Mareko 7:1-37
7 KUA fakapotopoto age e tau farasaio kia ia, mo e falu a tohikupu ne o mai a lautolu i Ierusalema.
2 Kua kitia e lautolu falu he hana tau tutaki kua kai mena a lautolu, mo e tau lima kelea (hanai e kakano, ko e tau lima nakai holoholo), ti eke fakakelea atu ai a lautolu.
3 Ha ko e tau farasaio katoa mo e tau tagata Iutaia oti, nakai kai mena a lautolu, ato oti he holoholo fakamitaki ha lautolu a tau lima; kua taofi e lautolu e tau kupu toka tuai he tau tagata i tuai.
4 Ka o mai foki a lautolu he male, kaeke ke nakai koukou a lautolu, ti nakai kai mena; ko e falu a mena loga foki kua talia e lautolu mo e taofi ki ai, ko e fuifui he tau kapiniu inu, mo e tau kapiniu, mo e tau kapiniu apakula, katoa mo e tau mohega.
5 Ti hūhu age ai e tau farasaio mo e tau tohikupu kia ia, Ko e ha nakai omaoma ai hāu a tau tutaki ke he tau kupu toka tigahau he tau tagata i tuai, he kai mena a lautolu mo e tau lima nakai holoholo.
6 Ti tala age a ia kia lautolu, kua pehe age, kua lata mitaki ni e kupu ne talahau e Isaia kia mutolu e tau tagata fakavai tuga ne tohi mai, Kua fakaheke mai e motu nai kia au ke he tau laugutu ha lautolu, ka ko e tau loto ha lautolu kua fakamamao ni kia au.
7 Kua tapuaki noa mai a lautolu kia au, kua fakaako atu e lautolu e tau puaki he tau tagata.
8 Ha kua toka e mutolu e puaki he Atua, ka e taofi e tau kupu toka tuai he tau tagata, ko e fuifui he tau kapiniu, mo e tau kapiniu inu, katoa foki mo e falu a mena loga pihia kua eke e mutolu.
9 Ti pehe a ia kia lautolu, Mitaki ka e ha he eke e mutolu e puaki he Atua, mo mena nakai aoga, kia taofi e mutolu ha mutolu a tau kupu toka tuai.
10 Ha kua pehe mai a Mose, Kia fakalilifu a koe ke he hāu a matua tane mo e hāu a matua fifine; katoa mo ē, Ko e tagata ka vagahau kelea ke he matua tane, po ke matua fifine, kia kelipopo a ia.
11 Ka ko mutolu, kua pehe mai, Ka pehe age taha ke he matua tane, po ke matua fifine, Kua kopano haku a tau mena oti ne aoga kia koe, (ko e kakano hanai, ko e mena kua foaki mo poa),
12 Ti toka ai e mutolu ia, kia nakai tuai eke e ia ha mena mo e hana matua tane, po ke hana matua fifine.
13 Kua vevete e mutolu e kupu he Atua ke he tau kupu toka tuai ha mutolu, kua tuku mai e mutolu. Mo e falu a mena loga pihia kua eke e mutolu.
14 Ti ui age a ia ke he moto tagata oti, kua tala age a ia kia lautolu, Fanogonogo oti mai a a mutolu kia au, mo e logona ai e mutolu.
15 Nakai fai mena i fafo he tagata ke fano ki loto ia ia, ke maeke ai ke kelea a ia; ka ko e tau mena ne hau i loto ia ia, ko e tau mena ia ke kelea ai e tagata.
16 Ko e tagata kua fai teliga ke fanogonogo aki, ati fanogonogo mai a a ia.
17 Kua haele age a ia ki loto fale, kua toka e ia e moto tagata ti hūhu age ai hana tau tutaki kia ia ke he kakano he fakatai ia,
18 Ti pehe age a ia kia lautolu, Ko mutolu kia falu kua goagoa pihia? Nakai kia iloa e mutolu ko e tau mena oti i fafo ke o ki loto he tagata nakai maeke ke kelea ai e tagata.
19 Nakai hoko e tau mena ia ke he hana loto, ka ko e manava ni, ti hoko age ki fafo ke he vao, ko e mena ia ke mole atu ai e tau mena kai oti.
20 Ne tala age foki e ia, Ko e mena ke hau i loto he tagata, ko e mena ia ke kelea ai e tagata.
21 Ha kua hake mai loto he tagata, ko e tau manatu kelea, ko e faivao, ko e feuaki, ko e keli tagata,
22 Ko e kaiha, ko e velevelemena, ko e mahani kelea, ko e pikopiko, ko e matahavala, ko e mata kakana, ko e tau kupu kelea, ko e fakatokoluga, ko e nakai manamanatu.
23 Ko e tau mena kelea oti ia kua hau mai i loto ti kelea ai e tagata.
24 Kua tu hake a ia he mena ia kua haele atu ke he fahi ki Turo mo Saitonu; kua haele age a ia ki fale, kua finagalo foki a ia ke ua kitia e taha a ia; ka e nakai maeke ke fakagalo a ia.
25 Ha ko e fifine kua heketia hana tama fifine he agaga kelea, kua logona e tala kia ia, ti hau ai a ia kia ia, mo e fakaveli ke he na ve hana.
26 (Ko e fifine Heleni a ia, ne fanau i Suria Foinike), ti ole atu a ia kia ia ke vega e ia ki fafo e temoni he hana a tama.
27 Ka e pehe age a Iesu kia ia, Tokai ke makona fakamua e fanau; ko e mena nakai lata ke uta e tau mena kai he fanau, mo e tolo ke he tau kuli.
28 Ti tala mai a ia kia ia, kua pehe mai Ko e Iki na e, ko e moli a koe, ka ko e tau kuli ki lalo he tau laulau kua kai e lautolu e tau valavala mena he tau tama.
29 Ti pehe age ai a ia kia ia, Ati fano a, ha ko e kupu ia; kua fano tuai e temoni i loto he hāu a tama fifine.
30 Ti fano ai a ia ke he hana fale, kua moua ai hana tama fifine ha ne takoto i luga he mohega, kua mole atu tuai e temoni.
31 Kua liu foki toka e ia e fahi ki Turo mo Saitonu, kua hoko atu ke he vai i Kalilaia, ne o ai ke he fahi a Tekapoli.
32 Kua ta mai e lautolu kia ia e tagata teliga tuli mo e leo fakakilole, kua olelalo atu kia ia kia fakalago ki ai hana lima.
33 Ti takitaki age e ia a ia tokotaha mai he tau tagata, kua tuku foki hana tau matalima ke he hana tau poko teliga, kua anu foki, kua piki age ke he hana alelo.
34 Kua kitekite hake a ia ke he lagi, kua oi; ti tala age a ia kia ia, Efata; ko e hana kakano hanai, kia hafagi.
35 Ti māgi ai agataha hana tau teliga, ti mavete mo e pipi he hana alelo, ti vagahau mitaki ai a ia.
36 Ne hataki foki e ia a lautolu, neke talahau e lautolu kia taha; pete ni he hataki e ia a lautolu, ka e au atu ai he ogo age e lautolu;
37 Kua pehe age mo e ofomate lahi, Uhoaki hana tau mena oti ne eke; kua fakafanogonogo e ia e tau tagata teliga tuli, katoa mo e tau tagata kuhukuhu, kua fakavagahau e ia.