua hoko ke he vaha ke helehele ai.
30 Kua tala age foki a ia, Ko e heigoa e mena ke fakalata ki ai e kautu he Atua, ko e heigoa foki e fakatai ke fakatai e tautolu ki ai?
31 Tuga ne taha fua sinapi a ia, ka to ke he kelekele, kua mua he tote ke he tau fua oti ne tupu mai he kelekele.
32 Ka to e fua, ti tupu hake ai, kua eke foki mo akau lahi, kua mua ke he tau akau mateafu oti, kua fai la lalahi foki ia, kua maeke ai e tau manu lele ke momohe ai ki lalo hana a malu.
33 Ko e tau fakatai pihia ne loga, ne talahau atu ai e ia e kupu kia lautolu, fakalata ke he mena kua maeke ia lautolu ke logona.
34 Ti nakai vagahau atu a ia kia lautolu ka noa mo e fakatai; ka e fakamatala e ia e kakano he tau mena oti ke he tau tutaki hana ki tua.
35 Ko e aho ia, kua hoko ke he magaaho afiafi, ti tala age a ia kia lautolu, Ati o atu a a tautolu ke he fahi atu.
36 Kua toka e lautolu e moto tagata, ha he foulua a ia ti uta ai pihia e lautolu a ia; ne fakalataha foki mo ia e falu a foulua ikiiki.
37 Ati to ai e afa, ko e matagi lahi na ti kehe, kua fafati mai e tau peau ke he foulua, ti puke ai ni,
38 Ka ko ia ha he muimui vaka, ha ne mohe ke he uluga; ti fafagu e lautolu a ia, mo e pehe age ki ai, Ko e Akoako na e, nakai kia manatu mai a koe kia tautolu ko e mahakava ha ne fai?
39 Kua matike tuai a ia ti hataki atu e ia e matagi, mo e pehe age ke he vai, Fakamate a kia milino a; ti mate ai e matagi kua milino lahi tuai.
40 Ti pehe age a ia kia lautolu, Ko e ha ne matakutaku ai pihia a mutolu? Ko e ha nakai tua ai a mutolu.
41 Ti matakutaku lahi ni a lautolu, mo e fevagahauaki a lautolu, Ka ko hai kia e tagata nai, ne fanogonogo ai e matagi mo e vai kia ia?