Mataio 12:1-50
12 KO e vaha ia, kua haele age ai a Iesu ke he tau ulu saito ke he sapati; kua fia kai foki hana tau tutaki, kua faki ai e lautolu e tau fua saito mo e kai ai.
2 Kua kitia he tau farasaio ati pehe age ai a lautolu kia ia, Kitiala, kua eke he tau tutaki hau e mena kua nakai lata he eke ke he sapati.
3 Ati tala age a ia kia lautolu, Nakai kia totou e mutolu e mena ne eke e Tavita, ka kua fia kai a ia, katoa mo lautolu ne fakalataha mo ia;
4 Kua hu a ia ke he fale he Atua, kua kai foki e ia e tau areto kua fakatoka ki mua ko e tau mena tapu ke kai ai e ia, katoa foki mo lautolu ne fakalataha mo ia, ka ko e tau ekepoa hoko lautolu?
5 Ka e nakai kia totou foki e mutolu ke he fakatufono, ko e tau sapati oti kua holi ai e sapati he tau ekepoa ke he faituga, ka e nakai hala a lautolu?
6 Ka e tala atu e au kia mutolu, Ha hinai taha kua mua ke he faituga.
7 Ane mai kua iloa e mutolu e kakano he kupu nai, Mena loto au ke he fakaalofa, ka e nakai ko e poa, po kua nakai fakahala e mutolu a lautolu nakai hala.
8 Ha ko e Tama he tagata ko e Iki foki haia he sapati.
9 Kua haele kehe a ia he mena ia, ti kua hu atu ai a ia ke he sunako ha lautolu.
10 Kitiala, ha ne nofo ai e tagata kua mate hana lima; ti hūhu age ai a lautolu kia ia, kua pehe age, Lata nakai ke fakamalolo tagata ke he sapati? kia fai mena a lautolu ke hokotaki ai a ia.
11 Ati tala age ai a ia kia lautolu, Ko hai kia taha ia mutolu ne taha hana mamoe, kaeke ke to foki a ia ke he luo ke he sapati, nakai kia toto ai, mo e ta hake ki luga?
12 Nakai kia mua e tagata ke he mamoe? ko e mena ia kua lata ai ke mahani mitaki ke he sapati.
13 Ati tala age ai a ia ke he tagata, Fakaolo a hau a lima; ti fakaolo ai e ia, ati mitaki ai tuga ne taha.
14 Ka e o e tau farasaio ki fafo, mo e pulega ai a lautolu kia ia, kia tamate e lautolu a ia.
15 Ka kua fioia e Iesu, ti haele kehe ai a ia he mena ia; kua mumui foki kia ia e lanu tagata tokologa, ati fakamalolo ai e ia a lautolu oti;
16 Ti hataki e ia a lautolu, neke talahau fakapuloa a lautolu a ia;
17 Kia fakamoli ai e kupu he perofeta ko Isaia, ne pehe mai,
18 Kitiala, ko e haku a fekafekau kua fifili e au; ko e haku a fakahele kua fiafia ki ai haku a loto; to tuku atu e au haku Agaga ki luga ia ia, to fakakite atu e ia e fakafiliaga ke he tau motu kehe.
19 Nakai fetoko a ia, ti nakai hea foki a ia; nakai logona foki e taha hana leo ke he tau puhala;
20 Nakai papaki e ia e kaho kua maihiihi, nakai tamate foki e ia e vavae ne puho tote; ato fakakautu e ia e fakafiliaga.
21 Ko e hana higoa foki ke amaamanaki ai e tau motu kehe.
22 Ati ta mai ia kia ia e tagata kua heketia he temoni, ko e matapouli foki a ia mo e kuhukuhu; ati fakamalolo ai a ia e ia, ti vagahau ai mo e ala e matapouli mo e kuhukuhu.
23 Ti ofomate ai e lanu tagata oti, kua pehe age, Ka e nakai kia ko e tama a Tavita hanai?
24 Ka e logona he tau farasaio, ti tala age ai a lautolu, Aua a Pelesepulo e iki he tau temoni, ti nakai vega he tagata na e tau temoni.
25 Ka kua fioia e Iesu ha lautolu, a tau manatu ati tala age ai a ia kia lautolu, Ko e tau kautu oti kua feveheaki, takitaha mo e fakaoti ni; ko e tau māga oti, po ke tau magafaoa kua feveheaki, to takitaha mo e nakai tumau ia.
26 Kaeke foki kua vega e Satani, a Satani, kua feveheaki tuai e ia a ia to tumau fefe foki hana kautu?
27 Kaeke foki ko Pelesepulo, kua vega ai e au e tau temoni ko hai kia kua vega ai e tau temoni he tau fanau ha mutolu? Ko e mena haia ke eke ai a lautolu mo tau fakafili kia mutolu.
28 Kaeke foki ko e Agaga he Atua kua vega ai e au e tau temoni kua hoko mai tuai kia mutolu e kautu he Atua.
29 Ke maeke fefe taha ke hu atu ke he fale he tagata toa, mo e fofo hana tau mena; ato lili fakamua e tagata toa, to fofo ai hana a fale?
30 Ko ia kua nakai kau mo au, kua kau kehe a ia ia au; ko ia nakai tanaki fakalataha mo au kua fakatafola kehe e ia.
31 Ko e mena haia ke tala atu ai e au kia mutolu, Ko e tau hala oti mo e tau kupu kelea, to fakamagalo ia ke he tau tagata; ka ko e kupu kelea ke he Agaga, nakai fakamagalo ia ke he tau tagata.
32 Ka fai kupu taha ke he Tama he tagata, ti fakamagalo a ia; ka ko ia ne fai kupu ke he Agaga Tapu, nakai fakamagalo a ia ke he mouiaga nai, po ke mouiaga ne tatali.
33 Kia eke e mutolu e akau ke mitaki, kia mitaki foki mo e hana tau fua; po ke eke e mutolu e akau ke kelea, kia kelea foki mo e hana tau fua; ha ko e hana tau fua kua mailoga ai e akau.
34 Ko e tau fanau he tau gata gagau na e, ko mutolu ne mahani kelea ke maeke fefe ia mutolu ke vagahau ke he tau mena mitaki? ha ko e loga he tau mena he loto ke vagahau mai ai e gutu.
35 Kua ta mai e tau mena mitaki he tagata mahani mitaki, mai he tau mena mitaki kua tanaki ke he hana loto; ko e tagata mahani kelea foki, kua ta mai e tau mena kelea kua tanaki ke he hana loto.
36 Ka e tala atu e au kia mutolu, ko e tau kupu fakateaga oti ke vagahau he tau tagata, to fakamatala atu ai e lautolu ke he aho fakafili.
37 Ha ko e hau a tau kupu ke talahau ai a koe ko e tututonu; ko e hau a tau kupu foki ke fakahala aki a koe.
38 Ati tala mai ai e falu he tau tohikupu, mo e tau farasaio, kua pehe mai, Ko e akoako na e, kua fia kitia e mautolu taha fakamailoga ia koe.
39 Ka kua tali age ai a ia, kua pehe age kia lautolu, Ko e hau kelea mo e faivao kua kumi mai taha fakamailoga; ka e nakai ta atu ha fakamailoga ki ai, ka ko e fakamailoga hokoia ni a Iona ko e perofeta.
40 Ka e tuga a Iona ne nofo ke he manava he ika lahi ke he tolu a aho mo e tolu a po, to pihia foki e Tama he tagata ke nofo ai i lalo he kelekele ke he tolu a aho mo e tolu a po.
41 To tutu e tau tagata Nineva ke he fakafiliaga fakalataha mo e hau nai, ti fakahala ai; ha ko e mena tokihala a lautolu he fakamatalaaga a Iona; kitiala ha hinai taha kua mua kia Iona.
42 To tutu fakalataha e patuiki fifine he fahi ki toga mo e hau nai ke he fakafiliaga, ti fakahala ai; ha ko e mena hau a ia mai he fakaotiaga he lalolagi ke fanogonogo ke he pulotu a Solomona; kitiala, ha hinai taha kua mua kia Solomona.
43 Ka hu ki fafo he tagata e agaga kelea, ti fai fano ai a ia ke he tau mena momo, kua kumi ha okiokihaga, ka e nakai moua.
44 Ati pehe age ai a ia, Ko e liu atu ne fai au ke he fale haku ne hau ai au; kua fano ai, ti moua ai kua toka noa, kua oti foki he tafitafi mo e tauteute
45 Ti fano ai a ia kua ta mai ne ia e falu a agaga ne tokofitu, ne mua ha lautolu a mahani kelea he hana, ati huhu atu ai a lautolu ki fale, kua nonofo ai; ati mua ai e kelea he fakahikuaga he tagata ia, ke he hana kamataaga. Ke eke pihia foki ke he hau kelea nai.
46 Kua vagahau a ia ke he lanu tagata, kitiala, kua tutu mai ai i fafo hana matua fifine, mo e hana tau matakainaga, kua fia vagahau mo ia.
47 Ti pehe mai ai e taha kia ia, Kitiala, kua tutu mai i fafo hau a matua fifine, mo e hau a tau matakainaga kua fia vagahau mo koe.
48 Ati tala age ai a ia, kua pehe age kia ia ne tala age kia ia, Ko hai kia hoku matua fifine? Ko hai foki haku tau matakainaga?
49 Ti kua fakaolo ai e ia hana lima ke he hana tau tutaki, kua pehe atu, Kitiala, ko e hoku matua fifine, mo e hoku tau matakainaga.
50 Ha ko ia kua eke e finagalo he haku a Matua ha ha he lagi, ko e haku a matakainaga a ia, mo e haku a mahakitaga, mo e haku a matua fifine.