Mataio 11:1-30
11 KUA oti he poaki a Iesu ke he tokohogofulu ma ua he hana tau tutaki, ati haele kehe ai a ia he mena ia ke fakaako atu mo e fakamatala atu ke he tau māga ha lautolu.
2 Kua logona e Ioane ke he fale puipui e tau gahua a Keriso; ti fekau mai ai e tokoua he hana tau tutaki,
3 Kua pehe mai kia ia, Ko koe kia ka haele mai, po ke leo a mautolu kia taha?
4 Ti tala age ai a Iesu, kua pehe age kia laua, Ati o atu a a mua mo e fakailoa kia Ioane e tau mena kua fanogonogo a mua ki ai mo e kitekite ki ai;
5 Kua ala e tau matapouli, mo e ō e tau kulikuli, kua fakamea e tau lepela, mo e logona e tau teligatuli, kua fakamamatike e tau tagata mamate, mo e fakamatala e vagahau mitaki kia lautolu ne nonofogati;
6 Ke monuina foki a ia kua nakai tupetupe ha ko au.
7 Kua o a laua, ati tala age ai a Iesu ke he lanu tagata kia Ioane, Ne o atu a mutolu ke he tutakale ke mamata ha ha? Ko e kaho kia kua havilia he matagi?
8 Ka e o atu a mutolu ke kitia heinoa? Ko e tagata kia kua tapulu ke he tau tapulu molulu? Kitiala, ko lautolu ne tapulu ke he tau tapulu molulu, ha ha he tau fale he tau patuiki a lautolu.
9 Ka e o atu a mutolu ke kitia heinoa? Ko e perofeta kia? E, ke tala atu e au kia mutolu, Mua na ia ke he perofeta.
10 Ha ko ia haia ne tohia mai ki ai, Kitiala, to fakafano atu e au haku a fekafekau ki mua hau, ke tauteute e ia hau a hala ki mua hau.
11 Ko e moli, ke tala atu e au kia mutolu, nakai tu mai taha ia lautolu ne fanau mai he tau fifine ke mua kia Ioane e papatiso; ka ko ia ne tote ue atu ke he kautu he lagi, kua mua a ia kia ia.
12 Ne kamata mai foki he vaha kia Ioane e papatiso, kua hoko ke he vaha nai, kua hou e kautu he lagi; ti kua uta foki e lautolu ne hou.
13 Ha ko e mena kua perofeta mai he tau perofeta oti mo e fakatufono, ato hoko ni kia Ioane.
14 Kaeke foki ke loto a mutolu ke talia, ko Elia ni haia ne kotofa ke hau.
15 Ko ia ne fai teliga ke fanogonogo aki, ati fanogonogo mai a a ia.
16 Ka fakatai e au ha ha e hau nai? Ke lata a ia mo e tau tama ikiiki kua nonofo he male, mo e tauhea atu ke he tau kapitiga ha lautolu.
17 Kua pehe atu, Ne fakatagi kofe e mautolu kia mutolu, ka e nakai kolikoli mai a mutolu; ne tagi ualoa a mautolu kia mutolu, ka e nakai tagi tatuki a mutolu.
18 Ko e mena hau a Ioane nakai kai, nakai inu foki a ia; ti pehe ai a lautolu, Ha ha ia ia e temoni.
19 Ne hau e Tama he tagata, kua kai a ia, mo e inu; ti pehe ai a lautolu, Kitiala, ko e tagata kai lahi mo e inu uaina, ko e kapitiga he tau telona mo e tau tagata hala. Ti talahaua tututonu e pulotu he tau fanau hana.
20 Ti kamata ai a ia ke akonaki e tau māga kua eke ai e tau mana loga hana, ha kua nakai tokihala a lautolu.
21 Oi te fakaalofa kia koe ma Korasina! Oi te fakaalofa kia koe ma Petesaita! Ane mai eke i Turo mo Saitonu e tau mana ne eke ia mutolu, po kua tokihala tigahau a lautolu ke he iekafu popo mo e efuefu afi.
22 Ko e mena ia ke tala atu ai e au kia mutolu, to laukauka a Turo mo Saitonu ke he aho fakafili kia mutolu.
23 Ko koe foki ma Kapanaumi, kua fakatokoluga ke hoko ke he lagi, to palu hifo ni a koe ke he po; ane mai eke i Sotoma e tau mana ne eke ia koe, po kua tumau a ia ke hoko mai ke he vaha nai.
24 Ko e mena ia ke tala atu ai e au kia mutolu, to laukauka e motu ko Sotoma ke he aho fakafili kia koe.
25 Ko e magaaho ia ni kua tala age ai a Iesu, kua pehe age, Hoku Matua na e, kua fakaaue au kia koe, ko e Iki he lagi mo e lalolagi, he ufiufi e koe e tau mena nai he tau tagata iloilo mo e loto matala, ka kua fakakite atu ai ke he tau tama mukemuke.
26 Ko ia haia, hoku Matua na e, ha ko e hau a finagalo ni haia.
27 Kua tuku mai kia au e tau mena oti he haku a Matua; nakai emo foki taha ke kitia e Tama, ko e Matua hokoia; nakai emo foki taha ke kitia e Matua, ko e Tama hokoia, mo ia ni ke loto e Tama ke fakakite atu ki ai.
28 Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu.
29 Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu.
30 Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.