Mareko 5:1-43
5 TI o atu a lautolu ke he fahi atu he vai, ke he kelekele a Katara.
2 Kua haele atu a ia he foulua, ti feleveia ai agataha mo ia e taha tagata mai he tau tukuaga, ha ia ia e temoni kelea;
3 Ne nofo mau a ia ke he tau tukuaga, nakai fakai ke maeke ia taha ke lili a ia ke he tau toua lapatoa.
4 Ha kua lagaloga he lili a ia ke he tau mena ke fakave aki e tau hui, katoa foki mo e tau toua lapatoa; ti motumotu e ia e tau toua lapatoa, mo e tuki malipilipi e tau mena ne fakave aki e tau hui; nakai maeke foki ia taha ke fakaako a ia ke totonu.
5 Ne nofo mau a ia ke he tau mouga, mo e tau tukuaga ke he po mo e aho, kua fakatutu, mo e helehele hana kakano ke he tau maka.
6 Kua kitia e ia a Iesu ke he mena mamao, ati poi mai a ia, mo e hufeilo kia ia;
7 Kua ui atu foki a ia fakaleo lahi, kua pehe atu, Ko e heigoa kia hāu kia au nai, Iesu na e, ko e Tama he Atua tokoluga ue atu? kua tala atu fakamakamaka e au kia koe ke he higoa he Atua, aua neke fakamamahi mai e koe au.
8 Ha ko e mena tala age a ia kia ia, Hau a ki fafo he tagata, ko koe ni ko e agaga kelea.
9 Ti huhu age a ia kia ia, Ko hai ha higoa? Ti tala mai a ia, kua pehe mai, Ko Lekeono haku a higoa, ko e mena tokologa a mautolu.
10 Ti olelalo fakalahi a ia kia ia, ua vega kehe e ia a lautolu he motu ia.
11 Ha i ai foki e fuifui puaka loga, ha ne totolo tata age ke he mouga.
12 Kua olelalo atu foki e tau temoni oti kia ia, kua pehe atu, Ati fekau atu a e koe a mautolu ke he tau puaka ke heke ai e mautolu.
13 Ti tuku age ai agataha e Iesu; kua o age ki fafo e tau agaga kelea, ti heke e lautolu e tau puaka; ti hohopo hifo ai e fuifui he mena papati ke he vai, tokai ko e ua ni e afe, ti tomo ni ke he vai.
14 Ti fehola e tau tagata ne fagai e tau puaka, kua ogo atu ai ke he māga mo e tau kaina; ti o atu e faoa ke kitekite ke he mena kua eke.
15 Kua o mai foki a lautolu kia Iesu, ti kitekite a lautolu kia ia ne heketia he tau temoni, ha ne nofo mai, kua matala tuai e loto, kua tapulu foki, ko ia haia ne nonofo ai e Lekeono; ti matakutaku ai a lautolu.
16 Ko lautolu ne kitia atu, ne talatala e lautolu kia lautolu e kakano he mena ne eke ke he tagata ne heketia katoa mo e tau puaka.
17 Ti kamata ai a lautolu ke olelalo atu kia ia, kia fano kehe a ia mo e motu ha lautolu.
18 Kua hake a ia ke he foulua, ti olelalo atu kia ia e tagata ne heke he tau temoni kia fakalataha a laua mo ia.
19 Ka ko Iesu kua nakai maeke, ka e tala age kia ia, Fano a a koe ke he hau a fale, mo e hau a faoa, ti fakamatala e koe kia lautolu e tau mena loga kua eke he Iki kia koe, mo e hana fakaalofa kia koe.
20 Kua fano a ia ti kamata ai ke fakamatala atu i Tekapoli e tau mena loga ne eke e Iesu kia ia; ti ofomate ai e tau tagata oti.
21 Kua liu atu tuai a Iesu he foulua ke he taha fahi; ti fakapotopoto mai e moto tagata tokologa kia ia, kua tata age a ia ke he vai.
22 Kitiala, kua hau e taha a lautolu ne pule ke he sunako, ko Iairo hana higoa, kua kitia e ia a ia, ati fakaveli ai a ia ke he tau ve hana;
23 Kua ole fakalahi atu a ia kia ia, kua pehe atu, Ko e mate ha ne fai haku a tama fifine tote, kia haele age a koe, mo e fakalago hau a tau lima ki luga ia ia ke malolo ai, ti moui ai a ia.
24 Kua fakatau o atu ai a laua mo ia; ti mumui atu kia ia e moto tagata tokologa, mo e tautaomi ni a lautolu kia ia.
25 Ko e taha fifine foki kua gagao he fakatafea, kua katoa e hogofulu ma ua e tau.
26 Ne loga foki e tau mena ne fakauka ai a ia ke he tau ekekafo ne tokologa; kua oti foki hana tau koloa he uta kia lautolu, ka e nakai aoga taha mena kia ia, ka kua au atu ai hana kafo;
27 Kua logona e ia e tala kia Iesu, ti hau a ia hala tua ki loto he moto tagata, kua piki age ke he hana tapulu;
28 Ha kua pehe a ia, Kaeke ke piki atu au ke he hana tapulu hokoia, ti malolo ai au.
29 Ti maulu ai agataha hana fakatafea; ti iloa e ia ke he hana tino kua malolo tuai a ia he kafo mamahi hana.
30 Ti fioia ai agataha e Iesu ki loto ia ia, kua fina atu ia ia e mana, ti tafilu atu a ia ke he moto tagata, mo e pehe atu, Ko hai ne fakapiki mai ke he haku tau tapulu?
31 Ti tala age hana tau tutaki kia ia, Kua fioia e koe e moto tagata, ha ne tautaomi kia koe, ti pehe mai kia a koe, Ko hai ne fakapiki mai kia au?
32 Kua kitekite fano foki a ia kia kitia e ia e tagata ne eke e mena ia.
33 Ka ko e fifine, kua matakutaku mo e vivivivi, kua iloa e ia e mena ne eke kia ia, ti hau a ia, mo e fakaveli ki mua hana, ti tala age fakatonu kia ia e tau mena oti.
34 Ka e pehe age a ia kia ia, Haku tama fifine na e, kua moui a koe he hau a tua; ti fano a, mo e monuina, kia malolo a koe he hau a kafo mamahi.
35 Ha ne vagahau agaia a ia, ti hohoko mai falu mai he fale he pule he sunako, kua pehe mai, Kua mate tuai hau a tama fifine; ke fakalavelave foki a koe he ha ke he akoako?
36 Ka ko Iesu, kua logona e ia e ogo kua talahaua mai, ti tala age ai agataha a ia ke he pule he sunako, Ua matakutaku a koe, ka e tua hokoia.
37 Nakai maeke e ia ke mui atu ha tagata kia ia ka ko Peteru ni, mo Iakopo, mo Ioane e matakainaga ha Iakopo.
38 Kua hoko ke he fale he pule he sunako, ti fioia ai e ia e gaualoa, mo e tagi hake, mo e tau tagata ne tagi tautau fakalahi.
39 Kua hu atu a ia ti pehe atu a ia kia lautolu, Ko e heigoa e mena kua gaualoa ai a mutolu, mo e tagi hake ai a mutolu? Nakai mate e tama fifine ka e mohe ni.
40 Ti feki ai a lautolu kia ia. Ka e vega e ia a lautolu oti ki fafo, ti uta e ia e matua tane he tama fifine, katoa mo e matua fifine mo lautolu ne o mai mo ia, ti huhu atu ke he mena ne takoto ai e tama fifine.
41 Ti toto e ia e lima he tama fifine, mo e pehe age kia ia, Talita koumi, (ko e kakano hanai, Ko e tama fifine na e, kua tala atu e au kia koe, kia matike a.)
42 Ti matike ai agataha e tama fifine, mo e fano; ko e mena hogofulu ma ua hana tau tau; ti hohopo ai ha lautolu a tau ate.
43 Ti hataki fakalahi e ia a lautolu, neke iloa e taha e mena ia; ti tala age e ia, ke age kia ia taha mena ke ana kai.