Mareko 6:1-56
6 KUA toka e ia e mena ia, ti fano ni ke he motu hana; ne mumui age foki hana tau tutaki kia ia.
2 Kua hoko ke he aho sapati, ti kamata ai a ia ke fakaako atu ke he sunako; tokologa foki ne fanogonogo ki ai kua ofomate a lautolu, kua pehe age, Moua mai fe he tagata nai e tau mena ia? ko e heigoa foki e pulotu nai kua tuku atu kia ia, kua eke ai he tau lima hana e tau mana lalahi pihia?
3 Ka e nakai kia ko e tagata tafale hanai, ko e tama a Maria, ko e matakainaga foki ha Iakopo, mo Iose, mo Iuta, mo Simona? Ti nakai kia ha hinai ia tautolu hana lafu mahakitaga? Ati tupetupe ai a lautolu kia ia.
4 Ka e tala age a Iesu kia lautolu, Nakai noa ha perofeta mo e lilifu, ka ko e hana māga ni mo e hana a faoa, mo e hana fale kua nakai lilifu ai.
5 Ti nakai maeke ia ia ke eke taha mana ke he mena ia, ka ko e tau tagata tokogahoa ne gagao, kua fakalago ai e ia hana a tau lima, mo e fakamalolo ai e ia.
6 Kua ofomate a ia he nakai tua a lautolu; kua takai foki e ia e tau magamotu, mo e fakaako atu.
7 Ti ui atu a ia ke he tokohogofulu ma ua, mo e kamata ke fakafano atu e ia a lautolu takitokoua; kua tuku atu foki e ia kia lautolu e pule ke he tau agaga kelea;
8 Ti tala age a ia kia lautolu, ua uta e lautolu ha mena mo e fenoga ha lautolu, ka ko e tokotoko hokoia; ua uta ha kato, ua uta ha mena kai, ua uta foki ha tupe he tau pipi ha lautolu;
9 Kia afi e tau aloalohui ha lautolu, ti aua neke takiua e tapulu ke tapulu ai.
10 Na tala age foki a ia kia lautolu, Ko e mena ke huhu atu ai a mutolu ke he fale, kia nonofo ai a mutolu ato o kehe a mutolu he mena ia.
11 Ko lautolu foki nakai talia a mutolu mo e nakai fanogonogo kia mutolu, ka o kehe a mutolu he mena ia, ti lulululu atu ai e mutolu e kelekele he tau hui ha mutolu ke eke mo talahau kia lautolu; ko e moli ke tala atu e au kia mutolu, to laukaauka a Sotoma mo Komora ke he aho fakafili, ke he māga ia.
12 Ti o atu a lautolu, mo e fakamatala atu kia tokihala e tau tagata.
13 Na tokologa foki e tau temoni ne vega e lautolu, tokologa foki e tau tagata gagao ne fakatakai e lautolu ke he magalolo, mo e fakamalolo ai.
14 Kua logona he patuiki ko Herota, (ko e mena fakapuloa hana higoa), ti pehe a ia, Kua tu mai a Ioane ko e Papatiso ia lautolu kua mamate, ti ko e mena ia kua eke ai e ia e tau mana.
15 Kua pehe falu, Ko Elia haia; ka e pehe falu, Ko e perofeta a ia, po ke tuga ne taha he tau perofeta.
16 Ka kua logona e Herota, ti pehe a ia, Ko Ioane haia ne hio e au hana ulu; kua tu mai tuai a ia ia lautolu kua mamate.
17 Mena fekau atu e Herota ke tapaki a Ioane, mo e lili a ia ke he fale puipui, ha ko Herotia, e hoana ha Filipo ko e matakainaga hana ha kua hoana tuai a ia kia ia.
18 Ha ko e mena tala age e Ioane kia Herota, Kua nakai lata ke eke e koe e hoana he matakainaga hāu.
19 Ko e mena ia kua vale ai a Herotia kia ia, kua fia kelipopo foki a ia, ka e nakai maeke;
20 Ha kua matakutaku a Herota kia Ioane, he iloa e ia ko e tagata tututonu a ia, mo e tapu, ti leveki a ia kia ia; kua fanogonogo foki kia ia, ti eke e ia e tau mena loga, kua fanogonogo kia ia mo e fiafia.
21 Kua hoko ke he aho kua lata ai, ko e aho ia ne eke ai e fakamanatuaga he fanau mai a Herota, ne eke e ia e galue mo e hana tau hagai, mo e tau iki kua pule he tau kau, mo e tau patu lalahi mai Kalilaia.
22 Kua hu foki ki fale e tama fifine a Herotia, kua koli mo e fakafiafia ai a Herota, katoa mo lautolu ne tatakoto mo ia ke kai mena; ti pehe e patuiki ke he tamafine, Ati tala mai a e koe kia au e mena ne manako a koe ki ai, to atu e au kia koe.
23 Kua omonuo foki a ia kia ia, Ko e taha mena ka ole mai ai e koe, to atu ai e au māu, ke hoko ke he veveheua he haku a kautu.
24 Ti hu atu a ia ki fafo, mo e tala age ke he matua fifine hana, Ko e heigoa e mena ke ole ai e au? Ti pehe mai a ia, Ko e ulu a Ioane papatiso.
25 Ti kua hu atu agataha a ia ke he patuiki mo e fakatepetepe, ti ole atu kia ia, kua pehe age, Kua loto au ke ta mai e koe kia au a magaaho e ulu a Ioane papatiso ke he kumete.
26 Ati hukia lahi ai e loto he patuiki; ka ko e hana omonuo, mo lautolu ne tatakoto ke kai mena fakalataha mo ia, kua nakai maeke ia ia ke tala age ki ai ke toka.
27 Ati fekau ai agataha he patuiki e taha he kau leoleo, kua tala age ki ai ke ta mai hana a ulu. Ti fano a ia, mo e hio mai hana a ulu ke he fale puipui.
28 Kua ta mai foki e ia hana a ulu ke he kumete, kua age ke he tamafine; ti ta age he tamafine ke he matua fifine hana.
29 Kua iloa he hana tau tutaki ti o age ai a lautolu, kua uta hana tino, mo e tuku ai ke he tukuaga.
30 Kua fakapotopoto mai e tau aposetolo kia Iesu, kua tala age foki e lautolu kia ia e tau mena oti, ko e tau mena ne eke e lautolu, mo e tau mena ne fakaako ai e lautolu.
31 Ti pehe a ia kia lautolu, Ati o mai a, hoko tautolu ni, ke he mena tokanoa ke okioki fakatote ai a mutolu; ha kua tokologa e tau tagata ne feoaki ai, ti nakai atā ke kai mena a lautolu.
32 Ti o atu a lautolu, hoko lautolu he foulua ke he mena tokanoa.
33 Ka ko e moto tagata kua kitia a lautolu ha ne o age, kua iloa foki a ia he tau tagata tokologa, ti tafepoi atu ki ai hala uta a lautolu mai he tau māga oti ti hoko mua a lautolu; kua fakapotopoto age kia ia.
34 Kua haele age a Iesu, kua fioia e ia e moto tagata tokologa, ti hohofi hana fakaalofa kia lautolu, ha ko e mena tuga ne tau mamoe nakai fai leveki a lautolu; ti kamata ai a ia ke fakaako a lautolu ke he tau mena loga.
35 Kua leva tuai e aho, ti o mai ai hana tau tutaki kia ia, kua pehe age, Ko e tutakale hanai, kua leva tuai e aho;
36 Kia fakafano e koe a lautolu ke o atu a lautolu ke he tau kaina mo e tau magamotu ne tata mai, mo e fakafua ai e tau mena kai ma lautolu; he nakai fai mena a lautolu ke kai.
37 Ka e tala age a ia kia lautolu, kua pehe age, Kia age e mutolu e falu a mena kai ma lautolu. Ti pehe age a lautolu kia ia, Ke o kia a mautolu ke fakatau e tau mena kai ke lata mo e ua e teau e tenari, ke age ma lautolu ke kai?
38 Ti pehe a ia kia lautolu, Po ke ne fiha ha mutolu a tau areto? ati o a, mo e kitekite ai. Kua kitia e lautolu, ti tala age pehe Na lima la, ti ua e ika.
39 Kua fekau e ia a lautolu ke tala age ke he tau tagata oti, kia tatakoto ai a lautolu ke he tau vahega ke he motietie.
40 Ti tatakoto ai a lautolu ke he tau vahega takitokoteau mo e takitokolima gofolu.
41 Ti toto ai e ia e lima areto mo e na ika ua, kua haga hake a ia ke he lagi, kua fakaaue; ti tofitofi ai e ia e tau areto, mo e age ke he hana tau tutaki, kia fakatokatoka e lautolu ke he faoa, ne tufa foki e ia e na ika ua kia lautolu oti.
42 Ti kai ai a lautolu oti, kua makona.
43 Kua uta foki e lautolu hogofulu ma ua e kato, kua puke ke he tau mena ne toe, katoa mo e tau magaika.
44 Ko lautolu ne kai e tau areto, tokai ko e lima e afe he tau tane.
45 Ti fakamakamaka agataha a ia ke he hana tau tutaki kia hake a lautolu ke he foulua, mo e mumua atu, ke he fahi atu ki Petesaita, ka e fakafano atu e ia e moto tagata.
46 Kua fakamavehe a ia mo lautolu, ti haele age ai a ia ke he mouga ke liogi.
47 Kua hoko ke he magaaho afiafi, ha i ai foki e foulua he tutavaha, ka e tokotaha a ia i uta.
48 Kua fioia e ia a lautolu, ha ne matematekelea he alo, ha kua agi mai mua e matagi; kua haele atu ai a ia kia lautolu ke he leoleoaga ne fa he po, kua fano a ia i luga he kili vai, tuga ne mena ko e fano leva ha ne fai.
49 Ka kua kitia e lautolu a ia ha ne fano i luga he kili vai, piko na lautolu ko e aitu a ia; ti fakatutu ai a lautolu.
50 Ha kua kitia e lautolu oti a ia, kua fakaatukehe ai; ti vagahau age ai agataha a ia kia lautolu, kua pehe atu, Kia fakamanavalahi a mutolu; ko au hanai; ua matakutaku a mutolu.
51 Ti hake ai a ia kia lautolu he foulua, ti mate ai e matagi; ati hohopo ai ha lautolu a tau ate, mo e ofomate ai.
52 Ha kua nakai maama ke he areto, he mao ha lautolu a tau loto.
53 Kua o a lautolu ke he fahi atu, kua hohoko ke he fahi ko Kenesareta, ti hiki ai a lautolu.
54 Kua o atu a lautolu he foulua, ti iloa agataha e lautolu a ia,
55 Ti tafepoi mai a lautolu he fahi oti ia, kua kamata ke uta fano e tau tagata gagao ki luga he tau mohega ke he tau mena ne logona ai e lautolu ha i ai a ia.
56 Ko e tau mena oti ne haele atu ai a ia, po ke tau magamotu, po ke tau māga, po ke tau kaina, kua tuku ai e lautolu e tau tagata gagao ke he tau male, mo e olelalo kia ia, kia fakapiki atu a lautolu ke he kala tapulu hokoia hana; ko lautolu foki ne piki atu kia ia kua fakamalolo ai a lautolu oti.